អន្តរជាតិ
យន្តហោះចាស់វស្សា B-52 ចេញកម្ទេចក្រុមជីហាតដែស្ហលើកដំបូង
× យន្តហោះទម្លាក់គ្រាប់ B-52 ដែលក្រុងវ៉ាស៊ីនតោនបញ្ជូនទៅកាន់មជ្ឈិមបូព៌ានោះចាប់ផ្តើមកម្ទេចក្រុមរដ្ឋឥស្លាមលើកដំបូងបំផុតនៅដើមសប្តាហ៍នេះ។ យន្តហោះទម្លាក់គ្រាប់បែកនេះត្រូវបានគេបញ្ជូនចេញពីកាតា ទៅអ៊ីរ៉ាក់នៅដើមខែមេសានេះ ដើម្បីជំនួសតំណែងយន្តហោះទម្លាក់គ្រាប់ B-1 ដែលត្រូវទទួលការជួសជុលនិងអភិវឌ្ឍបន្ថែមទៀតនោះ។
ថ្ងៃពុធទី ២០ មេសា ម្សិលមិញ កងទ័ពអាកាសអាមេរិកបានអះអាងថា យន្តហោះទម្លាក់គ្រាប់បែកស៊េរីចាស់តែខ្លឹម B-52 បានចាប់ផ្តើមបើកការប្រយុទ្ធដោយប្រមាញ់ក្រុមភេរវជនរដ្ឋឥស្លាមឬក្រុមដែស្ហ (Daesh) ជាលើកដំបូងកាលដើមសប្តាហ៍នេះ ។ វាជាប្រតិបត្តិការយោធាលើកដំបូងបំផុតរបស់យន្តហោះ B-52 នៅមជ្ឈិមបូព៌ា រាប់ចាប់តាំងពីឆ្នាំ ១៩៩១ ពេលសង្គ្រាមឈូងសមុទ្រផ្ទុះឡើង។
យោងតាមសារព័ត៌មានយោធាអាមេរិក Military យន្តហោះ B-52 នេះបានហោះហើរចេញពីមូលដ្ឋានយោធាអាមេរិក al-Udeid នៅកាតាទៅកាន់ប្រទេសអ៊ីរ៉ាក់ មុនចេញច្បាំង។ អ្នកនាំពាក្យកងកម្លាំងរួមនៅទីក្រុងបាដាដ លោក Steve Warren បានលើកឡើងថា ៖« នៅថ្ងៃចន្ទ យន្តហោះ B-52 បានចាប់ផ្តើមចេញប្រយុទ្ធលើកដំបូងដោយកម្ទេចទីតាំងស្តុកអាវុធក្រុមដែស្ហនៅក្នុងតំបន់ Qayyarah នៅភាគខាងត្បូងទីក្រុង Mosul»។
តាមពិតទៅយន្តហោះទម្លាក់គ្រាប់បែក B-52 ដែលចេញមុខកម្ចាត់ក្រុមរដ្ឋឥស្លាមឬក្រុមដែស្ហនោះ ត្រូវជំនួសតំណែងយន្តហោះទម្លាក់គ្រាប់បែក B-1 ដែលត្រូវត្រលប់ទៅបន្ទាយនៅអាមេរិកវិញដើម្បីទទួលការថែទាំង និងជួសជុស រួមទាំងការបន្ទាន់សម័យផង។ ដូច្នេះយន្តហោះទម្លាក់គ្រាប់បែក B-52 នឹងត្រូវទទួលខុសត្រូវទម្លាក់គ្រាប់បែកលើទីតាំងសត្រូវតាមការចង្អុលបង្ហាញរបស់កងទ័ព និងគាំទ្រទ័ពថ្មើរជើងរបស់ក្រុមសម្ព័ន្ធមិត្តដែលកំពុងច្បាំងផ្ទាល់ដីផង។
យន្តហោះ B-52 បន្តប្រតិបត្តិការរបស់ខ្លួនដើម្បីកម្ចាត់ក្រុមរដ្ឋឥស្លាម ឬក្រុមដែស្ហនៅថ្ងៃអង្គារ និងថ្ងៃពុធបន្តបន្ទាប់ទៅក្នុងតំបន់ Mosul។
យន្តហោះទម្លាក់គ្រាប់បែក B-52 នេះល្បីល្បាញតាំងពីសម័យសង្គ្រាមត្រជាក់មកម្ល៉េះ ហើយវាបានចូលបម្រើវិស័យោធាដំបូងបំផុតចាប់តាំងពីលោក ប្រធានាធិបតី Eisenhower ស្ថិតនៅក្នុងតំណែង។ យន្តហោះនេះកាន់តែល្បីល្បាញនៅពេលដែលវាចេញទម្លាក់គ្រាប់ប្រឆាំងទ័ពកុម្មុយនីស្តនៅឥណ្ឌូចិនផងដែរ។ ប្រតិបត្តិការចុងក្រោយរបស់យន្តហោះទម្លាក់គ្រាប់ B-52 គឺប្រតិបត្តិការព្យុះសមុទ្រខ្សាច់ដែលធ្វើឡើងដើម្បីប្រឆាំងអ៊ីរ៉ាក់នៅទស្សវត្សរ៍ឆ្នាំ ១៩៩០នោះ។ ហើយបន្តមកយន្តហោះនេះក៏មានចំណែកកម្ទេចក្រុមភេរវជនតាលីបង់ និងក្រុមអាល់កៃដានៅអាហ្វហ្កានីស្ថានផងដែរ៕
© រក្សាសិទ្ធិដោយ thmeythmey.com