ពីនេះ ពីនោះ
៨ចំណុចដែលគួរអនុវត្តបន្ទាប់ពីលែងលះរួច!
× រឿងរ៉ាវលែងលះ របស់គូស្វាមីភរិយានីមួយៗ អាចមានភាពខុសប្លែកៗគ្នា។ ប្រហែលជាអ្នកធ្លាប់ បានរៀបការ ហើយរស់នៅជាមួយគ្នា ក្នុងរយៈពេលជាច្រើនទស្សវត្ស ឬ ក៏ប្រហែលជា អ្នកទើបតែនឹងរៀបការ បានរយៈពេលត្រឹមតែមួយឆ្នាំ ឬ ពីរឆ្នាំ។ អ្នកអាចនឹងមានកូនរួចទៅហើយ ឬ ក៏មិនទាន់មាន។ ប្រហែលជា ការលែងលះនេះ គឺជាគំនិតរបស់អ្នក ឬ ក៏អាចជាគំនិតរបស់ដៃគូអ្នក ឬ វាអាចជាគំនិតរបស់ អ្នកទាំងពីរ ដែលយល់ឃើញថា ការរស់នៅបែកគ្នា គឺជាជម្រើសចុងក្រោយ ដែលប្រសើរបំផុត ។ អ្នកអាចនឹងមានសភាពធូរស្រាលចិត្ត, ឬ អ្នកអាចមានអារម្មណ៍ថាឈឺចាប់ ឬ ក៏កើតមាននូវអារម្មណ៍ទាំង ពីរនេះ ក្នុងពេលតែមួយ ។
ប៉ុន្តែមិនថា មូលហេតុណាមួយដែល ធ្វើអោយអ្នកដើរមកដល់ផ្លូវមួយនេះ សំណួរដែលអ្នកចាំបាច់ ត្រូវឆ្លើយនោះគឺថា តើអ្នកគួរធ្វើ ការបន្តដំណើរជីវិតបែបណាទៀត ចាប់ពីពេលនេះទៅ ? ហើយតើអ្នក ត្រូវ ស្វែងរកថាខ្លួនឯងជានរណា អោយប្រាកដ និង អ្វីដែលអ្នកចង់បាន នៅក្នុងនាមជាមនុស្សថ្មី ដែលកំពុងស្ថិតនៅតែម្នាក់ឯង? តើដំណើរជីវិតថ្មីរបស់អ្នក នឹងមើលទៅមានសភាពដូចម្តេចដែរ ហើយថា តើអ្នកគួរចាប់ផ្តើមបន្តដំណើរ ជាថ្មីនៅក្នុងស្ថានភាពនេះ បែបណា ?
ទាំងនេះ គឺជាគន្លឹទាំង៨យ៉ាង ដែលអាចជួយសាងជីវិតអ្នកជាថ្មី ៖
១. អនុញ្ញាតអោយខ្លួនអ្នក ធ្វើការបញ្ចេញនូវភាពសោកសៅ
គ្មាននរណាម្នាក់ដែលធ្វើការរៀបការ ហើយបានគិតថា ខ្ញុំប្រាកដថា នៅថ្ងៃណាមួយពួកយើង នឹងលែងលះគ្នា! បើទោះបីជា ការលែងលះនេះគឺជាអ្វីដែលអ្នកចង់បាន ក៏ពេលវេលានៃការបែកគ្នានេះ នៅតែតំណាងអោយ ភាពបាត់បង់មួយដ៏ធំធេង ចំពោះអ្នក។
មិនថា អ្នកធ្លាប់បានជួបជីវិតអាពាហ៍ពិពាហ៍ និង ការលែងលះស្ថិតក្នុងស្ថានភាពបែបណា វានៅតែធ្វើ អោយអ្នកមានអារម្មណ៍ថា វាជាក្តីទុក្ខសោក នេះបើយោងតាមសំដី របស់គ្រូពេទ្យអនុបណ្ឌិតផ្នែកចិត្តវិទ្យា Florence Falk និង ជាអ្នកនិពន្ធសៀវភៅ វិធីសាស្ត្រក្នុងការរៀនរស់នៅជាស្ត្រីតែម្នាក់ឯង។
