ជាតិ
សង្គមជាតិ
មុនជ្រើសរើសសាលា និស្សិតគួរពិនិត្យមើលការទទួលស្គាល់គុណភាពអប់រំជាមុនសិន
×
ភ្នំពេញ៖ ពីខែមិថុនាឆ្នាំ២០១៦ តទៅ គណៈកម្មាធិការទទួលស្គាល់គុណភាពអប់រំនៃកម្ពុជា (ACC) ដែលមានលោក ហង់ ជួនណារ៉ុន ជាប្រធាន នឹងចាប់ផ្តើមវាយតម្លៃគុណភាពអប់រំនៅតាមបណ្តាគ្រឹះស្ថានឧត្តមសិក្សាទាំងសាធារណៈ និងឯកជន។ លទ្ធផលវាយតម្លៃទាំងនេះ នឹងត្រូវផ្សព្វផ្សាយជាសាធារណៈដោយ ACC ។ ហេតុនេះ អ្នកនាំពាក្យក្រសួងអប់រំ យុវជន និងកីឡាលោក រស់ សាលីន ផ្តល់អនុសាសន៍ថា សិស្សនិស្សិតគួរតែស្វែងរកព័ត៌មានអំពីការទទួលស្គាល់គុណភាពអប់រំដោយ ACC ជាមុនសិន ចាំសម្រេចចិត្តជ្រើសរើសគ្រឹះស្ថានឧត្តមសិក្សាណាមួយ។
ការទទួលស្គាល់គុណភាពអប់រំដោយ ACC គឺជាកត្តាចាំបាច់មួយសម្រាប់សិស្សនិស្សិតយកជាមូលដ្ឋានក្នុងការជ្រើសរើសគ្រឹះស្ថានឧត្ដមសិក្សាណាមួយ។ បើតាមលោក រស់ សាលីន អ្នកនាំពាក្យក្រសួងអប់រំ យុវជន និងកីឡា មានប្រសាសន៍ថា ការវាយតម្លៃគុណភាពអប់រំសម្រាប់គ្រឹះស្ថានឧត្ដមសិក្សា ACC នឹងត្រួតពិនិត្យមើលលក្ខខណ្ឌស្តង់ដារចំនួន ៩ ចំណុចសំខាន់ៗ ដែលក្នុងនោះរួមមាន ការជ្រើសរើសគ្រូបង្រៀន, កម្មវិធីសិក្សា និងហេដ្ឋារចនាសម្ព័ន្តរបស់គ្រឹះស្ថានសិក្សាជាដើម។ លោកបញ្ជាក់ថា ការបង្កើតឲ្យមានការវាយតម្លៃនេះ គឺជាកម្មវិធីកំណែទម្រង់របស់ក្រសួងអប់រំ ក្នុងបំណងលើកកម្ពស់គុណភាពអប់រំកម្រិតឧត្តមសិក្សានៅកម្ពុជា ឲ្យដើរស្របគ្នាជាមួយបណ្តាប្រទេសសមាជិកអាស៊ានដទៃទៀត។
លោក រស់ សាលីន បានថ្លែងប្រាប់សាព័ត៌មានអេឡិចត្រូនិកថ្មីៗថា ការវាយតម្លៃគុណភាពអប់រំសម្រាប់គ្រឹះស្ថានឧត្តមសិក្សានេះ គឺមិនមែនជាការដាក់សម្ពាធដល់គ្រឹះស្ថានសិក្សានោះទេ តែផ្ទុយមកវិញ វាគឺជាការជួយកែលម្អគុណភាពអប់រំ និងលើកកម្ពស់កិត្តិនាមដល់គ្រឹះស្ថានសិក្សាទាំងនោះទៅវិញទេ។
អ្នកនាំពាក្យក្រសួងអប់រំ យុវជន និងកីឡារូបនេះ បន្ថែមទៀតថា លទ្ធផលវាយតម្លៃគុណភាពអប់រំសម្រាប់គ្រឹះស្ថានឧត្ដមសិក្សា ដែលធ្វើដោយ ACC នឹងត្រូវផ្សព្វផ្សាយជាសាធារណៈ ដែលបង្ករភាពងាយស្រួលដល់សិស្សនិស្សិតក្នុងការទទួលបានព័ត៌មានអំពីគុណភាពអប់រំរបស់គ្រឹះស្ថានឧត្តមសិក្សានានា។
ដោយឡែកសម្រាប់គ្រឹះស្ថានសិក្សា ដែលមិនបានបំពេញតាមលក្ខខណ្ឌ ACC នឹងធ្វើការណែនាំបន្ថែម៕
© រក្សាសិទ្ធិដោយ thmeythmey.com