កីឡាជាតិ
ជាតិ
ក្រសួងអប់រំធ្វើយុទ្ធនាការប្រកួតជើងឯកទូទាំងប្រទេសសិស្សមធ្យមសិក្សា
×
ក្រសួងអប់រំ យុវជន និងកីឡា ធ្វើយុទ្ធនាការប្រកួតកីឡាសិស្សមធ្យមសិក្សាជ្រើសរើសជើងឯកទូទាំងប្រទេស ដើម្បីស្វែងរកកីឡាករកីឡាការិនីដែលមានសមត្ថភាពសម្រាប់ធ្វើការហ្វឹកហាត់ពង្រឹងសមត្ថភាព និងបច្ចេកទេស ត្រៀមប្រកួតស៊ីហ្គេមលើកទី៣២ ឆ្នាំ២០២៣ ដែលកម្ពុជា នឹងធ្វើជាម្ចាស់ផ្ទះ។ ការប្រកួតនេះនឹងប្រព្រឹត្តទៅរយៈពេល១២ថ្ងៃ ចាប់ពីថ្ងៃទី១២ ដល់ថ្ងៃទី២៣ ខែឧសភា នៅទីរួមខេត្តកំពត។
ក្រសួងអប់រំ យុវជន និងកីឡា ដោយសហការជាមួយគណៈកម្មាធិការជាតិអូឡាំពិកកម្ពុជា(NOCC) បានធ្វើយុទ្ធនាការប្រកួតកីឡាសិស្សមធ្យមសិក្សាជ្រើសរើសជើងឯកទូទាំងប្រទេស ដើម្បីជ្រើសរើសកីឡាករកីឡាការិនីថ្នាលដែលមានសមត្ថភាព និងទេព្យកោសល្យខ្ពស់ ដើម្បីធ្វើការប្រមូលផ្តុំហ្វឹកហាត់ពង្រឹងសមត្ថភាពបន្ថែម សម្រាប់ត្រៀមប្រកួតកីឡាស៊ីហ្គេមលើកទី៣២ ឆ្នាំ២០២៣ ដែលកម្ពុជានឺងធ្វើជាម្ចាស់ផ្ទះ។ នេះបើយោងតាមការថ្លែងរបស់ លោក វ៉ាត់ ចំរើន អគ្គលេខាធិការ NOCC នៅក្នុងសន្និសីទសារព័ត៌មានកាលពីម្សិលមិញ នៅទីស្នាក់ការ NOCC។
លោកអគ្គលេខាធិការបានកត់សម្គាល់ថា សម្រាប់ការប្រកួតជើកឯកទូទាំងប្រទេសឆ្នាំនេះ កីឡាករកីឡាការិនីមានការចូលរួមផុសផុលជាងឆ្នាំមុនៗ ជាពិសេសកីឡាការិនីដែលមានរហូតដល់ជិត៥០ភាគរយនៃចំនួនកីឡាករសរុប ២២៤៩នាក់។ ការរៀបចំនេះត្រូវបានលោក វ៉ាត់ ចំរើន ចាត់ទុកថា វាជាជំហ៊ានមួយក្នុងការទាក់ទាញទឹកចិត្តរបស់កីឡាករកីឡាការិនីថ្នាលវ័យក្មេងឲ្យចូលរួមលេងកីឡា និងស្គាល់ពីគុណតម្លៃនៃកីឡា ជាពិសេសដើម្បីស្វែងរកកីឡាករកីឡាការិនីដែលមានទេព្យកោសល្យ ដើម្បីបញ្ជូនទៅកាន់សហព័ន្ធជាតិធ្វើការបណ្តុះបណ្តាលពួកគេឲ្យក្លាយជាកីឡាករអាជីពប្រចាំក្លិបនីមួយៗ។
ក្នុងឱកាសនោះដែរ លោក ដួង មាសចំរើន ប្រធានគណៈកម្មការរៀបចំការប្រកួតបានមានប្រសាសន៍ថា សម្រាប់ការប្រកួតជើងឯកទូទាំងប្រទេសនេះកីឡាករជម្រើសជាតិក៏អាចចូលរួមបានដែរ ឲ្យតែកំពុងសិក្សានៅថ្នាក់វិទ្យាល័យ ប៉ុន្តែប្រសិនបើក្រុមណាដាក់កីឡាករជម្រើសជាតិ ឬកីឡាករផ្សេងមិនមែនជាសិស្ស ក្រុមនោះនឹងចាញ់ដោយស្វ័យប្រវត្តិ នៅពេលគណៈកម្មការស្វែងរកឃើញពីបញ្ហានេះ។
គួរបញ្ជាក់ថា សម្រាប់ការប្រកួតកីឡាសិស្សមធ្យមសិក្សាជ្រើសរើសជើងឯកទូទាំងប្រទេស មានកីឡាករកីឡាការិនីចូលរួមប្រកួតទាំងអស់ចំនួន២,២៤៩នាក់(ស្រី១,០៥៦នាក់) ពួកគេទាំងនេះត្រូវប្រកួតលើវិញ្ញាសាចំនួន៦ គឺបាល់ទាត់ បាលទះ បាល់បោះ ប៉េតង់ វាយកូនបាល់លើតុ និងអត្តពលកម្ម។ ហើយការប្រកួតនឹងប្រព្រឹត្តទៅចាប់ពីថ្ងៃទី១២ ដល់ថ្ងៃទី២៣ ខែឧសភា នៅទីរួមខេត្តកំពត៕
Tag:
ជើងឯកទូទាំងប្រទេស
វ៉ាត់ ចំរើន
ក្រសួងអប់រំ
© រក្សាសិទ្ធិដោយ thmeythmey.com