អន្តរជាតិ
រុស្ស៊ីដកតំណែងមន្ត្រីយោធាជាន់ខ្ពស់ ៥០រូបព្រោះបញ្ហាបច្ចេកទេសយោធា រដ្ឋមន្ត្រីការពារជាតិរុស្ស៊ីលោក Sergei Shoigu ។ រូបថត AP
× រដ្ឋមន្ត្រីការពារជាតិរុស្ស៊ីលោក Sergei Shoigu បានប្រកាសបញ្ចប់មុខតំណែងមេបញ្ជាការយោធាជាច្រើនរូបនៅតំបន់បាល់ទិកថ្ងៃទី ៣០មិថុនា។ ការប្រកាសដកតំណែងមន្ត្រីយោធាជាន់ខ្ពស់ច្រើននាក់បែបនេះមិនត្រូវបានគេបកស្រាយឲ្យបានច្បាស់ឡើយ ប៉ុន្តែគេដឹងច្បាស់ថាវាអាចពាក់ព័ន្ធការប្រឈមមុខគ្នារវាងកងកម្លាំងរុស្ស៊ីនិងកងកម្លាំងណាតូនៅព្រំដែនរុស្ស៊ី។
រឿងគួរឲ្យភ្ញាក់ផ្អើលមួយកើតឡើង ដោយរដ្ឋមន្ត្រីការពារជាតិរុស្ស៊ី លោក Sergei Shoigu បានចេញថ្លែងការណ៍មួយដើម្បីប្រកាសបញ្ចប់មុខតំណែងមេបញ្ជាការនិងបណ្តាមន្ត្រីជាន់ខ្ពស់ទ័ពជើងទឹករុស្ស៊ីជាច្រើនរូបប្រចាំតំបន់បាល់ទិកជាច្រើនរូបថ្ងៃទី ៣០ មិថុនា។
យោងតាមសារព័ត៌មាន New York Times ការបញ្ចប់មុខតំណែងមន្ត្រីជាន់ខ្ពស់យោធាមិនធ្លាប់មាន និងដូចជាមិនមានត្រៀមទុកមុននេះ មិនត្រូវបានដឹងពីមូលហេតុច្បាស់លាស់ឡើយ។ គ្រាន់តែដឹងច្បាស់ថារុស្ស៊ីកំពុងផ្លាស់ប្តូររចនាសម្ព័ន្ធកងទ័ពនៅតំបន់រសើបនិងកំពុងប្រឈមមុខគ្នាជាមួយកងកម្លាំងណាតូ។
បើតាមសេចក្តីថ្លែងការណ៍ របស់ក្រសួងការពារជាតិរុស្ស៊ីដែលចុះផ្សាយក្នុងសារព័ត៌មាន RT ក្នុងចំណោមអ្នកដែលត្រូវផ្ទេរភារកិច្ចនោះមានមេបញ្ជាការកងទ័ពប្រចាំតំបន់បាល់ទិក ឧត្តមនាវីឯក Viktor Kravchuk , នាយអគ្គសេនាធិការឧត្តមនាវីឯក Sergei Popov និងបណ្តាមន្ត្រីជាន់ខ្ពស់ផ្សេងទៀតជាង៥០ រូបឯណោះ។
សេចក្តីថ្លែងការណ៍នោះបានបញ្ជាក់ថា៖« មេបញ្ជាការកងទ័ពជើងទឹកប្រចាំតំបន់បាល់,នាយសេនាធិការ និងមន្ត្រីមួយចំនួនទៀតត្រូវព្យួរពីការងារដោយរដ្ឋមន្ត្រីការពារជាតិក្រោយការធ្វើអធិការកិច្ចមួយ។ ពួកគេទាំងអស់នឹងត្រូវបណ្តេញចេញពីតំណែង និងដកឈ្មោះចេញពីបញ្ជីកងទ័ពរុស្ស៊ី»។
សេចក្តីថ្លែងការណ៍ដដែលបានរិះគន់បណ្តាមន្ត្រីដែលត្រួវព្យួរភារកិច្ចទាំងនោះ ដោយសម្អាងលើហេតុផលថា ពួកគេធ្វេសប្រហែសនិងខ្ជីខ្ជាក្នុងការបំពេញភារកិច្ចនិងអនុវត្តកិច្ចការរបស់ខ្លួន។ មន្ត្រីជាន់ខ្ពស់ទាំងអស់នេះសុទ្ធតែទទួលខុសត្រូវចំពោះការបង្កើតបញ្ហាធ្ងន់ធ្ងរក្នុងស្ថាប័នដែលខ្លួនទទួលបន្ទុកជាពិសេសពាក់ព័ន្ធការហ្វឹកហ្វឺន និងសកម្មភាពយោធាប្រចាំថ្ងៃ ជាពិសេសកង្វះការថែទាំត្រឹមត្រូវសម្រាប់កងទ័ពដែលស្ថិតក្រោមឱវាទខ្លួន។
ទាក់ទិនការធ្វេសប្រហែស និងកំហុសពាក់ព័ន្ធការហ្វឹកហ្វឺនយោធានេះដែរ បើតាមសារព័ត៌មានរុស្ស៊ី RT ទាំងមេបញ្ជាការនិងនាយសេនាធិការ ក៏ដូចជាមន្ត្រីយោធាជាន់ខ្ពស់ច្រើនរូបទទួលការពិន័យយោធាដោយសារតែពួកគេអសមត្ថភាពក្នុងការរៀបចំការហ្វឹកហ្វឺននិងលំហាត់យោធាសម្រាប់ការប្រយុទ្ធកន្លងមក ហើយក៏មិនបានរៀបចំរបាយការណ៍ត្រឹមត្រូវពាក់ព័ន្ធស្ថានភាពជាក់ស្តែងក្នុងតំបន់។
យ៉ាងណាក៏ដោយ គេវាយតម្លៃថា ការផ្លាស់ប្តូរមុខតំណែងមន្ត្រីក្នុងរចនាសម្ព័ន្ធយោធាទ្រង់ទ្រាយធំនៅតំបន់តាមព្រំដែនបែបនេះ ទាក់ទងជាមួយការប្រឈមមុខគ្នាជាមួយបក្សសម្ព័ន្ធយោធាណាតូ។ មូលដ្ឋានទ័ពបាល់ទិកស្ថិតក្រោមរចនាសម្ព័ន្ធនៃភូមិភាគយោធារុស្ស៊ីទិសខាងលិចដែលមានតួនាទីសំខាន់ការពារទឹកដីរុស្ស៊ីជាប់ព្រំដែនអឺរ៉ុប៕
Tag:
Sergei Shoigu
បាល់ទិក
ណាតូ
© រក្សាសិទ្ធិដោយ thmeythmey.com