អន្តរជាតិ
នយោបាយអន្តរជាតិ
លោក ប្រាយុទ្ធ ព្រមាន កុំយកការលាលែងរបស់ខេមេរ៉ុន មកប្រៀបនឹងលោក
× បក្សនយោបាយធំមួយចំនួនរបស់ថៃ សរសើរពីការចាកចេញពីតំណែងរបស់នាយករដ្ឋមន្ត្រីអង់គ្លេសលោក ដេវីដ ខេមេរ៉ុន និងថែមទាំងទទូចឲ្យរដ្ឋាភិបាលរបបសឹកថៃយកជាគំរូសម្រាប់ការធ្វើប្រជាមតិរដ្ឋធម្មនុញនាពេលខាងមុខផងដែរ។ តែនាយករដ្ឋមន្ត្រីថៃប្រាយុទ្ធ ច័ន្ទ អូចា បានប្រតិកម្ម និងព្រមានកុំឲ្យយករូបលោក ទៅប្រៀបធៀបជាមួយលោក ដេវីដ ខេមេរ៉ុន ដ្បិតស្ថានភាពខុសគ្នា។
នាយករដ្ឋមន្ត្រីថៃ លោក ប្រាយុទ្ធ ច័ន្ទ អូចា នៅថ្ងៃទី២៧ ខែមិថុនា ម្សិលមិញ បានបញ្ជាក់ថា លោក នឹងមិនធ្វើតាមនាយករដ្ឋមន្ត្រីអង់គ្លេស ដេវីដ ខេមេរ៉ុន ដែលបានប្រកាសលាលែងតំណែងក្រោយប្រជាមតិចេញពីសហភាពអឺរ៉ុប ប្រសិនបើសេចក្តីព្រាងរដ្ឋធម្មនុញ្ញថៃថ្មី ត្រូវបានបោះឆ្នោតទាត់ចោលនោះ។
ឆ្លើយនឹងសំណួរពីការលាលែងតំណែងលោក ខេមេរ៉ុន ក្រោយប្រជាមតិ លោកឧត្តមសេនីយ៍ ប្រាយុទ្ធ បានបញ្ជាក់ថា បញ្ហាទាំងពីរ មិនអាចប្រៀបធៀបគ្នាបានឡើយ។ លោកសង្កត់ធ្ងន់យ៉ាងដូច្នេះ ថា «ករណីទាំងពីរគឺ ខុសគ្នា។ តើអ្នកចង់ឲ្យខ្ញុំចុះចេញពីតំណែងមែនឬ? ខ្ញុំមិនចុះចេញនោះទេ។ ខ្ញុំគឺជាអ្នកកំណត់ តែលោក ខេមេរ៉ុន មិនឡើងកាន់តំណែងដូចអ្វីដែលខ្ញុំធ្វើនោះទេ។ ប្រទេសរបស់គេ មិនមែនបញ្ហាដូចទៅនឹងយើងនោះទេ»។ នេះបើយោងតាមការចុះផ្សាយរបស់សារព័ត៌មានបាងកកប៉ុស្តិ៍។
សូមរម្លឹកផងដែរថា កាលពីថ្ងៃទី២៣ ខែមិថុនា កន្លងទៅ ប្រជាជនចក្រភពអង់គ្លេស បានបោះឆ្នោត ប្រជាមតិដោយលទ្ធផលបង្ហាញថាប្រជាជនភាគច្រើនគាំទ្រឲ្យចក្រភពអង់គ្លេសចាកចេញពីសហភាពអឺរ៉ុប។ ភ្លាមៗនេះ នាយករដ្ឋមន្ត្រីអង់គ្លេស លោក ដេវីដ ខេមេរ៉ុន ក៏បានប្រកាសលាលែងពីតំណែងដ្បិតលោកគឺជាភាគីគាំទ្រយុទ្ធនាការឲ្យចក្រភពអង់គ្លេសបន្តស្ថិតនៅក្នុងសហភាពអឺរ៉ុបដដែល។
