កីឡាជាតិ
ជាតិ
Hun Sen Cup វគ្គ១/២៖ ព្រះខ័នរាជ ប៉ះភ្នំពេញក្រោន ស៊ីម៉ាក់តទល់ជាមួយការពារជាតិ
× ការប្រកួតពានរង្វាន់សម្តេច ហ៊ុន សែន លើកទី១០ ឈានដល់ជំនួបវគ្គពាក់កណ្តាលផ្តាច់ព្រ័ត្រនាថ្ងៃពុធនេះ ដោយម្ចាស់ការពារតំណែងជើងឯកព្រះខ័នរាជស្វាយរៀង ប៉ះ ភ្នំពេញក្រោន មុនជំនួបរវាងមជ្ឈមណ្ឌលកំចាត់មីនកម្ពុជា(ស៊ីម៉ាក់) និងក្រសួងការពារជាតិ នៅពហុកីឡដ្ឋានជាតិអូឡាំពិក។
ព្រះខ័នរាជស្វាយរៀងដែលជាម្ចាស់ពានបីជំនាន់ បានទម្លាក់បឹងកេតអង្គរ ខណៈម្ចាស់ពាន២សម័យកាល ភ្នំពេញក្រោន បានយកឈ្នះសៀមរាបអង្គរ នៅវគ្គ១/៤ផ្តាច់ព្រ័ត្រ។ ព្រះខ័នរាជបោះជំហានទៅកាន់ការរក្សាតំណែងជើងឯករបស់ខ្លួន ដែលកាលពីឆ្នាំមុន ពួកគេបានយកឈ្នះណាហ្គាវើល ២-១ នៅវគ្គផ្តាច់ព្រ័ត្រ រីឯភ្នំពេញក្រោន ដែលបានឈ្នះពានកាលពីឆ្នាំ២០០៨ និង២០០៩ ហើយឈានដល់វគ្គផ្តាច់ព្រ័ត្រនៅឆ្នាំ២០១០ នឹងប្តឹងប្រែងដើម្បីក្តោបក្តាប់ឱកាសនេះ ដើម្បីលើកពាន Hun Sen Cup សារជាថ្មី ក្រោយខកខានអស់៥ឆ្នាំ។
ដោយឡែកក្រុមមជ្ឈមណ្ឌលកំចាត់មីនកម្ពុជា ឬស៊ីម៉ាក់ មានឱកាសបង្ហាញខ្លួននៅវគ្គពាក់កណ្តាលផ្តាច់ព្រ័ត្រជាលើកដំបូង បន្ទាប់ពីពួកគេទទួលបានជ័យជម្នះដ៏ភ្ញាក់ផ្អើលលើណាហ្គាវើល ជើងឯករងឆ្នាំចាស់ និងជាម្ចាស់ពានកាលពីឆ្នាំ២០១៣ ។ ស៊ីម៉ាក់ ត្រូវតទល់ជាមួយក្រសួងការពារជាតិ ដែលកំពុងលេចធ្លោរទាំងក្នុងពានរង្វាន់ Hun Sen Cup និងក្របខណ្ឌមិត្តហ្វូនខេមបូឌានលីក។ ការពារជាតិ ដែលបានយកឈ្នះខេមបូឌានថាយហ្គឺរនៅវគ្គ៨ក្រុមចុងក្រោយនោះ រំពឹងលើកពានម្តងទៀត បន្ទាប់ពីពួកគេធ្លាប់ទទួលបានម្តងនៅឆ្នាំ២០១០ និងឈានដល់វគ្គផ្តាច់ព្រ័ត្រកាលពីឆ្នាំ២០១៣ ៕
ការប្រកួតវគ្គពាក់កណ្តាលផ្តាច់ព្រ័ត្រថ្ងៃទី២៩ ខែមិថុនា ឆ្នាំ២០១៦ ៖
-ម៉ោង៣:៣០នាទី៖ ព្រះខ័នរាជស្វាយរៀង ជួប ភ្នំពេញក្រោន នៅពហុកីឡដ្ឋានជាតិ
-ម៉ោង១៨:០០នាទី៖ ក្រសួងការពារជាតិ ជួប មជ្ឈមណ្ឌលកំចាត់មីនកម្ពុជា នៅពហុកីឡដ្ឋានជាតិ។
Tag:
បាល់ទាត់
Hun Sen Cup
© រក្សាសិទ្ធិដោយ thmeythmey.com