អន្តរជាតិ
បារាំងសន្យាផ្ដល់លុយ១ពាន់លានដុល្លារឲ្យហ្សកដានី ដោះស្រាយបញ្ហាជនភៀសខ្លួន
× ប្រធានាធិបតីបារាំងលោក ហ្វ្រង់ស្វ័រ ហូឡង់ (Francois Hollande) ប្រកាសសន្យាផ្ដល់ជំនួយមានតម្លៃទឹកប្រាក់១ពាន់លានដុល្លារទៅឲ្យហ្សកដានី សម្រាប់ដោះស្រាយវិបត្តិជនភៀសខ្លួនដែលហូរចូលពីស៊ីរី។ ការសន្យាផ្ដល់ប្រាក់នេះ គឺចំពេលជនភៀសខ្លួនស៊ីរីបន្តរត់ចូលទឹកដីហ្សកដានីមិនឈប់ឈរ ខណៈដែលការចរចាសន្តិភាពនៅទីក្រុងហ្សឺណែវជាប់គាំងដោយសារក្រុមប្រឆាំងស្នើផ្អាកនៅថ្ងៃទី១៨ ខែមេសា។
សូមស្ដាប់ព័ត៌មានលម្អិត៖
ក្នុងដំណើរទៅកាន់ហ្សកដានី មេដឹកនាំបារាំងលោក ហ្វ្រង់ស្វ័រ ហូឡង់ សន្យាផ្ដល់ជំនួយមួយពាន់លានដុល្លារក្នុងរយៈពេលបីឆ្នាំទៅឲ្យប្រទេសនេះ ដើម្បីដោះស្រាយបញ្ហាជនភៀសខ្លួនដែលនៅតែមិនស្រាកស្រាន្ត។ លោក ហូឡង់ ក៏ប្រកាសផ្ដល់ការគាំទ្របន្ថែមទៀតដល់រដ្ឋាភិបាលហ្សកដានី ដែលបានទទួលជនភៀសខ្លួនពីជម្លោះស៊ីរីដែលមានអាយុ៥ឆ្នាំមកហើយនោះ។
នៅហ្សកដានី ប្រធានាធិបតី ហូឡង់ បានជួបជាមួយព្រះចៅអាប់ឌុលឡាហ៍ទី២ នៅថ្ងៃទី១៩ ខែមេសា ដោយលោកបានលើកពីការព្រួយបារម្ភចំពោះការពន្យារពេលចរចាដែលស្នើដោយក្រុមប្រឆាំងស៊ីរី។ លោកនិយាយថា លោកព្រួយបទឈប់បាញ់ដែលសំដៅដល់ការកាត់បន្ថយការវាយប្រយុទ្ធគ្នា នឹងមិនបានយូរនោះទេ។ ក្រោយជំនួបនោះលោក ហូឡង់ បន្ថែមថា ប្រសិនបើបទឈប់បាញ់បរាជ័យ ការវាយប្រយុទ្ធនឹងចាប់ផ្ដើមឡើងវិញ ហើយវានឹងគ្មានក្ដីសង្ឃឹមអ្វីទេ។
ប្រធានាធិបតីបារាំងដែលទើបធ្វើដំណើរមកពីអេហ្ស៊ីបបញ្ជាក់ទៀតថា អ្វីដែលកើតឡើងនៅទីក្រុងហ្សឺណវ ពិតជាពាក់ព័ន្ធខ្លាំងដល់ហ្សកដានី ហើយការផ្អាកការចរចាពិតជារឿងគួរឲ្យបារម្ភ។ គេត្រូវធ្វើគ្រប់យ៉ាងដើម្បីឲ្យច្បាស់ថា បទឈបបាញ់នៅតែត្រូវបានអនុវត្ត។
ជាមួយគ្នានេះ លោក ហូឡង់ ក៏បានលើកឡើងពីលំហូរជនភៀសខ្លួនស៊ីរីដែលរត់មកពីទីក្រុង Palmyra ក្រោយទាហានរដ្ឋាភិបាលស៊ីរីដណ្ដើមកាន់កាប់ទីក្រុងបុរាណនេះមកវិញ។ លោកបញ្ជាក់ថា យើងត្រូវគាំទ្រជនភៀសខ្លួន តែក៏ត្រូវប្រាកដថា មិនមានភេរវជនមកតាមពួកគេនោះទេ។ យ៉ាងណាក្ដី បើតាមសារព័ត៌មានFrance24 អាជ្ញាធរហ្សកដានីនឹងបន្តឹងការត្រួតពិនិត្យលើជនភៀសខ្លួនទាំងនោះ ដើម្បីរារាំងការជ្រៀតចូលពីសំណាក់ក្រុមជ្រុលនិយម។
សូមរម្លឹកថា ជនភៀសខ្លួនស៊ីរីច្រើនជាង៦សែននាក់កំពុងតែស្នាក់នៅទឹកដីហ្សកដានី ខណៈរាប់លាននាក់ទៀតរត់គេចទៅប្រទេសដទៃទៀត។ ហ្សកដានីដែលចូលរួមក្នុងសម្ព័ន្ធភាពដែលដឹកនាំអាមេរិក កំពុងតែស្វះស្វែងដោះស្រាយលំហូរជនភៀសខ្លួនដែលហូរចូលមិនឈប់។ ថ្មីៗនេះទៀតសោត ជនភៀសខ្លួនរាប់ពាន់នាក់ទៀត ក៏បន្តរត់ចូលហ្សកដានី នៅពេលដែលមានការប្រយុទ្ធគ្នាយ៉ាងស្រួចស្រាល់រវាងកម្លាំងរដ្ឋាភិបាលនិងក្រុមឧទ្ទាមនៅសមរភូមិPalmyra។
លើសពីនេះទៅទៀត ក្រៅពីដើរតួនាទីទទួលយកជនភៀសខ្លួន ហ្សកដានីក៏ជាតួអង្គយ៉ាងសំខាន់ក្នុងការប្រយុទ្ធប្រឆាំងនឹងក្រុមជ្រុលនិយមរដ្ឋឥស្លាមដែលកំពុងអុកឡុកនៅស៊ីរីនិងអ៊ីរ៉ាក់។ ទាក់ទិននឹងបញ្ហានេះ គេអាចយល់បានថា ដំណើរទស្សនកិច្ចរបស់លោក ហូឡង់ គឺបង្ហាញពីការគាំទ្រចំពោះហ្សកដានី ដែលខិតខំខ្លាំងក្នុងយុទ្ធនាការកម្ទេចក្រុមជ្រុលនិយមរដ្ឋឥស្លាម៕
Tag:
បារាំង
ហ្សកដានី
ជនភៀសខ្លួន
© រក្សាសិទ្ធិដោយ thmeythmey.com