អន្តរជាតិ
ចិន អន់ចិត្តខ្លាំង ក្រោយអង់គ្លេសថាខ្លួនជាអ្នកបង្កភាពតានតឹងក្នុងសមុទ្រចិនខាងត្បូង
× ជម្លោះអធិបតេយ្យសមុទ្រចិនខាងត្បូង បាននិងកំពុងតែឡើងកម្តៅកាន់តែខ្លាំង ដ្បិតខណៈអវត្តមាននៃ ដំណោះស្រាយ រដ្ឋទាមទារក្នុងតំបន់ជម្លោះជាពិសេសចិន បាននិងកំពុងតែប្រឹងប្រែងបន្តសកម្មភាពកាន់ តែច្រើន និងសកម្មក្នុងតំបន់នោះ។ ជាមួយគ្នានេះអង់គ្លេសដែលរដ្ឋខាងក្រៅនៃជម្លោះ បានព្រួយបារម្ភ ចំពោះស្ថានភាព និងថែមទាំងដាក់បន្ទុកទៅលើចិនដែលជាដៃគូពាណិជ្ជកម្មមួយរបស់ខ្លួននោះថាជាអ្នកដែលបង្កឲ្យមានភាពតានតឹងដែលការលើកឡើងនេះធ្វើឲ្យចិន អន់ចិត្តជាខ្លាំងជាមួយនឹងអង់គ្លេស។
រដ្ឋាភិបាលក្រុងប៉េកាំង បានស្រងាកចិត្តជាខ្លាំងជាមួយនឹងការលើកឡើងរបស់មន្ត្រីការទូតជាន់ខ្ពស់ អង់គ្លេសលើបញ្ហាសមុទ្រចិនខាងត្បូង និងថែមទាំងចោទអង់គ្លេសថា មិនបានក្រឡេកមើលគ្រប់ជ្រុង ជ្រោយ និងលម្អៀង។ នេះបើយោងតាមសេចក្តីថ្លែងការណ៍របស់អ្នកនាំពាក្យក្រសួងការបរទេសចិនលោកស្រី Hua Chunying នៅថ្ងៃទី២០ ខែមេសា ម្សិលមិញ។
សូមរម្លឹកបន្តិចដែរថា នៅថ្ងៃទី១៨ ខែមេសាកន្លងទៅ រដ្ឋមន្ត្រីការបរទេសអង់គ្លេសលោក Hugo Swire បានថ្លែងថាការកើនឡើងនៃភាពតានតឹងនៅក្នុងសមុទ្រចិនខាងត្បូង បានកើតចេញពីសកម្មភាពវាតទី របស់ចិន។ លោក ថា អង់គ្លេស នឹងឈរនៅខាងអាមេរិកក្នុងការគាំទ្រនូវការដំណើរការនៃមជ្ឈត្តការអន្តរជាតិដែលប្តឹងដោយហ្វីលីពីនពីការបំពានរបស់ចិនក្នុងតំបន់ជម្លោះថាជាប្រភេទសេចក្តីសម្រេចមួយដែលមានលក្ខណៈចាប់បង្ខំភាគីទាំងពីរ(ចិន និងហ្វីលីពីន)ដើម្បីអនុវត្ត។
ឆ្លើយតបនឹងការលើកឡើងនេះលោកស្រី Hua Chunying ថា ការអះអាងរបស់លោក Hugo Swire មិនបានផ្តោតលើអង្គហេតុ និងមានភាពលម្អៀងទាំងស្រុង។ នេះបើយោងតាមសារព័ត៌មាន People’s Daily ដែលដកស្រង់សម្តីរបស់លោកស្រី Hua Chunying ដែលថា នេះ បានបង្ហាញថាអង់គ្លេសមិន បានគោរពទៅនឹងការតាំងចិត្តរបស់ខ្លួនកន្លងមក ថានឹងមិនប្រកាន់ឈរទៅលើបញ្ហាដែលទាក់ទងនឹងជម្លោះអធិបតេយ្យនោះ។ ហើយចិន «ពិតជាអន់ចិត្តយ៉ាងខ្លាំងជាមួយនឹងការលើកឡើងនេះ។
ផ្ទុយពីការអះអាងរបស់លោក Hugo Swire លោកស្រី Hua Chunying បានសង្កត់ធ្ងន់ថា អ្នកដែលបង្ក ហេតុពិតប្រាកដនោះគឺ អាមេរិក និងហ្វីលីពីនដែលបានលួចចាប់គ្នាបង្កើតភាពតានតឹងក្នុងដែនសមុទ្រតាមរយៈសកម្មភាពនាវាល្បាត និងយន្តហោះចម្បាំងជាច្រើនពាន់គ្រឿងដែលគ្រប់គ្នាមើលឃើញថាជារឿងធម្មតា។ យ៉ាងណាក៏ដោយ ទាក់ទិននឹងមជ្ឈត្តការអន្តរជាតិវិញនោះ លោកស្រី មិនបានបញ្ជាក់ច្រើននោះទេ ដ្បិតចិន ធ្លាប់បានិយាយពីរឿងនោះច្រើនដងមកហើយ។ ហើយនោះគឺ ចិន បានលើកឡើងថាការបដិសេធមិនចូលរួមក្នុងមជ្ឈត្តការអន្តរជាតិគឺសិទិ្ធរបស់ចិនដែលបានបញ្ជាក់ នៅក្នុងសេចក្តីថ្លែងការណ៍របស់ចិនឆ្នាំ២០០៦លើអនុសញ្ញាស្តីពីច្បាប់សមុទ្ររួចទៅហើយ។
សូមបញ្ជាក់ផងដែរ ជម្លោះសមុទ្រចិនខាងត្បូង មានរដ្ឋជាប់ពាក់ព័ន្ធដូចជារដ្ឋសមាជិកអាស៊ាន ព្រុយណេ ម៉ាឡេស៊ី ហ្វីលីពីន និងវៀតណាម ជាមួយនឹងចិន៕
Tag:
សមុទ្រចិនខាងត្បូង
មជ្ឈត្តការអន្តរជាតិ
© រក្សាសិទ្ធិដោយ thmeythmey.com