ក្រសួងអប់រំ អំពាវនាវសប្បុរសជនឲ្យជួយឧបត្ថម្ភរង្វាន់បន្ថែមដល់សិស្សពូកែ

ជាតិ

ក្រសួងអប់រំ អំពាវនាវសប្បុរសជនឲ្យជួយឧបត្ថម្ភរង្វាន់បន្ថែមដល់សិស្សពូកែ

20, Apr 2016 , 9:59 pm

រូបភាព

ដោយ: ញឹក ស្រីល័ក្ខ (Nhek Sreyleak)

ភ្នំពេញ៖ក្រសួងអប់រំ យុវជន និងកីឡា បានអំពាវនាវសប្បុរសជន ទាំងក្នុង និងក្រៅប្រទេស ឲ្យជួយឧបត្ថម្ភជាថវិកា និងសម្ភារ សម្រាប់ជារង្វាន់បន្ថែម ដើម្បីលើកទឹកចិត្តដល់ជ័យលាភីសិស្សពូកែទូទាំងប្រទេស ផ្នែកអក្សរសាស្ត្រខ្មែរ គណិតវិទ្យា និងរូបវិទ្យា សម្រាប់ថ្នាក់ទី៩ និងថ្នាក់ទី១២ ក្នុងឆ្នាំ ២០១៦នេះ។

បើយោងតាមអនុក្រឹត្យលេខ ០៦ អនក្រ-បក ចុះថ្ងៃទី ១៥ ខែ កុម្ភះ ឆ្នាំ២០០០ ស្តីពីការរៀបចំថ្នាក់សិស្សពូកែ ផ្នែកអក្សរសាស្ត្រខ្មែរ គណិតវិទ្យា និងរូបវិទ្យា របស់រាជរដ្ឋាភិបាលកម្ពុជា ក្រសួងអប់រំបានរៀបចំការប្រឡងជ្រើសរើសសិស្សពូកែទូទាំងប្រទេស ផ្នែកអក្សរសាស្ត្រខ្មែរ គណិតវិទ្យា និងរូបវិទ្យា សម្រាប់ថ្នាក់ទី៩ និងថ្នាក់ទី១២ ជារៀងរាល់ឆ្នាំ ដើម្បីលើកកម្ពស់គុណភាពវិស័យអប់រំ សំដៅអភិវឌ្ឍធនធានមនុស្សប្រកបដោយសីលធម៌ និងចំណេះដឹងខ្ពស់។

បើតាមសេចក្តីប្រកាសព័ត៌មានក្រសួង ក្រសួងអប់រំនឹងរៀបចំការប្រឡងជ្រើសរើសសិស្សពូកែទូទាំងប្រទេស នៅថ្ងៃទី ២៥ ខែមេសា នៅវិទ្យាល័យ ១០ មករា ១៩៧៩ ខេត្តសៀមរាប។

ក្រសួងអប់រំ យុវជន និងកីឡា សង្ឃឹមថា សប្បុរសជនទាំងក្នុង និងក្រៅប្រទេស នឹងជួយជ្រោមជ្រែង ឧបត្ថម្ភជាថវិកា ជាសម្ភារ តាមសេចក្ដីអំពាវនាវនេះជាពុំខាន។

គួរបញ្ជាក់ថា ក្រសួងអប់រំបានរៀបចំការប្រឡងជ្រើសរើសសិស្សពូកែទូទាំងប្រទេស តាំងពីឆ្នាំ២០០០មក ក្នុងគោលបំណងលើកកម្ពស់គុណភាពអប់រំ អភិវឌ្ឍធនធានមនុស្សប្រកបដោយសីលធម៌ ដើម្បីឲ្យសិស្សានុសិស្សមានការខិតខំប្រឹងប្រែងសិក្សារៀនសូត្រ អាចឈានទៅដល់ការប្រកួតប្រជែងសមត្ថភាពថែមទៀត៕