ថៃ ចាញ់កាហ្សាក់ស្ថានលើកៅអីក្រុមប្រឹក្សាសន្តិសុខអង្គការសហប្រជាជាតិ

អន្តរជាតិ

នយោបាយអន្តរជាតិ

ថៃ ចាញ់កាហ្សាក់ស្ថានលើកៅអីក្រុមប្រឹក្សាសន្តិសុខអង្គការសហប្រជាជាតិ

29, Jun 2016 , 10:34 am

រូបភាព

ដោយ:

ចុងក្រោយ ស្ថាបនិកអាស៊ាន រាជាណាចក្រថៃ បានបរាជ័យក្នុងការប្រជែងតំណែងសមាជិកមិនអចិន្ត្រៃយ៍នៃក្រុមប្រឹក្សាសន្តិសុខអង្គការសហប្រជាជាតិជាមួយនឹងកាហ្សាក់ស្ថាន។ កាហ្សាក់ស្ថាន នឹងក្លាយជាសមាជិកមិនអចិន្ត្រៃយ៍ក្រុមប្រឹក្សាសន្តិសុខតំណាងតំបន់អាស៊ីប៉ាស៊ីហ្វិកសម្រាប់ឆ្នាំ២០១៧-២០១៨ ជំនួសម៉ាឡេស៊ី។

មហាសន្និបាតអង្គការសហប្រជាជាតិ នៅថ្ងៃទី២៨ ខែមិថុនា ម្សិលមិញ បានបោះឆ្នោតជ្រើសសមាជិកប្រាំប្រទេសសម្រាប់កៅអីមិនអចិន្ត្រៃយ៍នៃក្រុមប្រឹក្សាសន្តិសុខអង្គការប្រជាជាតិ។ ក្នុងនោះ ស៊ុយអ៊ែត កាហ្សាក់ស្ថាន អេត្យូពី និង បូលីវី ត្រូវបានជ្រើសរើសដើម្បីជំនួសកៅអី អង់ហ្គោឡា ម៉ាឡេស៊ី ណូវែលហ្សេឡង់ អេស្ប៉ាញ និងវ៉េណេស៊ុយអេឡា ។ តែសម្រាប់កៅអីមួយទៀត ត្រូវបានបែងចែកការកាន់តំណែងរយៈពេលមួយឆ្នាំម្នាក់ ដ្បិតគូប្រជែងហូឡង់ និងអ៊ីតាលី មានសំឡេងប្រហាក់ប្រហែលគ្នា។

សូមជម្រាបផងដែរថា កាហ្សាក់ស្ថាន បានទទួលជ័យជម្នះលើកៅអីនៃសមាជិកមិនអចិន្ត្រៃយ៍ក្រុមប្រឹក្សាសន្តិសុខអង្គការសហប្រជាជាតិក្នុងសំឡេងគាំទ្រ១៣៨ ខណៈ គូប្រជែងថៃ ទទួលបានសំឡេងគាំទ្រត្រឹមតែ៥៥ នៃសំឡេងសរុបទាំងអស់នៃសមាជិកមហាសន្និបាតអង្គការសហប្រជាជាតិ ១៩៣។ ជ័យជម្នះនេះ បានធ្វើឲ្យរដ្ឋសំបូរដោយប្រេងមួយនេះ ក្លាយជាប្រទេសទីមួយហើយមកពីអាស៊ីកណ្តាលដែលកាន់តំណែងសមាជិកក្រុមប្រឹក្សាសន្តិសុខអង្គការសហប្រជាជាតិ។

ប្រទេសដែលជាប់ជ័យលាភីក្នុងតំណែងសមាជិកមិនអចិន្ត្រៃយ៍ក្រុមប្រឹក្សាសន្តិសុខ នឹងត្រូវចាប់បម្រើការផ្លូវការពីថ្ងៃទី០១ខែមករា ឆ្នាំ២០១៧ដល់ចុងឆ្នាំ២០១៨។ តាមពិតទៅ ជាទម្លាប់ការបោះឆ្នោតជ្រើសរើសសមាជិកមិនអចិន្ត្រៃយ៍នៃក្រុមប្រឹក្សាសន្តិសុខ តែងធ្វើនៅ ខែតុលា ឬចុងឆ្នាំ។ យ៉ាងណាក៏ដោយ ដោយសារពេលវេលាសម្រាប់សមាជិកដែលជាប់ឆ្នោតមានរយៈពេលខ្លីពេលសម្រាប់ការរៀបចំខ្លួន ទើបមហាសន្និបាតអង្គការសហប្រជាជាតិសម្រេច បោះឆ្នោត មុនពេលពេលនៃការកាន់តំណែងរយៈពេល៦ខែវិញ៕