លោក កែវ រ៉េមី៖ ពលរដ្ឋត្រូវគោរពច្បាប់ មិនមែនចាំតែស្តាប់រដ្ឋាភិបាលនោះទេ

ជាតិ

លោក កែវ រ៉េមី៖ ពលរដ្ឋត្រូវគោរពច្បាប់ មិនមែនចាំតែស្តាប់រដ្ឋាភិបាលនោះទេ

08, Jun 2016 , 8:59 pm

រូបភាព

ដោយ:

ភ្នំពេញ៖ ប្រធានគណៈកម្មាធិការសិទ្ធិមនុស្សកម្ពុជា លោក កែវ រ៉េមី បានលើកឡើងថា ពលរដ្ឋ គ្រប់រូបត្រូវតែទាមទារ និងអនុវត្តសិទ្ធិតាមច្បាប់ មិនមែនស្តាប់រដ្ឋាភិបាលបង្គាប់ញ្ជាទេ។ លោកសង្កត់ធ្ងន់ថា ពលរដ្ឋគ្រប់និន្នាការនយោបាយទាំងអស់ ត្រូវរស់នៅស្មើភាពគ្នាចំពោះមុខច្បាប់ ដើម្បីរក្សាស្ថិរភាព និងសណ្តាប់ធ្នាប់សង្គម។

ប្រធានសិទ្ធិមនុស្សរបស់រដ្ឋាភិបាលលោក កែវ រ៉េមី បានពន្យល់និស្សិតជាង ៤០០នាក់ដែលចូលរួមក្នុងពិធីធ្វើបទបង្ហាញ ស្តីពី សិទ្ធិមនុស្ស និងការពង្រឹងការអនុវត្តច្បាប់ នៅថ្ងៃទី០៨ ខែមិថុនា ឆ្នាំ២០១៦នេះ នៅ CJCCថា រដ្ឋាភិបាលគ្រាន់តែជាអ្នកធានាការពារសិទ្ធិសេរីភាពពលរដ្ឋ តាមច្បាប់ប៉ុណ្ណោះ ដូចនេះពលរដ្ឋគ្រប់រូបមានសិទ្ធិអនុវត្តសិទ្ធិនានា តាមច្បាប់កំណត់។

រដ្ឋលេខាធិការទីស្តីការគណៈរដ្ឋមន្ត្រីដែលទើបចូលកាន់តំណែងជាប្រធានគណៈកម្មាធិការសិទ្ធិមនុស្សរូបនេះ បានព្យាយាមពន្យល់ពីការប្រើប្រាស់របស់ពលរដ្ឋ និងសិទ្ធិរដ្ឋាភិបាល យ៉ាងមុតមាំដូច្នេះថា៖«ពលរដ្ឋត្រូវសុំសិទ្ធិធ្វើបាតុកម្ម កូដកម្មនានា ព្រោះសិទ្ធិពលរដ្ឋត្រូវបានកំណត់ក្នុងច្បាប់។ ប្រសិនបើអាជ្ញាធរមិនអនុញ្ញាតទេ យើងកុំរំលោភបំពានលើច្បាប់។ ហើយបើរំលោភរដ្ឋគេ (អាជ្ញាធរ) មានកាតព្វកិច្ចទទួលខុសត្រូវ»។

លោកបានបន្តពន្យល់ដោយការពារការងារអនុវត្តសិទ្ធិរបស់រដ្ឋាភិបាលថា រដ្ឋមានកាតព្វកិច្ចធានា ការពារអនុវត្តសិទ្ធិពលរដ្ឋស្មើគ្នា ចំពោះមុខច្បាប់ ក្នុងគោលដៅរក្សាសន្តិសុខ ស្ថិរភាព សណ្តាប់ធ្នាប់ សាធារណៈក្នុងសង្គម។

«រដ្ឋធម្មនុញ្ញចែងថា រាជរដ្ឋាភិបាលមានកាតព្វកិច្ចក្នុងការការពារសន្តិសុខ សុវត្ថិភាពសណ្តាប់ធ្នាប់សាធារណៈ។ ការពារ មានន័យថា ត្រូវតែមានកាតព្វកិច្ច ដូចនេះយើងមិនអាចចោលបានទេ ព្រោះនេះជាទំនួលខុសត្រូវ របស់រាជរដ្ឋាភិបាល ធ្វើម៉េចឲ្យសុខសន្តិភាព ស្ថិរភាព សុខសប្បាយបង្ករភាពស្ងប់សុខក្សាន្ត ដល់ប្រជាពលរដ្ឋ ជាពិសេសគឺ ការផ្តល់សិទ្ធិឲ្យបានស្មើៗគ្នា ចំពោះមុខច្បាប់។ បើរាជរដ្ឋាភិបាលមិនធ្វើដូច្នេះទេ វាជាការបំពានគ្នាទៅវិញទៅមក វានាំឲ្យអនាធិបតេយ្យ ធ្វើឲ្យខាតបង់ផលប្រយោជន៍ជាតិជារួម។ យើងត្រូវតែគោរពច្បាប់ ត្រូវគោរពច្បាប់ឲ្យបាន មិនមែនស្តាប់រដ្ឋាភិបាលទេ»។ លោក កែវ រ៉េមី បញ្ជាក់។

គួរបញ្ជាក់ថា គណៈកម្មាធិការសិទ្ធិមនុស្សកម្ពុជាសហការជាមួយសាកលវិទ្យាល័យភូមិន្ទភ្នំពេញ រៀបចំបទបង្ហាញនេះឡើង ក្នុងគោលបំណងអប់រំផ្សព្វផ្សាយពីការអនុវត្តន៍សិទ្ធិដល់និស្សិត ដើម្បីឲ្យពួកគេយល់ពីការប្រើប្រាស់សិទ្ធិស្របច្បាប់។ លោក កែវ រ៉េមី ជឿជាក់ថា មានតែនិស្សិតប៉ុណ្ណោះដែលអាចនិយាយស្តាប់គ្នាងាយយល់ ព្រោះពួកគេទទួលបានការអប់រំច្បាស់លាស់ និងចេះពិចារណារកខុសត្រូវ។ ហើយថា លោកនឹងបន្តបទបង្ហាញផ្សព្វផ្សាយសិទ្ធិមនុស្ស នេះ នៅតាមគ្រឹះស្ថានឧត្តមសិក្សា និងរោងចក្រ សហគ្រាស ផ្សេងទៀតផងដែរ៕