អន្តរជាតិ
នយោបាយអន្តរជាតិ
×![]()
លោក រ៉ូឌ្រីហ្គូ ឌើទើតេ នៅថ្ងៃទី៣០ ខែមិថុនានេះ បានចូលស្បថកាន់តំណែងជាប្រធានាធិបតីហ្វីលីពីនជាផ្លូវការហើយ។ នេះ ក៏មានន័យដែរថា វា គឺជាថ្ងៃដែលលោក ប៊ែរនីណូ អាហ្គីណូ ត្រូវបញ្ចប់អាណត្តិ និងដើរចេញពីតំណែងជាប្រធានាធិបតីហ្វីលីពីនផងដែរ។
អតីតអភិបាលក្រុងដាវ៉ាវលោក រ៉ូឌ្រីហ្គូ ឌើទើតេ (Rodrigo Duterte)បានក្លាយជាប្រធានាធិបតីទី១៦នៃសាធារណរដ្ឋហ្វីលីពីន។ បើមិនមានការប្រែប្រួលនោះទេ លោកប្រធានាធិបតី រ៉ូឌ្រីហ្គូ ឌើទើតេ នឹងត្រូវបន្តតួនាទីពីលោកប្រធានាធិបតីទើបផុតអាណត្តិប៊ែរនីណូ អាហ្គីណូ (Benigno Aquino) មួយអាណត្តិដែលមានរយៈពេល៦ឆ្នាំដែលបានកំណត់ដោយច្បាប់។
សូមជម្រាបផងដែរថា លោករ៉ូឌ្រីហ្គី ឌើទើតេ ដែលតែងតែប្រើប្រាស់ពាក្យគំរោះគំរើយដាក់អ្នកសារព័ត៌មាននោះ គឺជាអតីតអភិបាលក្រុងដាវ៉ាវ អស់រយៈពេលជាងពីរទសវត្សរ៍ហើយ។ លោក បានទទួលការគាំទ្រពីប្រជាជនច្រើនលើសលប់ក្នុងការបោះឆ្នោតសកលនៅថ្ងៃទី០៩ ខែឧសភាកន្លងទៅ។
តើអ្វីជាផែនការ និងគោលនយោបាយរបស់លោកប្រធានាធិបតីថ្មីហ្វីលីពីន រ៉ូឌ្រីហ្គូ ឌើទើតេ?
មុនពេលនៃការស្បថកាន់តំណែងជាផ្លូវការ លោកប្រធានាធិបតី រ៉ូឌ្រីហ្គូ ឌើទើតេ បានបញ្ជាក់ពីគោលនយោបាយអាទិភាពរបស់លោក រួមមាន បង្កើនកំណើនសេដ្ឋកិច្ច ដើម្បីជំរុញឲ្យបានការកាត់បន្ថយភាពក្រីក្រក្នុងកម្រិតទាបបំផុត និងជាពិសេសនោះ លោក បានសន្យាថា នឹងលុបបំបាត់អំពើពុករលួយ និងបទល្មើសត្រឹមតែរយៈពេល៦ខែប៉ុណ្ណោះ។ សម្រាប់ការបង្កើនកំណើនសេដ្ឋកិច្ច លោកឌើទើតេ សន្យានឹងកែប្រែប្រការមួយចំនួនក្នុងរដ្ឋធម្មនុញ្ញដើម្បីបន្ធូរបន្ថយការរឹតត្បិតលើអ្នកវិនិយោគ និង អនុញ្ញាតឲ្យអ្នកវិនិយោគអាចបង្កើនភាគហ៊ុននៃការវិនិយោគរបស់ពួកគេឲ្យបានកាន់តែច្រើនផងដែរ។
អ្វីដែលគួរឲ្យគួរកត់សម្គាល់នោះ លោក ឌើទើតេ ដែលប្រជាជនហៅឈ្មោះក្រៅថា «អ្នកដាក់ទណ្ឌកម្ម» បានប្រកាសថា នឹងមានការសម្លាប់រង្គាលនៅក្នុងរដ្ឋបាលរបស់លោក។ ហើយនោះគឺ លោក គ្រោងនឹងប្រកាសឲ្យប្រើប្រាស់«ទោសប្រហារជីវិតឡើងវិញ» ដើម្បីជាទណ្ឌកម្មសម្រាប់អ្នកដែលប្រព្រឹត្តបទល្មើសធ្ងន់ធ្ងរ។ ជាក់ស្តែងនោះគឺ បទល្មើសគ្រឿងញៀនដែលបានផ្តល់សិទ្ធិមិនត្រឹមតែអាជ្ញាធរប៉ុណ្ណោះនោះទេដែលអាចសម្លាប់មេខ្លោងគ្រឿងញៀន តែប្រជាជន ក៏មានសិទ្ធិសម្លាប់បានដែរ។ បន្ថែមពីនេះ ពួកគេ ក៏នឹងទទួលបានរង្វាន់លើកទឹកចិត្តទៀតផង។ ទោសប្រហារជីវីតរបស់ហ្វីលីពីន ត្រូវបានលុបចោលតាំងពីឆ្នាំ២០០៦មកម្ល៉េះ។
ដោយឡែក សម្រាប់គោលនយោបាយការបរទេសវិញ លោក មិនទាន់បានបង្ហាញនិន្នាការណាមួយជាក់លាក់ទៅកាន់សម្ព័ន្ធមិត្តឬមិត្តជិតខាងណាឡើយ។ សូម្បីតែសម្ព័ន្ធមិត្តអាមេរិកដែលគេស្គាល់ថាជាអាណាព្យាបាលផ្នែកសន្តិសុខ និងជាសម្ព័ន្ធមិត្តជិតស្និទ្ធបំផុតក្នុងរដ្ឋបាលលោកប្រធានាធិបតីទើបផុតអាណត្តិអាហ្គីណូនោះ ក៏លោក មិនបានបង្ហាញអ្វីដែរ តែលោក បានទទួលសារសាទរពីប្រធានាធិបតីអាមេរិក និងប្រធានាធិបតីចិនជាមួយនឹងសារត្រលប់ទៅវិញក្នុងន័យធម្មតានោះទេ។
តែរឿងដែលគួរឲ្យសោកស្តាយនោះ លោកប្រធានាធីបតីផុតអាណត្តិប៊ែរនីណូ អាហ្គីណូ បានផុតអាណត្តិមុនពេលដែលមជ្ឈត្តការនៃតុលាការអន្តរជាតិក្រុងឡាអេនៃប្រទេសហូឡង់ ប្រកាសសាលក្រមលើសំណុំរឿងសមុទ្រចិនខាងត្បូងដែលប្តឹងដោយហ្វីលីពីនប្រឆាំងចិន។ សាលក្រមដែលផ្តើមចេញពីបណ្តឹងរបស់ហ្វីលីពីនក្រោមកិច្ចប្រឹងប្រែងរបស់រដ្ឋបាលលោកអាហ្គីណូណ នឹងប្រកាសនៅថ្ងៃទី ១២ ខែកក្កដាខាងមុខដ៏ខ្លីនេះ៕
Tag:
ហ្វីលីពីន
អាស៊ាន
© រក្សាសិទ្ធិដោយ thmeythmey.com
