រដ្ឋក្មេងខ្ចី ស៊ូដង់ខាងត្បូងមិនរៀបចំរំលឹកខួបឯករាជ្យព្រោះគ្មានលុយ

អន្តរជាតិ

រដ្ឋក្មេងខ្ចី ស៊ូដង់ខាងត្បូងមិនរៀបចំរំលឹកខួបឯករាជ្យព្រោះគ្មានលុយ

01, Jul 2016 , 9:39 pm

រូបភាព

ដោយ: សៅ ផលនិស្ស័យ (Sao Phal Niseiy)

រដ្ឋាភិបាលស៊ូដង់ខាងត្បូង បានប្រកាសថា ឆ្នាំនេះខ្លួននឹងមិនរៀបចំការរំលឹកខួបឯករាជ្យលើកទី ៥ នៅថ្ងៃ ៩ កក្កដាខាងមុខនេះទេ។ ការសម្រេចមិនរៀបចំបុណ្យឯករាជ្យជាផ្លួវការនេះរបស់រដ្ឋដែលទើបមានអាយុ ៥ឆ្នាំនេះ វាពាក់ព័ន្ធជាមួយការចំណាយ។ ស៊ូដង់ខាងត្បូងគ្មានលុយ ព្រោះសេដ្ឋកិច្ចជួបវិបត្តិព្រោះសង្គ្រាមស៊ីវិល និងការធ្លាក់ចុះនៃតម្លៃប្រេងនៅទីផ្សារអន្តរជាតិផង។

សូមស្ដាប់ព័ត៌មានលម្អិត៖

រដ្ឋក្មេងជាងគេស៊ូដង់ខាងត្បូងមិនរៀបចំខួបរំលឹកថ្ងៃឯករាជ្យរបស់ខ្លួនឡើយនៅថ្ងៃ ៩កក្កដាខាងមុខនេះ។ហេតុផលសាមញ្ញបំផុតនៅពីការមិនរៀបចំការអបអរសាទរការប្រកាសឯករាជ្យនេះគឺ ការខ្វះខាតលុយកាក់។

ជាទម្លាប់ទៅហើយ ក្រោយប្រកាសឯករាជ្យពីស៊ូដង់នៅឆ្នាំ ២០១១ រដ្ឋាភិបាលស៊ូដង់ខាងត្បូងកំណត់យកថ្ងៃ ៩ ខែកក្កដាជាថ្ងៃរៀបចំពិធីអបអរសាទរទ្រង់ទ្រាយធំក្នុងចំណោមប្រជាជនស៊ូដង់ខាងត្បូងទូទៅផង។ កន្លងមក ថ្វីបើជួបសង្គ្រាមស៊ីវិលយ៉ាងណាក្តី ប្រទេសនេះនៅតែលៃលករៀបចំបុណ្យឯករាជ្យនេះដែរ។ ប៉ុន្តែឆ្នាំនេះមិនដូចឆ្នាំមុនឡើយ ព្រោះស៊ូដង់ខាងត្បូងបានជួបបន្ទុកផ្អែកសេដ្ឋកិច្ចធ្ងន់ពេក។

ពាក់ព័ន្ធការផ្អាករៀបចំបុណ្យឯករាជ្យទ្រង់ទ្រាយធំនេះដែរ បើយោងតាមសារព័ត៌មាន Al Jazeera រដ្ឋមន្ត្រីក្រសួងព័ត៌មានស៊ូដង់ខាងត្បូង Michael Makuei Lueth បានបកស្រាយថា ស៊ូដង់ខាងត្បូងមិនចង់ចំណាយលុយខ្ជះខ្ជាយឡើយ ក្នុងពេលដែលខ្លួនខ្វះខាត ។ លោកបានពន្យល់បន្ថែមថា ៖« យើងចង់ចំណាយលុយដែលយើងមាននៅសល់បន្តិចបន្តួចនោះដើម្បីដោះស្រាយរឿងផ្សេងទៀតវិញ»។

