ជាតិ
ព័ត៍មានសុខភាព
សង្គមជាតិ
លោក ម៉ម ប៊ុនហេង នឹងពិភាក្សាជាមួយលោក បេអាត រិចឆ្នឺរ ជុំវិញសំណើប្រឡងវេជ្ជបណ្ឌិតនៅគ្លីនិក លោក ម៉ម ប៊ុនហេង រដ្ឋមន្ត្រីក្រសួងសុខាភិបាល
× លោក ម៉ម ប៊ុនហេង រដ្ឋមន្ត្រីក្រសួងសុខាភិបាល នឹងពិភាក្សាលម្អិតជាមួយ លោក បេអាត រិចឆ្នឺរ ស្ថាបនិកមន្ទីរពេទ្យគន្ធបុប្ផា ជុំវិញការធ្វើឲ្យប្រសើរឡើងនូវគុណភាពសុខាភិបាលនៅកម្ពុជា។
ការឆ្លើយតបបែបនេះតាមរយៈសារព័ត៌មានថ្មីៗ គឺធ្វើឡើងបន្ទាប់ពី លោក បេអាត រិចឆ្នឺរ បានស្នើឲ្យក្រសួងសុខាភិបាល រៀបចំការប្រឡងត្រួតពិនិត្យវេជ្ជបណ្ឌិត ដែលកំពុងបម្រើការនៅតាមគ្លីនិកឯកជន និង បិទគ្លីនិកឯកជនទាំងឡាយណា ដែលមានវេជ្ជបណ្ឌិតមិនបានប្រឡងជាប់។ ការស្នើរបស់លោក បេអាត រិចឆ្នឺរ និងជាទីប្រឹក្សាក្រសួងសុខាភិបាលផងនោះ គឺបន្ទាប់ពីមន្ទីរពេទ្យមន្ទីរពេទ្យបានទទួល កុមារឈឺគ្រុនឈាមធ្ងន់ធ្ងរដែលគេបញ្ជូនចេញគ្លីនិកឯកជន និងមន្ទីរពេទ្យបង្អែកមួយចំនួន ដោយពុំបានព្យាបាលឲ្យបានត្រឹមត្រូវ។
ប៉ុន្តែមុននឹងរៀបរាប់ពីវិធានការនានា ដែលក្រសួងសុខាភិបាល នឹងត្រូវអនុវត្តនោះ លោក ម៉ម ប៊ុនហេង បានថ្លែងអរគុណ ចំពោះស្ថាបនិកមន្ទីរពេទ្យគន្ធបុប្ផា ដែលបានប្រាប់ពីបញ្ហានានាដល់ក្រសួងសុខាភិបាល ដើម្បីជួយកែលម្អវិស័យសុខាភិបាលនៅកម្ពុជា។
លោក ម៉ម ប៊ុនហេង បានអះអាងប្រាប់សារព័ត៌មានថ្មីៗយ៉ាងដូច្នេះថា៖«ខ្ញុំនឹងពិភាក្សាជាមួយគាត់ ថាតើយើងត្រូវបណ្តុះបណ្តាលគ្រូពេទ្យយ៉ាងម៉េច បច្ចេកទេសយ៉ាងម៉េច ទាក់ទងនឹងការថែទាំកុមារ។ យើងជួបគាត់ ធ្វើតែម្តង យើងរួមគ្នាដើម្បីលើកកម្ពស់គុណភាពសុខាភិបាលយើង»។
តែយ៉ាងណាក៏ដោយ លោករដ្ឋមន្ត្រីក្រសួងសុខាភិបាល មិនបានបញ្ជាក់ទេថា តើត្រូវរៀបចំឲ្យមានការប្រឡង ដូចការស្នើរបស់លោក បេអាត រិចឆ្នឺរ ដែលជាទីប្រឹក្សារបស់ក្រសួងសុខាភិបាល ឬយ៉ាងណានោះទេ។
វិស័យសុខាភិបាលកម្ពុជា នៅតែរងការរិះគន់មិនដែលដាច់ពីមហាជន។ កន្លងមក ប្រជាពលរដ្ឋភាគច្រើនបានទៅរកសេវាព្យាបាលនៅឯបរទេស ដោយសារតែពួកគេបាត់បង់ទំនុកចិត្តលើវិស័យសុខាភិបាល និងខ្លាចរអាលើសេវាសុខាភិបាលកម្ពុជា៕
Tag:
ម៉ម ប៊ុនហេង
បេអាត រិចឆ្នឺរ
សុខាភិបាល
© រក្សាសិទ្ធិដោយ thmeythmey.com