ជាតិ
សង្គមជាតិ
រយៈពេល៤ខែ មនុស្សស្លាប់១២នាក់ រងរបួស៦០នាក់ ដោយសារខ្យល់កន្ទ្រាក់និងរន្ទះ
× គិតត្រឹមរយៈពេល៤ខែ ដើមឆ្នាំ២០១៦នេះ យ៉ាងហោចណាស់មានប្រជាពលរដ្ឋស្លាប់១២នាក់ និងអ្នករងរបួស៦០នាក់ ដោយសារតែបាតុភូតខ្យល់កន្ទ្រាក់ និងរន្ទះបាញ់ ខណៈដែលកម្ពុជាកំពុងរងឥទ្ធិពលឡើងកំដៅខ្លាំង។
នាយខុទ្ទកាល័យនៃគណៈកម្មាធិការជាតិគ្រប់គ្រងគ្រោះមហន្តរាយ លោក កែវ វី បានឲ្យដឹង ថា ក្នុងរយៈពេល៤ខែនេះ មានករណីខ្យល់កន្ទ្រាក់កើតឡើងចំនួន១៤៦លើក ដែលបណ្ដាលផ្ទះប្រជាពលរដ្ឋជាង១ពាន់ខ្នង បានរងការខូចខាត ដោយក្នុងនោះផ្ទះ២៣៣ខ្នងរងការខូចខាតទាំងស្រុង និងផ្ទះ ១២២២ខ្នងទៀត រងខូចខាតទ្រង់ទ្រាយ ហើយក៏មានខូចខាតដំបូលអាគារតាមសាលារៀនដែរ។
លោក កែវ វី បន្ថែមថា បាតុភូតធម្មជាតិនេះ ក៏បានបណ្ដាលឲ្យមនុស្សស្លាប់១២នាក់ និងរងរបួស៦០នាក់ ដោយក្នុងនោះស្លាប់ដោយសារខ្យល់កន្ទ្រាក់៤នាក់ រងរបួស៤៧នាក់ និងស្លាប់ដោយសាររន្ទះបាញ់ ៨នាក់ និងរងរបួស១៣នាក់ ហើយគោ និងក្របីងាប់១ក្បាល និងផ្ទះ២ខ្នងរងខូចខាត។ លោក កែវ វី ចាត់ទុកបាតុភូតឆ្នាំនេះ ហាក់មានភាពអាក្រក់ជាងឆ្នាំមុន។
ថ្លែងប្រាប់សារព័ត៌មានថ្មីៗ នាយខុទ្ទកាល័យរូបនេះ បញ្ជាក់ដូច្នេះថា៖«បាតុភូតឆ្នាំនេះហាក់មានភាពកាចសាហាវជាងឆ្នាំមុន ព្រោះចាប់ពីពាក់កណ្ដាលខែមីនាមក មានបាតុភូតខ្យល់កន្ទ្រាក់ជាបន្តបបន្ទាប់ ហើយរបាយការណ៍យើងធ្វើគិតត្រឹមថ្ងៃទី២៨ មេសា ឃើញថាចំនួនខូចខាតមានការកើនឡើងច្រើនជាងមុនក្នុងអំឡុងរយៈពេល៤ខែនេះ ដោយរបាយការណ៍នេះយើងមិនទាន់បានរាប់បញ្ចូលបាតុភូតខ្យល់កន្ទ្រាក់៥ឬ ៦ថ្ងៃក្រោយនេះ ដែលធ្វើឲ្យខូចខាតផ្ទះពលរដ្ឋបន្ថែមទៀតផង។ តែបើឈានចូលដល់ខែមិថុនា និងខែកក្កដា ដែលជាខែផ្លាស់ប្ដូរពីរដូវប្រាំង ទៅរដូវវស្សា វាជារឿងធម្មតាវិញ ព្រោះវាជារដូវកើតឡើងនៅបាតុភូតធម្មជាតិច្រើន»។
បើតាមលោក កែវ វី បាតុភូតខ្យល់កន្ទ្រាក់ និងរន្ទះ ដែលបណ្ដាលឲ្យប្រជាពលរដ្ឋស្លាប់ រងរបួស និងខូចខាតផ្ទះសម្បែងនេះ បានកើតឡើងនៅតាមបណ្ដាខេត្តចំនួន១៦ រួមមាន ខេត្តបាត់ដំបង បន្ទាយមានជ័យ ឧត្តរមានជ័យ កំពង់ធំ រតនគីរី មណ្ឌលគីរី និងកំពង់ចាមជាដើម។
កាលពីឆ្នាំ២០១៥ មានបាតុភូតខ្យល់ព្យុះចំនួន១៤២លើក បានបណ្ដាលឲ្យមនុស្សស្លាប់ ៥ នាក់ និងរងរបួស៩នាក់ ។ អ្នកស្លាប់ដោយសាររន្ទះ ១០នាក់ និងរងរបួស៨នាក់ ហើយផ្ទះខូចខាតទាំងស្រុង៤៤២ខ្នង និងខូចខាតទ្រង់ទ្រាយ១៨៤២ខ្នង។
បើតាមនាយកខុទ្ទកាល័យក្រសួងធនធានទឹក និងឧតុនិយមលោក ចាន់ យុត្ថា កម្ពុជានឹងមានភ្លៀងធ្លាក់ចំនួនមួយសប្ដាហ៍ ហើយមានលាយជាមួយបាតុភូតខ្យល់កន្ទ្រាក់ និងផ្គរន្ទៈ មកជាមួយដែរ ដោយលោក អំពាវនាវឲ្យប្រជាពលរដ្ឋ មានការប្រុងប្រយ័ត្នឲ្យបានខ្ពស់ចំពោះបាតុភូតធម្មជាតិនេះ៕
Tag:
គ្រោះមហន្តរាយ
បាតុភូតធម្មជាតិ
© រក្សាសិទ្ធិដោយ thmeythmey.com