ចរន្តនៃការចាកចេញរបស់លោកដេវីដ ខេមេរ៉ុន ទទួលការសរសើរពីនយោបាយថៃ។ ប្រមុខបក្សប្រជាធិបតេយ្យ និងជាអតីតនាយករដ្ឋមន្ត្រីថៃ លោក Abhisit Vejjajiva បានសរសើរចំពោះការទទួលខុសត្រូវ និងឥរិយាបថរបស់លោកដេវីដ ខេមេរ៉ុន។ លោក Abhisit បានប្រៀបធៀបការធ្វើប្រជាមតិរបស់អង់គ្លេសជាមួយនឹងធ្វើផែនការនៃការធ្វើប្រជាមតិរបស់ថៃ ដោយអះអាង ថា ប្រជាជនមិនគួរត្រូវបានបង្ខំឲ្យគាំទ្រ ឬប្រឆាំងលើប្រជាមតិឡើយ។
ការលើកឡើងរបស់អ្នកនយោបាយរូបនេះ ក៏ស្របជាមួយនឹងមន្ត្រីជាន់ខ្ពស់បក្សភឿ ថៃ ដែល បានបញ្ជាក់ដែរថា ឥរិយាបថរបស់លោក ខេមេរ៉ុន គឺជាគំរូមួយសម្រាប់រដ្ឋាភិបាលយោធាក្នុងពេលនៃការធ្វើប្រជាមតិរដ្ឋធម្មនុញ្ញថៃ នាថ្ងៃទី០៧ ខែសីហាខាងមុខផងដែរ។
លោក Pichai Naripthaphan អតីតរដ្ឋមន្ត្រីថាមពលនៃបក្សភឿ ថៃ បានថ្លែង ថា លោកនាយករដ្ឋមន្ត្រី ប្រាយុទ្ធ ច័ន្ទ អូចា គួរតែកត់សម្គាល់នូវអាកប្បកិរិយារបស់លោក ដេវីដ ខេមេរ៉ូនលើគោរពនូវឆន្ទៈរបស់ប្រជាជននោះ។ នេះបើយោងតាមសារព័ត៌មានបាងកកប៉ុស្តិ៍ដែលបានបន្ថែមដែរថា លោក បានសង្កត់ធ្ងន់ថា « រដ្ឋាភិបាល ជាពិសេសនាយករដ្ឋមន្ត្រី គួរតែយកមេរៀនពីលោក ដេវីដ ខេមេរ៉ូន និងលាលែងពីតំណែង ប្រសិនសេចក្តីព្រាងរដ្ឋធម្មនុញ្ញ ត្រូវបានបរាជ័យនៅក្នុងប្រជាមតិនោះ»។
សូមជម្រាបផងដែរថា នៅថ្ងៃទី០៧ ខែសីហាខាងមុខ រដ្ឋាភិបាលរបបសឹកថៃ នឹងរៀបចំឲ្យមានប្រជាមតិមួយលើសេចក្តីព្រាងរដ្ឋធម្មនុញ្ញថ្មីដែលត្រូវបានធ្វើឡើងក្រោមការដឹកនាំដោយរបបសឹកក្នុងគោលដៅដើម្បីបញ្ចប់វិបត្តិនយោបាយ និងឈានទៅរកការបោះឆ្នោតផងដែរ។
ជុំវិញនៃការធ្វើប្រជាមតិនេះដែរ អាចនឹងមិនទទួលបានការគាំទ្រលើសេចក្តីព្រាងរដ្ឋធម្មនុញ្ញនោះ នោះទេ ដ្បិតបទបញ្ញត្តិភាគច្រើនបានកំណត់ឡើងដើម្បីផ្តល់ប្រយោជន៍ដល់ក្រុមយោធាដើម្បីតោងអំណាចក្នុងជួយរដ្ឋាភិបាល។ ជាពិសេសនោះ អ្វីដែលគេព្រួយបារម្ភខ្លាំងនោះ រដ្ឋាភិបាលរបបសឹក ដែលកំពុងតែដឹកនាំដោយលោកនាយករដ្ឋមន្ត្រី ប្រាយុទ្ធ ច័ន្ទ អូចា នឹងបន្តកាន់តំណែងទៀត ដ្បិត លោក ក៏ទើបតែអះអាងហើយថាលោក នឹងបន្តកាន់តំណែង ប្រសិនបើប្រទេសជាតិនៅមិនទាន់មានសន្តិភាព និងស្ថិរភាពនយោបាយនោះទេ៕
© រក្សាសិទ្ធិដោយ thmeythmey.com