អ្នកអាចនឹងមានអារម្មណ៍ថាស្តាយក្រោយ នូវអ្វីដែលអ្នកបានធ្វើ ឬ ក៏មិនបានធ្វើ ឬ ឆ្ងល់ថាតើអ្នកមាន បានធ្វើការសម្រចចិត្តខុសឬទេ? អ្នកមិនត្រូវរស់នៅ ជាមួយអារម្មណ៍ទាំងនោះទៀតទេ ប៉ុន្តែអ្នកអាច បង្កើតកន្លែងមួយសម្រាប់ដាក់ពួកវា ។ ការបាត់បង់ គឺជាការបាត់បង់ ។ វាត្រូវមានកន្លែងណាមួយត្រូវ មានភាពទំនេរ ដែលអាចអោយវត្ថុអ្វីមួយ អាចបំពេញទីនោះបាន បើទោះបីជាវា ហាក់នឹងមិនសាកសម ស្ថិតនៅក្នុងទីនោះក៏ដោយ ។
២. ធ្វើការឆ្លងកាត់ អារម្មណ៍របស់អ្នក
កុំព្យាយាម ចងភ្ជួរនូវរឿងរ៉ាវ ជាច្រើនដែលមាននៅក្នុងទំនាក់ទំនងនាពេលអតីតកាល ទៅក្នុងជីវិតថ្មី របស់អ្នក។ ព្យាយាមស្វែងរកវិធី ក្នុងការស្រាយចេញនូវអារម្មណ៍រារែក ដែលកើតចេញ ពីការបាត់បង់ ជីវិតអាពាហ៍ពិពាហ៍ នេះជាដំបូន្មានរបស់លោកបណ្ឌិតផ្នែកចិត្តវិទ្យា Robert Alberti និង ជាអ្នកនិពន្ធរួម នៃសៀវភៅ ដែលមានចំណងជើងថា ការកសាងខ្លួនឯងជាថ្មី នៅពេលដែលទំនាក់ទំនងត្រូវបានបញ្ចប់។
វាអាចមានន័យថា អ្នកត្រូវព្យាយាមនិយាយនូវអារម្មណ៍ របស់អ្នក ទៅកាន់អ្នកជំនាញព្យាបាលផ្លូវចិត្ត ឬក៏ធ្វើការផ្តោតថាមពលរបស់អ្នក ទៅលើសកម្មភាពដែលធ្វើអោយខ្លួនប្រាណអ្នកមានសុខភាពល្អ និង មានភាពរីករាយ។ វាជាការធម្មតានោះទេ ក្នុងការលុបបំបាត់នូវអារម្មណ៍ទាំងអស់នេះចេញ ពីក្នុង ខួរក្បាលអ្នក ប៉ុន្តែអ្នកត្រូវ ធ្វើការតទល់ជាមួយនឹងពួកវា ឬ ក៏ពួកវាអាចនឹង បំពុលជីវិតរបស់អ្នក ទៅថ្ងៃមុខទៀត។
ប្រសិនបើអ្នកយល់ថា ខ្លួនអ្នកត្រូវការនូវវិធីនៃការព្យាបាល នោះអ្នកប្រហែលជាត្រូវចងចាំក្នុងចិត្តថា ការព្យាបាលនេះ គឺមិនមែនបានន័យថា អ្នកមានបញ្ហា ឬ កំពុងស្ថិតក្នុងវិបត្តិនោះទេ។ វាអាចជាវិធីមួយដ៏ ប្រសើរ ដែលអាចនាំអោយអ្នក ឈានទៅរកជីវិតថ្មីមួយដែលប្រសើរជាងនេះ ជាមួយនឹងនរណាម្នាក់ ដែលនឹងមិនជាប់ពាក់ព័ន្ធនឹងអ្នក តែវាជាខ្លួនអ្នកផ្ទាល់។
៣. រៀនស្រលាញ់ខ្លួនឯង
វាអាចស្តាប់ទៅហាក់ដូចជា ងាយស្រួល ប៉ុន្តែការពិត មានមនុស្សជាច្រើន មានអារម្មណ៍ថា មិនពេញចិត្តចំពោះខ្លួនឯង បន្ទាប់ពីពួកគេបានធ្វើការលែងលះ ។
