កីឡាជាតិ
ជាតិ
កីឡាវាយសីធ្វើមហាសន្និបាតបញ្ចប់អាណត្តិ និងតែងតាំងសមាជិកចាស់ សម្រាប់ដឹកនាំអាណត្តិថ្មី
× សហព័ន្ធកីឡាវាយសីកម្ពុជាកាលពីថ្ងៃទី៧ ខែឧសភា នៅទីស្នាក់ការគណៈកម្មាធិការជាតិអូឡាំពិកកម្ពុជា(NOCC) បានរៀបចំមហាសន្និបាតបូកសរុបការងារប្រចាំឆ្នាំ២០១៥ និងទិសដៅសម្រាប់ឆ្នាំ២០១៦ និងការបញ្ចប់អាណត្តិចាស់ ២០១២-២០១៦ ដើម្បីកំណត់ទិសដៅសម្រាប់អាណត្តិថ្មី ២០១៦-២០២០។ ក្នុងមហាសន្និបាតនោះដែរ សមាជិករបស់សហព័ន្ធបានបោះឆ្នោតជ្រើសរើសតែងតាំងសមាជិកដែលដឹកនាំអាណត្តិចាស់ ឲ្យបន្តដឹកនាំអាណត្តិថ្មី។
ក្រោយពីបំពេញបេសកម្មយ៉ាងមមាញឹកអស់រយៈពេល៥ឆ្នាំកន្លងមក សហព័ន្ធកីឡាវាយសីកម្ពុជាបានធ្វើមហាសន្និបាតបូកសរុបការងារប្រចាំឆ្នាំ២០១៥ និងដាក់ទិសដៅឆ្នាំ២០១៦ និងដើម្បីបញ្ចប់អាណត្តិចាស់ ២០១២-២០១៦ កំណត់ទិសដៅអាណត្តិថ្មី ២០១៦-២០២០ របស់ខ្លួនកាលពីថ្ងៃទី៧ ខែឧសភា ឆ្នាំ២០១៦ នៅទីស្នាក់ការគណៈកម្មាធិការជាតិអូឡាំពិកកម្ពុជា(NOCC)។
បន្ទាប់ពីគណៈកម្មាធិការប្រតិបត្តិទាំង៩ត្រូវបានអង្គមហាសន្និបាតរំសាយរួមមាន លោក លី កុសល, លោក មាស សារិន, លោក ស្តើង ជា, លោក អាំង សំបូរ, លោក ជាម សុភា, លោក លឹម កៅ, លោក កុសល សុវណ្ណវិសាល, លោក ធិន សៅ និងលោល កែវ រស់ កាលពីថ្ងៃទី៧ ខែឧសភា ក្នុងថ្ងៃដដែលនោះ បេក្ខភាពទាំង៩នាក់ ត្រូវបានជាប់ឆ្នោតក្នុងដឹកនាំអាណត្តិថ្មី (២០១៦-២០២០) ដដែល បន្ទាប់ពីសមាជិករបស់សហព័ន្ធបោះឆ្នោតដោយការលើកដៃគាំទ្រ១០០ភាគរយ។
បើតាមរបាយការណ៍បានឲ្យដឹងថា សហព័ន្ធកីឡាវាយសីកម្ពុជា មានក្លិប-សមាគមដែលជាសមាជិកក្នុងអាណត្តិចាស់ចំនួន២៥ មានកីឡាករកីឡាការិនីសរុបចំនួន៥៥៣នាក់(ស្រី៣០នាក់) រីឯទីលានហ្វឹកហាត់នៅរាជធានីភ្នំពេញមានចំនួន៣០កន្លែង នៅតាមបណ្តាលខេត្ត៤៥កន្លែង និងមានគ្រូបង្វឹក៣៣នាក់ ព្រមទាំងអាជ្ញាកណ្តាល១១នាក់។
គួរបញ្ជាក់ថា នៅក្នុងអង្គមហាសន្និបាតដែលធ្វើនៅទីស្នាក់ការ NOCC នោះមានសមាជិកតំណាងក្លិប-សមាគមន៍ចូលរួមចំនួន២១នាក់ គឺអវត្តមានចំនួនចំនួន៣នាក់ ហើយបេក្ខជនដែលឈរឈ្មោះឲ្យគេបោះឆ្នោតមានចំនួន៩នាក់ ពោលគឺសមាជិកដែលដឹកនាំក្នុងអាណត្តិចាស់ ហើយបេក្ខជនទាំងនេះត្រូវបានសមាជិកបោះឆ្នោតគាំទ្រឲ្យដឹកនាំអាណត្តិថ្មីដដែល ដោយសម្លេងគាំទ្រ ២១/២១។
ក្នុងអង្គមហាសន្និបាតនោះដែរ ក៏មានការចែកសញ្ញាប័ត្រដល់គ្រូបង្វឹកវាយសីកម្រិត១ចំនួន៩នាក់ ព្រមទាំងចែករ៉ាកែតចំនួន៣៥០ដើមដល់ក្លិបនានាដែលចូលរួមផងដែរ ដោយក្លិបនីមួយៗទទួលបានចាប់ពី១០ដើមដល់៥០ដើមទៅតាមទំហំនៃក្លិប។
