ពីនេះ ពីនោះ
អំពើល្អ១០យ៉ាងដែលមនុស្សគួរធ្វើ
× ភ្នំពេញ៖ ទ្រឹស្តីកម្មផល របស់ព្រះពុទ្ធបានទូន្មានថា បុគ្គលកសាងអំពើណា និងទទួលបានផលនោះ។ ហេតុនេះ មនុស្សគួរប្រព្រឹត្តនូវអំពើល្អទាំង១០យ៉ាង ដើម្បីទទួលបាននូវសេចក្តីសុខសុភមង្គល។ តើអំពើល្អទាំង១០យ៉ាង មានអ្វីខ្លះ?
ក)ការប្រព្រឹត្តអំពើល្អដោយកាយ៣ (កាយសុចរិត)
ទី១៖ការវៀរចាកអំពើកាប់សម្លាប់មនុស្ស ឬសត្វមានជីវិត
២.ការមិនកេងបន្លំយកទ្រព្យសម្បត្តិរបស់អ្នកដទៃឬក៏ប្រើឲ្យអ្នកដទៃលួច ឆក់។
៣.ការមិនប្រព្រឹត្តខុសក្នុងកាម ទៅលើប្តី ឬ ប្រពន្ធអ្នកដទៃ។
ខ. ការប្រព្រឹត្តអំពើល្អដោយវាចា៤ (វចីសុចរិត)
៤.វៀរចាកនូវការពោលពាក្យកុហកបោកប្រាស់បំភាន់ភ្នែកអ្នកដទៃ។
៥.ការមិនពោលពាក្យញុះញង់ បំបែកបំបាក់អ្នកដទៃ។
៦.ការនិយាយពាក្យផ្អែមល្ហែមទន់ភ្លន់ពីរោះ ដែលជាទីគាប់ ត្រចៀក ត្រូវចិត្តនៃអ្នកដទៃ គឺការមិននិយាយទ្រគោះបោះបោកចាក់ដោតបញ្ឈឺចិត្តគេជាដើម។
៧.ការនិយាយអំពីប្រយោជន៍ និងសេចក្តីចម្រើនទាំងពីរប្រការគឺផ្លូវលោក និងផ្លូវធម៌ ពោលគឺមិននិយាយពោលពាក្យរោយរាយឥតប្រយោជន៍។
គ) ការប្រព្រឹត្តអំពើល្អដោយចិត្ត៣ (មនោសុចរិត)
៨. មិនតាំងចិត្តគិតសម្លឹងរំពៃយកទ្រព្យអ្នកដទៃមកជាទ្រព្យរបស់ខ្លួន។
៩.មិនចងគំនុំគុំគួនធ្វើឲ្យអ្នកដទៃវិនាស និងមិនត្រូវបៀតបៀនអ្នកដទៃ ពោលគឺត្រូវមានសម្មសង្កប្បៈ(ត្រិះរិះត្រឹមត្រូវ)។
១០.សេចក្ដីយល់ឃើញត្រូវ (សម្មាទិដ្ឋិ) គឺឃើញថាធ្វើបុណ្យបានបុណ្យ ធ្វើបាបបានបាប។
ដកស្រង់៖ បទបង្ហាញរបស់សាស្ត្រាចារ្យ ហ៊ឹម ញាណារិទ្ធ កាលពីថ្ងៃទី៣០ ខែកញ្ញា ឆ្នាំ២០១៤ នៅរាជបណ្ឌិត្យសភាកម្ពុជា
© រក្សាសិទ្ធិដោយ thmeythmey.com