អ្នកអាចនឹងគិតថា ប្រហែលជាខ្លួនអ្នក មានបញ្ហាឆ្គាំឆ្គងត្រង់ផ្នែកណាមួយ ទើបបានជាអ្នកមិនអាច ថែរក្សាទំនាក់ទំនងនេះ អោយគង់វង្សបាន។ អ្នកត្រូវមានទំនុកចិត្ត និង ជឿជាក់លើខ្លួនឯង ព្រម ទាំងមានសម្ថភាព ក្នុងការផ្តល់តម្លៃដល់ខ្លួនអ្នក។ នេះគឺជាវិធី ដែលអ្នកអាចអនុវត្ត បន្តនៅក្នុងវិធី ព្យាបាលរបស់អ្នក ។
៤. ស្វែងរកសារជាថ្មី ថាអ្នកធ្លាប់ជានរណា
ជាពិសេស ប្រសិនបើអ្នកបានរៀបការអស់រយៈពេលជាច្រើនឆ្នាំមកហើយ អ្នកប្រហែលជាបានបោះចោលនូវសកម្មភាពជាច្រើន ដែលអ្នកធ្លាប់មានភាពរីករាយជាមួយពួកវា នៅពេលដែលអ្នកនៅលីវ ដោយសារតែវា មិនមានភាពសាកសម សម្រាប់ជីវិតជាគូរបស់អ្នក។
ប្រហែលជាអ្នក ចូលចិត្តចេញទៅដើរលេងនៅខាងក្រៅ ប៉ុន្តែដៃគូរបស់អ្នក គឺចូលចិត្តនៅតែក្នុងផ្ទះ ។ ប្រហែលជាអ្នក តែងតែចូលចិត្ត ចេញទៅមើលកុន តែស្វាមីអ្នក មិនចូលចិត្តវា។ អ្នកអាចគិតឡើងវិញ នឹង រំលឹកនូវអ្វីដែលអ្នកធ្លាប់មានភាពរីករាយជាមួយនឹងពួកវា រួចធ្វើការសួរខ្លួនឯងនូវ សំណួរទាំងនេះ ៖ តើអ្វីជាចំណង់ចំណូលចិត្ត និង សកម្មភាពដែលអ្នកចូលចិត្តធ្វើជាងគេ មុនពេលអ្នករៀបការ? តើអ្វីខ្លះ ដែលអ្នកបានដកខ្លួនចេញពីពួកវា នៅពេលអ្នកមានដៃគូ? ការចាប់ផ្តើមអនុវត្ត និង រំលឹកនូវរឿងរ៉ាវ ដែលធ្វើអោយអ្នកចាប់អារម្មណ៍ សារជាថ្មីឡើងវិញគឺជាវិធីមួយ ដ៏សំខាន់ក្នុងការ កសាងខ្លួន អ្នកសារជាថ្មី ។
៥. ស្វែងរកផ្នែកថ្មីមួយ នៃជីវិតរបស់អ្នក
ការផ្លាស់ប្តូរជីវភាព ក្នុងអំឡុងពេល នៃការលែងលះ បើទោះជាវា ជារឿយៗ មានភាពលំបាក និង មិនត្រូវបានទទួលការស្វាគមន៍ អ្នកត្រូវចាំថា ថ្ងៃណាមួយអ្វីៗនឹងប្រែក្លាយជាល្អ នោះអ្នកត្រូវធ្វើការផ្លាស់ ប្តូរ និង សាកល្បងនូវរបៀបរស់នៅ ក្នុងបែបផែនថ្មីមួយ ។ ប្រហែលជាវា អាចដូចជាការសាកល្បង ក្នុងការលេងកីឡាប្រភេទថ្មីមួយ ឬ អ្នកអាចពិចារណាពី កន្លែងផ្សេងណាមួយដែលអ្នកអាចទៅធ្វើការ គោរពបូជា ឬ ក៏អ្នកអាច ចាប់ផ្តើមចូលរៀននូវមុខវិជ្ជា ជំនាញអ្វីមួយថ្មីដែលអ្នកចូលចិត្ត។ វាក៏ប្រហែលជា អ្នកអាចនឹងចង់ ផ្លាស់ប្តូរទីកន្លែងទៅរស់នៅ ក្នុងទីក្រុងថ្មីមួយ ឬ ចំណាយពេលមួយឆ្នាំរស់នៅខាងក្រៅ ប្រទេស ។ នេះសុទ្ធតែ ជាសកម្មភាពថ្មីៗ ដែលអ្នកអាចចាប់ផ្តើម សាកល្បងធ្វើនៅក្នុង ដំណើរជីវិតថ្មី របស់អ្នក។