គួរបញ្ជាក់ទៀតថា បេក្ខជនទាំង៩ ដែលជាប់ឆ្នោតខាងលើនៅរក្សាតំណែងដដែល គឺ លោក លី កុសល ជាប្រធាន ឬឯ លោក មាស សារិន ជាប់ជាអនុប្រធាន លោក ស្តើង ជា ជាអគ្គលេខាធិការ លោក ធិន សៅ អគ្គហិរញ្ញិក ចំណែក លោក ជាម សុភា និង លោក អាំង សំបូរ ជាអគ្គលេខធិាការរង និងសមាជិកប្រតិបត្តិចំនួន៣នាក់ផ្សេងទៀត។
លោក លីកុសល ប្រធានសហព័ន្ធកីឡាវាយសីកម្ពុជា បានមានប្រសាសន៍ថា ដើម្បីជំរុញវិស័យកីឡាវាយសីកម្ពុជាឲ្យកាន់តែមានភាពរីកចម្រើនទាំងនៅលើឆាកជាតិ និងអន្តរជាតិ សហព័ន្ធកីឡាវាយសីកម្ពុជាបានរៀបចំនូវផែនការយុទ្ធសាស្ត្រក្នុងការអនុវត្តសម្រាប់ថ្មីចំនួន៨ចំណុច គឺ ទី១.សហព័ន្ធនឹងរៀបចំផែកការឲ្យបានច្បាស់លាស់ប្រចាំត្រីមាស ដើម្បីវាយតម្លៃ និងស្វែងរកចំណុច និងចំណុចខ្លាំង សម្រាប់កែលម្អរ ដើម្បីពង្រឹងឆ្ពោះទៅរកប្រកួតស៊ីហ្គេមលើកទី៣២ ឆ្នាំ២០២៣។
ទី២. បង្កើនកិច្ចប្រជុំយ៉ាងទៀតទាត់ និងលើសពីផែនការកំណត់ ដើម្បីត្រួតពិនិត្យ និងដោះស្រាយការងារណាដែលបន្ទាន់ចាំបាច់ចំពោះមុខ។ ទី៣. បន្តការណែនាំក្លិប-សមាគម ធ្វើលិខិតសុំចូលសមាជិក ដោយភា្ជប់មកជាមួយនូវតារាងឈ្មោះកីឡាករកីឡាការិនី ដើម្បីធ្វើអត្តសញ្ញាណប័ណ្ណទទួលស្គាល់ជាផ្លូវការ។
ទី៤. ពង្រឹង និងពង្រីកការហ្វឹកហាត់ជាប្រចាំ ដើម្បីបង្កើនសមត្ថភាពកីឡាករឲ្យកាន់តែមានទេព្យដោសល្យក្នុងឈានទៅរកជ័យជម្នះលើកឆាកជាតិ និងអន្តរជាតិ។ សហព័ន្ធនឹងស្វែងរកគ្រូបរទេសដែលមានសមត្ថភាពខ្ពស់មកបង្ហាត់បង្រៀនកីឡាករ។ ទី៥. សហព័ន្ធនឹងធ្វើការផ្សព្វផ្សាយឲ្យកាន់តែទូលំទូលាយ។ ទី៦.សហព័ន្ធនឹងធ្វើការទំនាក់ទំនងជាមួយក្រុមហ៊ុនសប្បុរសជន ដើម្បីស្វែងរកចំណូល និងឧបត្ថម្ភក្នុងរៀចកម្មវិធីប្រកូតផ្សេងៗ។ ទី៧. នឹងធ្វើការផ្សព្វផ្សាយ និងទំនាក់ទំនងជាមួយលោកគ្រូអ្នកគ្រូនៅតាមបណ្តាសាលារៀន ដើម្បីជ្រើសរើសកីឡាករកីឡាការិនីថ្នាល សម្រាប់ត្រៀមប្រកួតស៊ីហ្គេម និងទី៨ សហព័ន្ធនឹងធ្វើការពង្រីកបណ្តុះបណ្តាល Umpire អាប៊ីត និងអាប៊ីតខ្សែ ទាំងបរិមាណ និងគុណភាពតាមកម្រិតស្តង់ដារអន្តរជាតិ។
លោកប្រធានរូបនេះបានបន្តថា សហព័ន្ធនឹងបន្តជួយជ្រោមជ្រែងដល់បណ្តាក្លិប-សមាគម ដែលមានភាបខ្សត់ខ្សោយ តាមរយៈការបញ្ជូនគ្រូបង្គោលទៅពង្រឹងដល់ក្លិប ហើយសហព័ន្ធមិនប្រងើយកន្តើយឡើយសហព័ន្ធនឹងធ្វើការផ្សព្វផ្សាយពីសកម្មភាពកីឡាមួយនេះឲ្យកាន់តែមានភាពផុសផុលបន្ថែមទៀត៕
© រក្សាសិទ្ធិដោយ thmeythmey.com