មន្ត្រីអាដហុក៥រូប នឹងបង្ហាញខ្លួនតាមការកោះហៅរបស់អង្គភាពប្រឆាំងអំពើពុករលួយ

ជាតិ

មន្ត្រីអាដហុក៥រូប នឹងបង្ហាញខ្លួនតាមការកោះហៅរបស់អង្គភាពប្រឆាំងអំពើពុករលួយ

26, Apr 2016 , 5:06 pm

រូបភាព

ដោយ: ម៉ៅ សុផា

មន្ត្រីជាន់ខ្ពស់ចំនួន៥រូប នៃសមាគមការពារសិទ្ធិមនុស្សអាដហុក ត្រូវបានកោះហៅឲ្យទៅកាន់អង្គភាពប្រឆាំងអំពើពុកលួយ នៅថ្ងៃទី២៧ និងថ្ងៃទី២៨ មេសា ជុំវិញករណី កញ្ញា ខុម ចាន់តារាទី ហៅស្រីមុំ។ ពួកគេ នឹងបង្ហាញខ្លួននៅអង្គភាពប្រឆាំងអំពើពុករលួយ តាមលិខិតកោះហៅនោះ ដើម្បីស្តាប់ចម្លើយ ពាក់ព័ន្ធនឹងការណែនាំ កញ្ញា ខុម ចាន់តារាទី ឲ្យផ្តល់ចម្លើយដល់សមត្ថកិច្ច។

មន្ត្រីទាំង៥ ដែលអង្គភាពប្រឆាំងអំពើពុករលួយកោះហៅ រួមមាន លោក នី សុខា, លោក យី សុខសាន្ត, លោក ណៃ វង់ដា, លោកស្រី ទ្រី ឈួន និងលោកស្រី លឹម មុនី។ ដោយសំអាងលើភាពស្អាតស្អំរបស់ខ្លួន ពួកគេ មិនភ័យខ្លាច ឬរួញរា ក្នុងការអនុវត្តតាមការកោះហៅរបស់អង្គភាពប្រឆាំងអំពើពុករលួយ នោះទេ។ នេះបើតាមការលើកឡើងរបស់លោក ធន់ សារាយ ប្រធានសមាគមអាដហុក ដែលថ្លែងនៅក្នុងសន្និសីទសារព័ត៌មានស្តីពី «ការបង្ហាញការងាររបស់សមាគមអាដហុក ទាក់ទងនឹងករណីកញ្ញា ខុម ចាន់តារាទី» នៅថ្ងៃទី២៦ ខែមេសានេះ។

ប្រធានសមាគមអាដហុករូបនេះ បានបញ្ជាក់ដូច្នេះថា៖«យើងនឹងទៅ។ យើងមិនខ្លាច ឬរារែកអ្វីទេ ព្រោះយើងឥតមានធ្វើអ្វីខុសឆ្គងចំពោះមុខច្បាប់ទេ»។

លោក ធន់ សារាយ សង្កត់ធ្ងន់ថា បើទោះបីជាមន្ត្រីរបស់ខ្លួន ចង់បដិសេធមិនធ្វើតាមវិធានការរបស់អង្គភាពប្រឆាំងអំពើពុករលួយ ក៏មិនអាចទៅរួចដែរ។ «បើយើងមិនទៅលើកទីមួយទេ គាត់នឹងនាំខ្លួន។ បើយើងមិនទៅលើកនេះ លើកក្រោយ គាត់មកចាប់យើងទៅតែម្តង។ ឲ្យយើងធ្វើម៉េចឥឡូវ បើគាត់អនុវត្តន៍ច្បាប់អ៊ីចឹងហើយ។ ត្រូវតែទៅ»។ នេះជាបញ្ជាក់បន្ថែមរបស់លោក ធន់ សារាយ។

យ៉ាងណាក៏ដោយ លោក ធន់ សារាយ ព្យាយាមមិនបកស្រាយ ថាការកោះហៅរបស់អង្គភាពប្រឆាំងអំពើពុករលួយ ខុសនីតិវិធី ឬប្រាសចាកពីដែនសមត្ថកិច្ចរបស់ខ្លួននោះទេ។ លោកគ្រាន់តែ អះអាងថា មន្ត្រីរបស់ខ្លួន មិនបានប្រព្រឹត្តអំពើពុករលួយណាមួយ ទាក់ទិននឹងករណី កញ្ញា ខុម ចាន់តារាទី ឡើយ៕