ពិតណាស់ អ្នកមិនអាច ហោះចេញពីបញ្ហានេះ បានភ្លាមៗនោះទេ។ វាអាចដោយសារតែ អ្នកមាន កាតព្វកិច្ចផ្សេងៗជាច្រើនទៀត ដែលអ្នកត្រូវបំពេញជារៀងរាល់ថ្ងៃ ដូចជា៖ ទំនួលខុសត្រូវចំពោះកូន (នេះប្រសិនបើអ្នកបាន ក្លាយខ្លួនជាឳពុក ឬ ម្តាយគេនោះ ), ការទទួលខុសត្រូវចំពោះការងារ និង អាចជា បញ្ហាថវិកាប្រចាំគ្រួសារ ដែលពួកវាអាចនឹង ត្រូវបានធ្វើអោយអ្នកឈឺចាប់ ដោយការលែងលះនេះ ។
ប៉ុន្តែឱកាសនោះគឺថា ទោះជាអ្នកមិនអាចធ្វើបាននូវអ្វី ដែលអ្នកចង់ធ្វើនោះក៏ដោយ ក៏អ្នកអាចនឹងមាន ការផ្លាស់ប្តូរផ្សេងទៀត ដែលអាចនឹងកើតមានចំពោះអ្នក នៅពេលដែលអ្នកព្យាយាមស្វែងរកពួកវា។ ដូច្នេះ អ្នកមិនត្រូវមានការបដិសេធ ចំពោះពាក្យថាកែប្រែនោះទេ ដោយគ្រាន់តែអ្នកមិនអាចធ្វើការផ្លាស់ ប្តូរបានទាំងស្រុងនោះ ។
ដរាបណា ការកែប្រែទាំងនោះ ផ្តល់ផលល្អចំពោះសុខភាព និង ធ្វើអោយផ្លូវចិត្តអ្នករឹងមាំ នោះពួកវា សុទ្ធតែសាកសមសម្រាប់អ្នក។ ត្រូវគិតថា តើអ្នកចង់កា្លយជានរណា វាអាចជាមនុស្សដែលអ្នកចង់ធ្វើ មុនពេលអ្នករៀបការ ឬ ក៏ ក្លាយជាមនុស្សថ្មីម្នាក់ផ្សេងទៀត ? តើមានកត្តាអ្វីខ្លះ ដែលអ្នកអាចធ្វើបាន ដើម្បី ទទួលបាននូវការផ្លាស់ប្តូរទាំងនេះ ?
ស្វែងរកនូវរាល់ការផ្លាស់ប្តូរណា ដែលអ្នកអាចធ្វើបាន ជំនួសអោយ ការរស់នៅជាមួយនឹងអារម្មណ៍ ចង់បាននូវរបស់ ដែលអ្នកមិនអាចយកបាន។
៦. ហ៊ាន ក្នុងការរស់នៅម្នាក់ឯង
ការរស់នៅម្នាក់ឯង មិនមែនបានន័យថា អ្នកត្រូវរស់នៅដាច់សង្វែង និង មិនដែលឃើញនរណាម្នាក់ នោះទេ។ វាគ្រាន់តែបានន័យថា អ្នកមិនមែនរស់នៅក្នុងជីវិតគូទៀតទេ ។ សង្គមត្រូវបាន ទទួលស្គាល់ នូវស្ថានភាពបែបនេះ ។ មានមនុស្សច្រើនជាង ៣០លាននាក់ ដែលបានរស់នៅដោយ ម្នាក់ឯង នៅក្នុងសង្គមនាពេលបច្ចុប្បន្ននេះ ។ វាពិតជាមនុស្សច្រើនណាស់ ហើយវាក៏អាចមាននូវ ឱកាស ជាច្រើន ក្នុងការបង្កើតទំនាក់ទំនងនៅក្នុងសង្គមផងដែរ។ វាអាចនឹងទៅរួច សម្រាប់អ្នក ក្នុងការជ្រើសរើស មិត្តថ្មី និង ចូលខ្លួនទៅក្នុងប្រភេទក្រុមមនុស្សផ្សេងមួយទៀត ដែលអាចត្រូវ នឹង ចំណាប់អារម្មណ៍របស់អ្នក។ ទំនាក់ទំនងនៅក្នុងសង្គម បន្ទាប់ពីការលែងលះ អាចនឹងមានភាពសំបូរបែប ជាងមុន។
