អន្តរជាតិ
រុស្ស៊ីព្រមលក់អាវុធ S-400 ឲ្យទៅមហាយក្សឥណ្ឌា
× ក្រសួងការពារជាតិរុស្ស៊ីបានប្រកាសថា កិច្ចព្រមព្រៀងលក់ប្រព័ន្ធការពារដែនអាកាស S-400 ត្រូវបានព្រាងឡើងរួចរាល់និងបញ្ជូនទៅឲ្យភាគីឥណ្ឌាហើយ។កិច្ចព្រមព្រៀងទំហំ ៦ពាន់លានដុល្លារនេះរង់ចាំតែការចុះហត្ថលេខាពីភាគីទាំងសងខាងនៅប៉ុន្មានសប្តាហ៍ខាងមុខប៉ុណ្ណោះ។
រុស្ស៊ីបានប្រកាសលក់ប្រព័ន្ធមីស៊ីល S-400 ជាផ្លូវការទៅឲ្យឥណ្ឌានៅដើមសប្តាហ៍នេះ។ កិច្ចព្រមព្រៀងលក់សព្វាវុធនេះត្រូវបានព្រាងឡើងហើយ តែវាត្រូវការការចុះហត្ថលេខាពីសំណាក់ភាគីទាំងពីរមុននឹងមានការបញ្ជូនសព្វាវុធនេះទៅឥណ្ឌា។
យោងតាមទីភ្នាក់ងារព័ត៌មានរុស្ស៊ី TASS លោក Vladimir Drozhzhov ប្រធានស្ថាប័នសហប្រតិបត្តិការបច្ចេកទេសយោធាសហព័ន្ធរុស្ស៊ី បញ្ជាក់ថា រុស្ស៊ីបានរៀបចំសេចក្តីព្រាងកិច្ចព្រមព្រៀងអន្តររដ្ឋាភិបាលមួយស្តីពីការផ្គត់ផ្គង់សព្វាវុធ S-400 ទៅឲ្យឥណ្ឌា ហើយកិច្ចព្រមព្រៀងនេះត្រូវបានបញ្ជូនទៅកាន់សមភាគីឥណ្ឌាហើយមុនមានការចុះហត្ថលេខា។ រុស្ស៊ីកំពុងរង់ចាំការឆ្លើយតបពីសំណាក់ឥណ្ឌានៅឡើយ ចំពោះលក្ខខណ្ឌនិងចំណុចដែលមានចែងក្នុងកិច្ចព្រមព្រៀងនេះ។
តាមពិតទៅឥណ្ឌានិងរុស្ស៊ីត្រូវចុះកិច្ចព្រមព្រៀងទិញលក់អាវុធនេះតាំងពីចុងឆ្នាំមុនម្ល៉េះ ក្នុងពេលដែលនាយករដ្ឋមន្ត្រីឥណ្ឌា នារិន្ទ្រា ម៉ូឌី ទៅទស្សនកិច្ចនៅរុស្ស៊ី ប៉ុន្តែដោយសារបញ្ហាតម្លៃ ទើបបានជាពេល ចុះហត្ថលេខាត្រូវបានលើកមកដល់ពេលនេះ។ គេរំពឹងថា ពីរ ឬបីសប្តាហ៍ខាងមុខភាគីនឹងចុះហត្ថលេខាលើកិច្ចព្រមព្រៀងនេះជាផ្លូវការ។ ហើយ ក្រៅពីលក់អាវុធនេះឲ្យឥណ្ឌា នៅចុងឆ្នាំនេះ រដ្ឋាភិបាលក្រុងម៉ូស្គូក៏ត្រៀមបញ្ជូនអាវុធប្រភេទនេះទៅឲ្យក្រុងប៉េកាំងផងដែរ ក្រោយមានការចរចានិងចុះកិច្ចព្រមព្រៀងរួមគ្នាកន្លងមក។
សព្វាវុធការពារដែនអាកាស S-400 នេះ ទាក់ចិត្តឥណ្ឌា ព្រោះដោយសារវាត្រូវបានគេបង្កើតឡើងដោយមានបំពាក់ដោយបច្ចេកវិទ្យាទំនើប អាចបាញ់កម្ទេចរាល់គោលដៅស្ថិតក្នុងរយៈចម្ងាយឆ្ងាយឬជិតបានយ៉ាងមានប្រសិទ្ធភាព។ ក្រៅពីអាចប្រើប្រាស់បានជាអាវុធប្រឆាំងយន្តហោះចម្បាំង វាក៏អាចត្រូវគេប្រើប្រាស់សម្រាប់ចាប់សញ្ញារាល់វត្ថុដែលហោះហើរ និងអាចបាញ់មីស៊ីលបីប្រភេទផ្សេងគ្នាផង។
ទំនាក់ទំនងរវាងឥណ្ឌានិងរុស្ស៊ី មានភាពស្និទ្ធស្នាលខ្លាំងតាំងពីសម័យសង្គ្រាមត្រជាក់ម្ល៉េះ ទាំងផ្នែកនយោបាយ សេដ្ឋកិច្ចជាពិសេសកិច្ចសហប្រតិបត្តិការផ្នែកយោធាតែម្តង។ ថ្វីត្បិតថាឥណ្ឌាប្រកាន់ខ្ជាប់គោលការណ៍មិនចូលបក្សសម្ព័ន្ធក្តី ឥណ្ឌាតែងចរចាទិញាអាវុធយុទ្ធភ័ណ្ឌពីសហភាពសូវៀត និងរុស្ស៊ីជាបន្តបន្ទាប់។ គ្រាន់តែក្នុងឆ្នាំ២០១៤ ឥណ្ឌាបានបញ្ជាទិញ សព្វាវុធនិងបច្ចេកវិទ្យាយោធាស្ថិតក្នុងទំហំទឹកប្រាក់៤.៧ ពាន់លានដុល្លារឯណោះ៕
Tag:
រុស្ស៊ី
S-400
ឥណ្ឌា
© រក្សាសិទ្ធិដោយ thmeythmey.com