ជាតិ
សង្គមជាតិ
បាក់ឌុប៖ បេក្ខជនថ្នាក់វិទ្យាសាស្ត្រប្រឡងគណិតវិទ្យា ២ម៉ោងកន្លះ
×
ភ្នំពេញ៖ ការប្រឡងសញ្ញាបត្រមធ្យមសិក្សាទុតិយភូមិ ចំណេះទូទៅ និងបំពេញវិជ្ជា នឹងប្រព្រឹត្តឡើងរយៈពេល ពីរថ្ងៃ គឺថ្ងៃទី២២-២៣ ខែសីហា ឆ្នាំ២០១៦នេះ។ បេក្ខជនថ្នាក់វិទ្យាសាស្រ្តមានរយៈពេលប្រឡង ២ម៉ោងកន្លះ សម្រាប់វិញ្ញាសាគណិតវិទ្យា។
យោងតាមសេចក្តីជូនដំណឹងរបស់ក្រសួងអប់រំ ចុះថ្ងៃទី១៨ ខែកក្កដា ឆ្នាំ២០១៦នេះ បេក្ខជនថ្នាក់វិទ្យាសាស្ត្រនឹងប្រឡងរយៈពេលពីរថ្ងៃ ទាំងក្នុងពេលព្រឹក និងរសៀល។ បេក្ខជនត្រូវប្រឡងវិញ្ញាសាចំនួន ៧រួមមាន គីមីវិទ្យា ជីវវិទ្យា ប្រវត្តិវិទ្យា ភាសាបរទេស អក្សរសាស្ត្រខ្មែរ រូបវិទ្យា និងគណិតវិទ្យា។
ការប្រឡងថ្នាក់វិទ្យាសាស្ត្រក្នុងថ្ងៃទីមួយ នឹងចាប់ផ្តើមពីម៉ោង ៧កន្លះ ដល់ម៉ោង ៩ព្រឹក សម្រាប់វិញ្ញាសា គីមីវិទ្យា រយៈពេលប្រឡង ៩០នាទី និងពីម៉ោង ៩កន្លះ ដល់ម៉ោង១១ សម្រាប់វិញ្ញាសា ជីវវិទ្យា រយៈពេលប្រឡង ៩០នាទី។ រីឯ ការប្រឡងពេលរសៀល នឹងចាប់ផ្តើមពីម៉ោង ២ ដល់ម៉ោង ៣ រសៀល សម្រាប់វិញ្ញាសា ប្រវត្តិវិទ្យា រយៈពេលប្រឡង ៦០នាទី និងពីម៉ោង ៣កន្លះ ដល់ម៉ោង ៤កន្លះ សម្រាប់វិញ្ញាសា ភាសាបរទេស រយៈពេលប្រឡង ៦០នាទី។
ចំពោះ ការប្រឡងបញ្ចប់ពេលព្រឹកក្នុងថ្ងៃទី២៣ ខែសីហា ការប្រឡងនឹងចាប់ ផ្តើមពីម៉ោង ៧កន្លះ ដល់ម៉ោង ៩ម៉ោង សម្រាប់វិញ្ញាសា អក្សរសាស្ត្រខ្មែរ រយៈពេល ៩០នាទី និងពីម៉ោង ៩កន្លះ ដល់ម៉ោង ១១ សម្រាប់វិញ្ញាសា រូបវិទ្យា រយៈពេលប្រឡង ៩០នាទី។ រីឯ ការប្រឡងពេលរសៀល បេក្ខជនត្រូវប្រឡងតែមួយវិញ្ញាសាប៉ុណ្ណោះ គឺមុខវិជ្ជា គណិតវិទ្យា ពីម៉ោង ២ ដលម៉ោង ៤កន្លះ រយៈពេលប្រឡង ១៥០នាទី។
បេក្ខជនប្រឡងបាក់ឌុបឆ្នាំនេះ មានចំនួនសរុប ៩៣.៧៥២នាក់ ចែកចេញជាមណ្ឌលប្រឡងចំនួន ១៥៧មណ្ឌល និង ៣.៧៨១បន្ទាប់ នៅទូទាំងប្រទេស។ ក្រសួងនឹងប្រកាសលទ្ធផល នៅរសៀលថ្ងៃទី១៣ ខែកញ្ញា ឆ្នាំ២០១៦ សម្រាប់មណ្ឌលប្រឡងនៅរាជធានីភ្នំពេញ និងខេត្តកណ្ដាល រីឯនៅថ្ងៃទី១៤ ខែកញ្ញា ឆ្នាំ២០១៦ សម្រាប់មណ្ឌលតាមបណ្តាខេត្តនានា៕
© រក្សាសិទ្ធិដោយ thmeythmey.com