ជាតិ
សិស្សថ្នាក់ទី១២ សាលារៀន អន្តរទ្វីប អាមេរិកាំងចុះកម្មសិក្សានៅសារមន្ទីរទួលស្លែង
×
សាលារៀន អន្តរទ្វីប អាមេរិកាំង បានដឹកនាំសិស្សានុសិស្សថ្នាក់ទី១២ ចំនួន៤៦២នាក់ ចុះកម្មសិក្សានៅសារមន្ទីរឧក្រិដ្ឋកម្មប្រល័យពូជសាសន៍ទួលស្លែង កាលពីថ្ងៃទី២០ ខែមេសា ឆ្នាំ២០១៦ កន្លងទៅថ្មីៗនេះ។
លោក ជា សម្បត្តិ ប្រធានចាងហ្វាងសាខាចាក់អង្រែ និងជាចាងហ្វាងរងមធ្យមសិក្សាទុតិយភូមិ បានឱ្យអ្នកយកព័ត៌មានដឹងថា កម្មសិក្សានេះត្រូវបានរៀបចំឡើងដោយមានការសហការយ៉ាងល្អពីសំណាក់ សារមន្ទីរឧក្រិដ្ឋកម្មប្រល័យពូជសាសន៍ទួលស្លែង បន្ទាប់ពីមន្ត្រីអប់រំនៃសារមន្ទីរបានចុះធ្វើបទបង្ហាញនៅក្នុងថ្នាក់រៀនក្នុងគោលបំណងដើម្បីឱ្យសិស្សានុសិស្សស្វែងយល់ពីទិដ្ឋភាពជាក់ស្តែងនៃសោកនាដកម្ម ដែលបានបន្សល់ទុកក្នុងរបបកម្ពុជាប្រជាធិបតេយ្យទៅនឹងកម្មវិធីសិក្សាមេរៀនប្រវត្តិសាស្ត្រ ក៏ដូចជាបានចូលរួមចំណែកអប់រំផ្សព្វផ្សាយឱ្យបានទូលំទូលាយ នូវចំណេះដឹងប្រវត្តិសាស្ត្រដ៏សោកសៅបំផុតនៅក្នុងឆ្នាំ១៩៧៥-១៩៧៩ និងជាសារដ៏មានអត្ថន័យដែលជំរុញទឹកចិត្តយុវជនឱ្យចូលរួមប្រឆាំង និងទប់ស្កាត់នូវរាល់អំពើឧក្រិដ្ឋកម្មដែលអាចនឹងកើតមានឡើងក្នុងសង្គមជាតិនាពេលអនាគត។
លោក ជ័យ សូភារម្យ អនុប្រធានការិយាល័យទទួលបន្ទុកកម្មវិធីអប់រំផ្សព្វផ្សាយនៃសារមន្ទីរ បានឱ្យដឹងដែរថា សារមន្ទីរឧក្រិដ្ឋកម្មប្រល័យពូជសាសន៍ទួលស្លែង បានដើរតួនាទីយ៉ាងសំខាន់ក្នុងការផ្សព្វផ្សាយពីទិដ្ឋភាពសោកនាដកម្មដែលបានកើតមានឡើងក្នុងអតីតមន្ទីរឃុំឃាំង (ហៅកាត់ថា ស-២១) នាសម័យខ្មែរក្រហម ហើយបច្ចុប្បន្ននេះសារមន្ទីរបានបើកទូលាយដល់ភ្ញៀវជាតិ និងអន្តរជាតិ ពិសេសគឺប្អូនៗសិស្សានុសិស្សជំនាន់ក្រោយឱ្យចូលទស្សនា និងសិក្សាស្វែងយល់អំពីប្រវត្តិបនប្រល័យពូជសាសន៍តាមរយៈការតាំងបង្ហាញនូវវត្ថុតាងនានានៅក្នុងសាលពិព័រណ៍ រូបថតនិងហ្វីលជនរងគ្រោះ សម្ភារធ្វើទារុណកម្ម ខ្នោះដាក់អ្នកទោស ស្លាកព័ត៌មាន រួមទាំងការរៀបចំចងក្រងឯកសារ និងសកម្មភាពចុះផ្សព្វផ្សាយតាមសាលារៀនជាដើម៕
(អត្ថបទសាលា)
© រក្សាសិទ្ធិដោយ thmeythmey.com