អន្តរជាតិ
ភេរវជន IS សាខាអាស៊ីខាងត្បូងនៅពីក្រោយការវាយប្រហារនិងចាប់ចំណាប់ខ្មាំងបង់ក្លាដែស
× មនុស្ស យ៉ាងហោចណាស់៥នាក់មានទាំងប៉ូលិសផងនោះបានស្លាប់ ក្នុងប្រតិបត្តិការរំដោះចំណាប់ខ្មាំងដែលត្រូវបានចាប់ខ្លួនដោយក្រុមប្រដាប់អាវុធមួយក្រុមនៅភោជនីយដ្ឋានមួយកន្លែងនៅបង់ក្លាដែសយប់ថ្ងៃសុក្រទី ១ កក្កដា។ ក្នុងចំណោមចំណាប់ខ្មាំងទាំងនោះអាចមានប្រជាជនជប៉ុនផងដែរ ហើយក្រុមភេរវជរដ្ឋឥស្លាមបានប្រកាសទទួលខុសត្រូវចំពោះករណីនេះ។
ចុងក្រោយកងកម្លាំងពិសេសបង់ក្លាដែសបានសម្រេចវាយឆ្មក់រំដោះចំណាប់ខ្មាំងដែលត្រូវបានចាប់ខ្លួនជាង ២០នាក់ដោយក្រុមប្រដាប់អាវុធនៅភោជនីយដ្ឋានមួយកន្លែងស្ថិតនៅទីក្រុង Dhaka ប្រទេសបង់ក្លាដែសនាយប់ថ្ងៃសុក្រទី ១ កក្កដា។ យោងតាមរបាយការណ៍ទីភ្នាក់ងារព័ត៌មានចិន Xinhua កងកុម្ម៉ង់ដូរពិសេសយ៉ាងហោចណាស់ ១០០នាក់បានចូលរួមក្នុងប្រតិបត្តិការរំដោះចំណាប់ខ្មាំងនេះផងដែរ។
របាយការណ៍បឋមពីមន្ត្រីមូលដ្ឋាន មនុស្សយ៉ាងហោចណាស់ ៥នាក់ស្លាប់បាត់បងជីវិតក្នុងយុទ្ធនាការរំដោះចំណាប់ខ្មាំងនេះ ហើយក្នុងនោះមានប៉ូលិស ២នាក់ផង។ កងកម្លាំងពិសេសបានរំដោះចំណាប់ខ្មាំងបានចំនួន ១១ នាក់ ហើយប្រតិបត្តិការនៅតែបន្ត។ ក្រុមខ្មាន់កាំភ្លើងមានគ្នាពី ៦ទៅ ៨នាក់ ហើយពួកគេក៏បានប្រើប្រាស់គ្រាប់បែកដៃថែមទៀតផង។
១.ក្រុមភេរវជនរដ្ឋឥស្លាមប្រកាសថាខ្លួននៅពីក្រោយការវាយប្រហារនិងចាប់ចំណាប់ខ្មាំង ភ្លាមៗក្រោយក្រុមប្រដាប់អាវុធចាប់ចំណាប់ខ្មាំង ក្រោយភេរវជនដែស្ហ ឬក្រុមភេរវជនរដ្ឋឥស្លាមនៅស៊ីរី និងអ៊ីរ៉ាក់ បានចេញមុខទទួលខុសត្រូវ។ ក្រុមនេះបានប្រកាសថា បណ្តាញរបស់ខ្លួននៅសាខាអាស៊ីខាងត្បូងជាអ្នកធ្វើសកម្មភាពនេះ។ ប៉ុន្តែ គេមិនទាន់សន្និដ្ឋានជារួមឡើយ ព្រោះនៅបង់ក្លាដែសប្រឈមបញ្ហាសន្តិសុខដែលបង្កដោយក្រុមភេរវជនច្រើនក្រុមដែរ។ ក្រុមអាល់កៃដា សាខាអាស៊ីខាងត្បូង និងក្រុមរដ្ឋឥស្លាមឬក្រុមដែស្ហជាក្រុមដែលមានឈ្មោះបោះសំឡេងខ្លាំងជាងគេ។
យោងតាមសារព័ត៌មាន New York Times គេមិនទាន់ហ៊ានវាយតម្លៃជារួមថាក្រុមណានៅពីក្រោយឲ្យប្រាកដទេ។ ប៉ុន្តែគេដាក់ការសង្ស័យខ្លាំងលើក្រុមភេរវជនដែស្ហ។ ស្របពេលដែលបណ្តាប្រទេសជាម៉ូស្លីមទូទាំងពិភពលោកកំពុងប្រារព្ធពិធីបុណ្យផង ក្រុមជ្រុលនិយមទាំងនេះបានអំពាវនាវនិងដាស់ស្មារតីក្រុមអ្នកគាំទ្រ និងសកម្មប្រយុទ្ធរបស់ខ្លួនទូទាំងពិភពលោកឲ្យចេញមុខធ្វើសកម្មភាពវាយប្រហារនៅកន្លែងមានមនុស្សច្រើនដូចជាព្រលានយន្តហោះ ភោជនីយដ្ឋាន និងពហុកីឡាដ្ឋានជាដើម។
២.ប្រជាជនជប៉ុនអាចនៅក្នុងចំណោមចំណាប់ខ្មាំង
ពាក់ព័ន្ធចំណាប់ខ្មាំងផងដែរនោះ លោក Yoshihide Suga រដ្ឋមន្ត្រីទទួលបន្ទុកគណរដ្ឋមន្ត្រីជប៉ុន បានលើកឡើងថា ជនជាតិជប៉ុនអាចស្ថិតនៅក្នុងចំណោមចំណាប់ខ្មាំងទាំងនោះ។ ខាងអាជ្ញាធរពាក់ព័ន្ធកំពុងដុតដៃដុតជើងដើម្បីស្វែងរកព័ត៌មាននិងត្រួតពិនិត្យមើលថា វាពិតជាមានជនជាតិជប៉ុនស្ថិតក្នុងចំណោមនោះឬអត់ផងដែរ។
សូមបញ្ជាក់បន្តិចដែរ កន្លងមកក្រុមភេរជនរដ្ឋឥស្លាមឬក្រុមដែស្ហសាខាងអាស៊ីខាងត្បូងនេះ បានសម្លាប់ប្រជាជនជប៉ុននិងអ៊ីតាលី ដែលជាអ្នកទេសចរក៏ដូចជាបណ្តាប្រជាជនបង់ក្លាដែសដែលជាអ្នកប្រកាន់និកាយស៊ីអ៊ីតផងដែរ
ចំណែកក្រសួងការបរទេសជប៉ុនវិញ បានប្រកាសថា ក្រុមអ្នកជំនាញនៃស្ថាប័នប្រឆាំងភេរវកម្មប្រចាំក្រសួងការបរទេសជប៉ុនដែលត្រូវបានបង្កើតឡើងកាលពីខែធ្នូ បានធ្វើដំណើរទៅកាន់ប្រទេសបង់ក្លាដែសរួចរាល់ហើយ៕
© រក្សាសិទ្ធិដោយ thmeythmey.com