បើតាមរដ្ឋមន្ត្រីក្រសួងព័ត៌មានខាងលើ ការរៀបចំបុណ្យឯករាជ្យ ត្រូវចំណាយយ៉ាងហោចណាស់ ១០លានផោនលុយស៊ូដង់ខាងត្បូង ដែលវាមានតម្លៃប្រហែល៤៥ម៉ឺនដុល្លារអាមេរិកឯណោះ។ លោកបន្តថា៖« បើសិនជាយើងមានលុយប៉ុណ្ណឹង យើងនឹងប្រើប្រាស់វាដើម្បីដោះស្រាយបញ្ហាសេដ្ឋកិច្ចរបស់យើងវិញ។ ក្នុងនោះយើងអាចចំណាយលើប្រាក់បៀវត្សមន្ត្រីរាជការជាដើម»។

ប៉ុន្តែឆ្នាំមុនៗមានរៀបចំពិធីជាផ្លូវការទ្រង់ទ្រាយធំ និងមានការដើរហែរក្បួនព្យុហយាត្រាត្រឹមត្រូវ ដូច្នេះបានជាមានការចំណាយច្រើនបែបនេះ។

តាមពិតទៅ សេដ្ឋកិច្ចស៊ូដង់ខាងត្បូង ស្ទើរតែដួលរលំលែងដើរទៅមុខទៅហើយ។ នេះក៏ ដោយសារវារងការញ៉ាំញ៉ីដោយសង្គ្រាមស៊ីវិលផង និងដោយសារតម្លៃប្រេងឆៅធ្លាក់ចុះខ្លាំងនៅក្នុងទីផ្សារអន្តរជាតិផង។

សូមរំលឹកបន្តិចដែរ ស៊ូដង់ខាងត្បូងបានប្រកាសឯករាជ្យពីប្រទេសស៊ូដង់នៅថ្ងៃ ៩ខែកក្កដាឆ្នាំ ២០១១ ក្រោយមានការប្រយុទ្ធបង្ហូរឈាមគ្នាក្នុងសង្គ្រាមស៊ីវិលអស់រាប់ទសវត្សរ៍រវាងក្រុមជនជាតិអារ៉ាប់-ស៊ូដង់ដែលស្ថិតនៅភាគខាងជើង និងប្រជាជនស៊ូដង់ភាគខាងត្បូង។ ការប្រកាសឯករាជ្យនេះធ្វើឡើងដោយការរៀបចំប្រជាមតិមួយ ហើយលទ្ធផលបង្ហាញថា ប្រជាជនស៊ូដង់ខាងត្បូង ៩៩ ភាគរយជ្រើសរើសយកការប្រកាសឯករាជ្យ។ ក្រោយការបោះឆ្នោត សហគមន៍អន្តរជាតិជាពិសេសសហរដ្ឋអាមេរិកបានប្រកាសទទួលស្គាល់លទ្ធផលនេះ ហើយក្រោយមក មានការប្រកាសឯករាជ្យជាផ្លូវការតែម្តង។

ប៉ុន្តែក្រោយប្រកាសឯករាជ្យប្រហែលជា២ឆ្នាំ សង្គ្រាមស៊ីវិលផ្ទុះឡើង ក្រោយអនុប្រធានាធិបតី Riek Machar រៀបចំរដ្ឋប្រហារមួយប៉ុន្តែបរាជ័យដើម្បីទម្លាក់លោក Salva Kiir ។ សង្គ្រាមបានអូសបន្លាយប្រហែល៣ ឆ្នាំដោយបណ្តាលឲ្យជនស៊ីវិលរាប់ម៉ឺននាក់ស្លាប់ និងច្រើនជាង ២លាននាក់នេះទៀតត្រូវភៀសខ្លួន។ ប៉ុន្តែក្តីសង្ឃឹមតិចតួចមួយផុសរូបរាង ឡើង ព្រោះរដ្ឋាភិបាលនិងក្រុមឧទ្ទាម បានចរចាគ្នានិងបង្កើតកិច្ចព្រមព្រៀងសន្តិភាពមួយនៅឆ្នាំមុន។ ក្នុងខែមេសា មេដឹកនាំក្រុមឧទ្ទាម លោក Riek Machar បានត្រលប់មកស្បថចូលកាន់តំណែងជាអនុប្រធានាធិបតីដើម្បីដឹកនាំរដ្ឋាភិបាលរួបរួមជាតិមួយដើម្បីកសាងសន្តិភាពនិងកសាងប្រទេស៕