បាតុភូត «El Nino» អាចធ្វើឲ្យសេដ្ឋកិច្ចអាស៊ានខាតបង់យ៉ាងតិច១០ពាន់លានដុល្លារ

អន្តរជាតិ

បាតុភូត «El Nino» អាចធ្វើឲ្យសេដ្ឋកិច្ចអាស៊ានខាតបង់យ៉ាងតិច១០ពាន់លានដុល្លារ

22, Apr 2016 , 2:00 pm

រូបភាព

ដោយ: ថ្មីៗ

មកទល់ពេលនេះបាតុភូត El Nino បាននិងកំពុងតែបង្កឲ្យមានគ្រោះរាំងស្ងួតនៅក្នុងប្រទេសសមាជិក អាស៊ាន ។ ប្រទេសមួយចំនូនកំពុងតែប្រឈមនឹងការខ្វះទឹកដើម្បីស្រោចស្រពដំណាំ។ ជុំវិញបញ្ហានេះ សេដ្ឋវិទូ លោក Rajiv Biswas បានអះអាងថា សេដ្ឋកិច្ចអាស៊ាន អាចនឹងខាតបង់ដោយសារបាតុភូតនេះ លើសពី១០ពាន់លានដុល្លារ និងច្រើនជាងនេះ ប្រសិនបើវានៅតែបន្ត។

លោក Rajiv Biswas ប្រធានសេដ្ឋកិច្ច IHS Global Insight ថ្លែងថាផលប៉ះពាល់ដ៏អាក្រក់នៃបាតុភូតអាកាសធាតុ El Nino ត្រូវបានរំពឹងថានឹងបន្តរហូតដល់ត្រីមាសទីពីរ ដែលវានឹងបង្កឲ្យមានការធ្លាក់ចុះនៃផលិតផលដែលរួមមាន អង្ករ ប្រេងដូង និងស្ករផងដែរ។ នេះបើយោងតាមសារព័ត៌មាន The Edge Markets ។

សេដ្ឋវិទូរូបនោះ ក៏បានបន្ថែមដែរថា El Nino បាននិងកំពុងតែបង្កឲ្យមានគ្រោះរាំងស្ងួតដ៏ធ្ងន់ធ្ងរនៅក្នុងតំបន់ដែលរាប់បញ្ចូលទាំងម៉ាឡេស៊ីផងដែរ។ នេះបើយោងតាមប្រភពព័ត៌មានដដែល ដែលបានដកស្រង់សម្តី លោកដែរថា ការធ្លាក់ចុះនៃកម្រិតទឹកនៅក្នុងទំនប់មួយចំនួន អាចនឹងបង្ខំឲ្យរដ្ឋាភិបាលម៉ាឡេស៊ីយកទឹកដែលសម្រាប់ស្រោចស្រពមកជាទឹកដើម្បីប្រើប្រាស់ប្រចាំថ្ងៃវិញ។

លោកថា ទិន្នផលនៃផលិតផលប្រេងដូងម៉ាឡេស៊ីនៅខែមីនាកន្លងទៅ បានធា្លក់ចុះរហូត១៨ភាគរយដែលតួលេខនេះ ទាបជាងឆ្នាំមុនៗ។ មិនខុសពីម៉ាឡេស៊ី សេដ្ឋវិទូរូបនោះ ក៏បានលើកពីការបង្កនៃបាតុភូតនៅក្នុងប្រទេសថៃ ដែលលោក ថា វាក៏នឹងធ្វើឲ្យថៃ ត្រូវធា្លក់ចុះនៃផលិតកសិកម្មស្នូលរបស់ថៃដែលរួមបញ្ចូលទាំងស្ករស និងស្រូវផងដែរនោះ។

សូមបញ្ជាក់ផងដែរថា El Nino គឺជាបាតុភូតមួយដែលបង្កឲ្យមានការឡើងសីតុណ្ហភាពក្តៅខ្លាំង។ ហើយ វាបាននិងកំពុងតែវាយប្រហារទៅលើតំបន់មួយចំនួននៃបណ្តាប្រទេសនៅក្នុងតំបន់អាស៊ានរួមមាន ម៉ាឡេស៊ី មីយ៉ាន់ម៉ា ថៃ និងកម្ពុជាផងដែរ។ ក្នុងនោះបើយោងតាមសារាចរណែនាំរបស់រដ្ឋាភិបាលកម្ពុជា បាតុភូតក្តៅ El Nino នឹងជះឥទ្ធិពលមកលើប្រទេសកម្ពុជារហូតដល់ពាក់កណ្តាលខែកក្កដាឆ្នាំ២០១៦ ទើបមានបាតុភូតត្រជាក់ថ្មី La Nina មកលើប្រទេសកម្ពជាវិញ ហើយភ្លៀងក៏នឹងចាប់ផ្តើមធ្លាក់ជាធម្មតានាពេលនោះវិញផងដែរ ៕