អាមេរិក និងសម្ព័ន្ធមិត្តឈូងសមុទ្រពែក្សឯកភាពគ្នារាំងខ្ទប់ការរត់ពន្ធអាវុធរបស់អ៊ីរ៉ង់

អន្តរជាតិ

អាមេរិក និងសម្ព័ន្ធមិត្តឈូងសមុទ្រពែក្សឯកភាពគ្នារាំងខ្ទប់ការរត់ពន្ធអាវុធរបស់អ៊ីរ៉ង់

21, Apr 2016 , 3:35 pm

រូបភាព

ដោយ: តន ចាន់រិទ្ធារ៉ា

សហរដ្ឋអាមេរិក និងបណ្ដាសម្ព័ន្ធមិត្តអារ៉ាប់របស់ខ្លួន បានព្រមព្រៀងគ្នាលើការពង្រាយកងល្បាតដែនសមុទ្រដើម្បីទប់ស្កាត់ការរត់ពន្ធអាវុធពីអ៊ីរ៉ង់ទៅកាន់យេម៉ែន ដែលកំពុងវាយប្រយុទ្ធគ្នានៅឡើយ។ ភាគីទាំងពីរសម្រេចដូចនេះ ក្នុងជំនួបរវាងរដ្ឋមន្ត្រីការពារជាតិអាមេរិកលោក Ash Carter និងសមភាគីមកពីប្រទេសសមាជិកក្រុមប្រឹក្សាឈូងសមុទ្រនៅទីក្រុងរីយ៉ាដ។

សូមស្ដាប់ព័ត៌មានលម្អិត៖

ប្រទេសឈូងសមុទ្រពែក្ស និងសហរដ្ឋអាមេរិកបានយល់ព្រមអនុវត្តការល្បាតសមុទ្ររួមគ្នា ក្នុងគោលបំណងរារាំងការដឹកជញ្ជូនអាវុធតាមនាវាពីអ៊ីរ៉ង់ទៅកាន់យេម៉ែន។ អគ្គលេខាធិការនៃក្រុមប្រឹក្សាប្រទេសឈូងសមុទ្រ Abdullatif al-Zayani និយាយថា ទាំងសមាជិកខ្លួននិងអាមេរិកនឹងចូលរួមការល្បាតដែលសំដៅបញ្ឈប់ការរត់ពន្ធអាវុធទាំងនោះ។

ការសម្រេចនេះ កើតឡើងនៅពេលរដ្ឋមន្ត្រីការពារអាមេរិកលោក Ash Carter ដែលអមដំណើរលោកប្រធានាធិបតី បារ៉ាក់ អូបាម៉ា ទៅកាន់អារ៉ាប៊ី សាអូឌីត បានជួបពិភាក្សាបញ្ហានេះជាមួយសមភាគីរបស់លោកដែលជាសមាជិកក្រុមប្រឹក្សាប្រទេសឈូងសមុទ្រ។ ក្នុងជំនួបនៅទីក្រុងរីយ៉ាដនៅថ្ងៃទី២០ ខែមេសា អាមេរិកនិងសម្ព័ន្ធមិត្តរបស់ខ្លួនក៏បានព្រមព្រៀងលើកិច្ចសហប្រតិបត្តិការរួមគ្នាលើការពង្រឹងការការពារមីស៊ីលនិងកងកម្លាំងពិសេស ក៏ដូចជាសន្តិសុខលើដែនសមុទ្រផងដែរ។

គេអាចយល់បានថា ការសហការគ្នារវាងអាមេរិកនិងរដ្ឋឈូងសមុទ្រដើម្បីត្រួតពិនិត្យសមុទ្រ ជាសញ្ញាបង្ហាញពីការយកចិត្តរបស់អាមេរិកចំពោះសម្ព័ន្ធមិត្តរបស់ខ្លួន។ នេះក៏ដោយសារកន្លងមក រដ្ឋបាលលោក អូបាម៉ា ហាក់ធ្វើព្រងើយនឹងសម្ព័ន្ធមិត្ត ហើយបែរជាងាកទៅជិតស្និទ្ធជាមួយអ៊ីរ៉ង់ក្នុងសំណុំរឿងកិច្ចព្រមព្រៀងនុយក្លេអ៊ែរ។

រដ្ឋសមាជិកក្រុមប្រឹក្សាឈូងសមុទ្រ ជាពិសេសអារ៉ាប៊ីសាអូឌីត មានមន្ទិលសង្ស័យលើរបបដឹកនាំក្រុងវ៉ាស៊ីនតោនដែលបន្ទន់ជំហរដាក់អ៊ីរ៉ង់ដែលជាសត្រូវស៊ីសាច់ហុតឈាមរបស់ខ្លួន ដោយព្រមបង្កើតឲ្យមានកិច្ចព្រមព្រៀងនុយក្លេអ៊ែរផង។ ពួកគេបារម្ភពីសុវត្ថិភាពនិងសន្តិសុខជាតិនៅពេលអ៊ីរ៉ង់រួចផុតពីទណ្ឌកម្មអន្តរជាតិ ហើយភ័យខ្លាចថាថ្ងៃណាមួយអ៊ីរ៉ង់នឹងឈានទៅផលិតអាវុធនុយក្លេអ៊ែរផងនោះ។

សូមបញ្ជាក់ថា មួយរយៈពេលចុងក្រោយនេះ ទំនាក់ទំនងរវាងអាមេរិក និងសម្ព័ន្ធមិត្តអារ៉ាប់ មិនសូវជាស៊ីចង្វាក់គ្នាទេ។ លោកប្រធានាធិបតី អូបាម៉ា ធ្លាប់ប្រើពាក្យធ្ងន់រិះគន់សម្ព័ន្ធមិត្តនៅមជ្ឈិមបូព៌ាដែលមិនជួយចូកជួយចែវ បែរទុកឲ្យអាមេរិករងបន្ទុកធ្ងន់ម្នាក់ឯងដូចជា ក្នុងអន្តរាគមន៍យោធានៅលីប៊ីជាដើម។ លើសពីនេះទៅទៀត លោក អូបាម៉ា ក៏បានប្រាប់ អារ៉ាប៊ី សាអូឌីតគួរចែក «តំបន់មជ្ឈិមបូព៌ា»ជាមួយរដ្ឋប្រកាន់សាសនាឥស្លាមនិកាយស៊ីអ៊ីត អ៊ីរ៉ង់ផងដែរ។ សម្តីរបស់ប្រធានាធិបតីអាមេរិកនេះ បានបង្កឲ្យក្រុងរីយ៉ាដខឹងសម្បារជាខ្លាំង។

យ៉ាងណាក៏ដោយ គេរំពឹងថា ទស្សនកិច្ចរបស់លោក អូបាម៉ា មកតំបន់នេះ នឹងជួយសម្រួលស្ថានការដែលកំពុងតានតឹង ហើយលោក អូបាម៉ា ទំនងជាយកពេលនេះរកវិធីដោះស្រាយជាមួយសម្ព័ន្ធមិត្តរបស់ខ្លួនមិនខានឡើយ។ នេះក៏ដោយសារតែអាមេរិកមិនអាចអត់រដ្ឋឈូងសមុទ្រនេះបានទេ ក្នុងការពង្រឹងឥទ្ធិពលរបស់ខ្លួននៅតំបន់មជ្ឈិមបូព៌ា៕