សហគមន៍ជ្រាវជាសួនបន្ថែមួយដ៏ទាក់ទាញសម្រាប់ទេសចរណ៍ខេត្តសៀមរាប

ជាតិ

សហគមន៍ជ្រាវជាសួនបន្ថែមួយដ៏ទាក់ទាញសម្រាប់ទេសចរណ៍ខេត្តសៀមរាប

11, Jul 2016 , 5:37 pm

រូបភាព

ដោយ: អុីសា រ៉ហានី (Isa Rohany)

សៀមរាប៖ បើគេនិយាយពីសង្កាត់ជ្រាវ នោះគេនឹងនឹកដល់សួនបន្លែបៃតង ដែលអ្នកភូមិស្ទើរគ្រប់ផ្ទះ យកធ្វើជាមុខរបរ។ តាមការប៉ាន់ស្មាន អ្នកភូមិសង្កាត់ជ្រាវ ក្រុងសៀមរាប ប្រមាណ៨៥% គឺជាកសិករ ហើយ ៩៥%នៃបន្លែពួកគេ គឺជាបន្លែធម្មជាតិ ដែលពុំមានប្រើសារធាតុគីមី។

សហគមន៍ជ្រាវ ក៏កំពុងក្លាយជាទិសដៅមួយ សម្រាប់ភ្ញៀវទេសចរ។ ដោយមិនរាប់ពីភ្ញៀវទេសចរជាតិ ក្នុងមួយថ្ងៃមានភ្ញៀវទេសចរអន្តរជាតិជាមធ្យមប្រមាណ ៣០០នាក់ ដែលបានទៅទស្សនាសួនបន្លែ ក្នុងសហគមន៍ជ្រាវ។

លោក ក្រួច លី មន្ត្រីនៃសមាគមមជ្ឈមណ្ឌលព័ត៌មានសហគមន៍ ហៅកាត់ថា ICC ដែលជាដៃគូរអភិវឌ្ឍន៍មួយរបស់សហគមន៍ជ្រាវ បានឲ្យដឹងថា លោកបាននិងកំពុងធ្វើការយ៉ាងសកម្ម ដើម្បីធ្វើយ៉ាងណាឲ្យភ្ញៀវទេសចរចាប់អារម្មណ៍សួនបន្លែរបស់កសិករនៅសង្កាត់ជ្រាវ។ លោក ក្រួច លីបន្ថែមថា គោលបំណងសំខាន់គឺធ្វើយ៉ាងណា ប្រែក្លាយសង្កាត់ជ្រាវឲ្យទៅជាសង្កាត់បៃតង និងគ្មានជាតិគីមី។

គម្រោងលើកកម្ពស់ជីវភាពកសិករក្នុងសង្កាត់ជ្រាវ គឺបានបង្កើតឡើងក្នុងឆ្នាំ២០១២ ដោយធ្វើការលើគោលការណ៍ចំនួនពីរ។ ទីមួយ បណ្តុះបណ្តាលជំនាញវិជ្ជាជីវៈ និងទីពីរ លើកកម្ពស់កសិករក្នុងសហគមន៍ជ្រាវ តាមរយៈលើកទឹកចិត្តឲ្យដាំបន្លែធម្មជាតិ។ ក្រៅពីការងារទាំងនេះ ក្នុងគម្រោងរបស់អង្គការមជ្ឈមណ្ឌលព័ត៌មានសហគមន៍ ក៏មានជួយលើកកម្ពស់ជីវភាពប្រជាជន តាមរយៈការបង្កើតរទេះគោទេសចរណ៍ និងគម្រោងភូមិកសិកម្មនេះជាដើម។

សូមទស្សនារូបភាពមួយចំនួន ជុំវិញការអភិវឌ្ឍរបស់សហគមន៍ជ្រាវ ក្រុងសៀមរាប