អន្តរជាតិ
រុស្ស៊ី គាំទ្រជំហរចិនលើការដោះស្រាយជម្លោះសមុទ្រចិនខាងត្បូង«ដោយចរចាដោយផ្ទាល់» រូបភាព៖ Sputnik
× មកទល់ពេលនេះ មិនទាន់មានយន្តការដ៏មានប្រសិទ្ធភាពណាមួយត្រូវបានយកមកប្រើប្រាស់ដើម្បីដោះស្រាយលើជម្លោះសមុទ្រចិនខាងត្បូងនោះទេ។ ភាគីខ្លះចង់ឲ្យដោះស្រាយរួមគ្នា ខណៈ ខ្លះទៀតចង់ឲ្យដោះស្រាយដោយផ្ទាល់រវាងភាគីជម្លោះ។ ជាមួយគ្នានេះ រុស្ស៊ីដែលជាមហាអំណាចមួយដែរនោះ ក៏ស្នើភាគីនៃជម្លោះ គួរដោះស្រាយដោយផ្ទាល់ និងប្រឆាំងចំពោះការប្រែក្លាយបញ្ហាឲ្យកាន់តែធំក្នុងឆាក អន្តរជាតិនោះ។
រដ្ឋមន្ត្រីការបរទេសរុស្ស៊ីលោក Sergey Lavrov នៅថ្ងៃទី១៨ខែមេសា បានថ្លែងចំពោះមុខសមភាគី លោក គឺលោក Wang Yi ថា ក្រុងមូស្គូគាំទ្រចំពោះការដោះស្រាយជម្លោះសមុទ្រចិនខាងត្បូងតាមរយៈការចរចាដោយផ្ទាល់រវាងភាគីជម្លោះ។ ការអះអាងនេះ ធ្វើឡើងក្នុងដំណើរទស្សនកិច្ចលោក Wang Yi ក្នុងក្រុងមូស្គូដើម្បីចូលរួមកិច្ចប្រជុំរដ្ឋមន្ត្រីការបរទេសលើក១៤រវាងចិន ឥណ្ឌា និងរុស្ស៊ី។
ក្នុងជំនួបនោះដែរ លោក Wang ក៏បានប្រាប់លោក Lavrov ដែរថា ការបដិសេធនូវមជ្ឈត្តការដែលស្នើដោយហ្វីលីពីនជាឯកតោភាគីរបស់ចិនលើបញ្ហាសមុទ្រចិនខាងត្បូងគឺជាគោលជំហរមួយដើម្បីការពារកិត្យានុភាព និងអំណាចនៃច្បាប់។ នេះបើយោងតាមសារព័ត៌មានចិន People’s Daily ដែលបានដកស្រង់ចេញពីព័ត៌មានក្នុងស្រុករុស្សីដែលបានបន្ថែមដែរថា លោក Wang ក៏បានសង្កត់ធ្ងន់ដែរថាទាំងចិន និងរុស្ស៊ី គួររក្សានូវការត្រៀមលក្ខណៈប្រឆាំងនឹងឥរិយាបថនៃការបំពានលើយន្តការនៃការចាប់បង្ខំរបស់មជ្ឈត្តការនោះ។
សូមបញ្ជាក់ផងដែរថា ជម្លោះសមុទ្រចិនខាងត្បូង គឺជាជម្លោះអធិបតេយ្យដែលមានរដ្ឋពាក់ព័ន្ធរួមមាន ព្រុយណេ ម៉ាឡេស៊ី ហ្វីលីពីន វៀតណាម និងចិន។ កន្លងមកចិន ដែលជាភាគីតែមួយដែលបានទាមទារស្ទើរតែតំបន់ទាំងស្រុងនៃតំបន់ជម្លោះ បានស្នើថាជម្លោះនេះ អាចដោះស្រាយទៅបានតាមរយៈ ការចរចាដោយផ្ទាល់រវាងភាគីជម្លោះតែប៉ុណ្ណោះ ខណៈរដ្ឋពាក់ព័ន្ធផ្សេងទៀតស្នើឲ្យដោះស្រាយដោយមានការចូលរួមពីរដ្ឋពាក់ព័ន្ធទាំងអស់ជាពិសេសនោះ គឺមានការចូលរួមពីសមាជិកអាស៊ានទាំងអស់ជាមួយនឹងចិន។
មួយវិញទៀតនោះ ការលើកឡើងរបស់ចិន និងរុស្ស៊ី ក៏ស្របជាមួយនឹងការជិតមកដល់នៃការប្រកាស មជ្ឈត្តវិនិច្ឆ័យរបស់មជ្ឈត្តការអន្តរជាតិក្រុងឡាអេ នៃប្រទេសហូឡង់ដែលគ្រោងនឹងប្រកាសនៅខែឧសភា ឬមិថុនាខាងមុខ។ មជ្ឈត្តការអន្តរជាតិលើបញ្ហាសមុទ្រចិនខាងត្បូង ត្រូវបានធ្វើឡើងក្រោមបណ្តឹងរបស់ហ្វីលីពីនដែលចាប់ផ្តើមតាំងពីឆ្នាំ២០១៣ ដោយបានចោទចិន ថាបានបំពានលើអធិប តេយ្យរបស់ខ្លួននៅក្នុងតំបន់ត្រួតស៊ីគ្នានៃសមុទ្រចិនខាងត្បូង។ មជ្ឈត្តការដែលចិនបានបដិសេធ មិនចូលរួមនេះដែរ ក៏ទទួលបានការគាំទ្រ ពីសំណាក់ប្រទេសលោកខាងលិចផងដែរ ជាពិសេសនោះ សហរដ្ឋអាមេរិកតែម្តង៕
Tag:
រុស្ស៊ី
សមុទ្រចិនខាងត្បូង
© រក្សាសិទ្ធិដោយ thmeythmey.com