៧. អ្នកអាចធ្វើការពិចារណ ពីការផ្សារភ្ជាប់ទំនាក់ទំនងជាថ្មី
វាមិនមែនជាការ ចាប់ផ្តើមឡើងវិញនោះទេ។ ប៉ុន្តែវាជាការ ពិចារណាពីការ ណាត់ជួបជាមួយនឹង មនុស្សម្នាក់ថ្មីទៀត ( នៅពេលណាមួយដែលអ្នកបានត្រៀមខ្លួនរួចរាល់) ដែលស្ថិតនៅប្រភពខាងក្រៅពី អ្នក ដោយមិនចាំបាច់គិតថា វានឹងអាចបន្តទៅទំនាក់ទំនងជាក់លាក់មួយ បានឬក៏អត់នោះទេ។
ឧទាហរណ៍ អ្នកប្រហែលជាធ្លាប់តែបានជួបជាមួយ នឹងក្រុមមនុស្សដែលមានប្រវតិ្តវិជ្ជាវីវៈ ស្រដៀងនឹងអ្នក ឬ ក៏ប្រហែលជាអ្នកតែងតែបានជួបជាមួយនឹង ក្រុមមនុស្សដែលស្ងប់ស្ងាត់ ឬ អៀនប្រៀនដូចជាអ្នក។ ធ្វើការកែប្រែនូវ ទំលាប់ជាធម្មតារបស់អ្នក ចេញមកក្រៅ ដោយចាប់ផ្តើម ធ្វើការ ណាត់ជួបជាមួយនឹង ក្រុមមនុស្សដែលមានភាពខុសប្លែកគ្នាពីអ្នក។
៨. ទទួលយក ទំនួលខុសត្រូវថ្មីរបស់អ្នក
ជាពិសេស ប្រសិនបើអ្នក ធ្លាប់រស់នៅក្នុងជីវិតគូ ក្នុងរយៈពេលជាច្រើនឆ្នាំ នោះប្រហែលជាដៃគូអ្នក បានគ្រប់គ្រងផ្នែកជាក់លាក់ណាមួយ នៅក្នុងជីវិតប្រចាំថ្ងៃរបស់អ្នក ខណៈពេលដែលអ្នកធ្វើការទទួលខុសត្រូវលើផ្នែកផ្សេងទៀតនោះ ។ ហើយនាពេលឥលូវនេះ គឺអ្នកត្រូវធ្វើវាទាំងអស់ តែម្នាក់ឯង ។ រួចវា អាចនឹងមើលទៅហាក់ដូចជាមានភាពមិនល្អប្រសើរ ប៉ុន្តែវា មិនអីនោះទេ។
ប្រសិនបើដៃគូអ្នក ធ្លាប់តែជាអ្នកស្វែងរកថវិកាសម្រាប់គ្រួសារ, គ្រប់គ្រងវា ឬ ក៏បណ្តាក់ទុនវា ហើយ ភ្លាមៗនេះ ស្រាប់តែអ្នកត្រូវ រៀន និង ទទួលខុសត្រូវលើវាទាំងអស់តែម្នាក់ឯង។ តែការប្រឈមមុខនឹង បញ្ហាលំបាកទាំងនេះ អាចនឹងជួយផ្តល់ខ្លួនអ្នក នូវភាពជឿជាក់ចំពោះសម្ថភាពខ្លួនឯង។
អ្នកមិនចាំបាច់ ព្យាយាមប្រឹងប្រែងប្រឈមនឹង ពួកវាតែម្នាក់ឯងនោះទេ តែអ្នកអាចស្វែងរកជំនួយពី មនុស្សនៅជុំវិញខ្លួនអ្នក ៕
ត្រួតពិនិត្យដោយ www.health.com.kh
© រក្សាសិទ្ធិដោយ thmeythmey.com