អន្តរជាតិ
ដូណាល់ ត្រាំ៖ ខ្ញុំដឹងពីនយោបាយការបរទេសច្បាស់ជាង បារ៉ាក់ អូបាម៉ា ឆ្ងាយណាស់
× ដោយទ្រាំមិនបានជាមួយការរិះគន់របស់លោក បារ៉ាក់ អូបាម៉ា លោក ដូណាល់ត្រាំ បានចេញមុខវាយប្រហារដោយពាក្យសម្តីវិញថា លោក អូបាម៉ា ប្រហែលជាប្រធានាធិបតីដែលអាក្រក់បំផុតម្នាក់។ រឿងដែលគួរឲ្យចាប់អារម្មណ៍គឺ បេក្ខជនប្រធានាធិបតីបក្សសាធារណរដ្ឋរូបនេះក៏បានសរសើរខ្លួនឯងផងដែរថា លោកមានចំណេះដឹងផ្នែកនយោបាយការបរទេស ច្រើនជាងលោក អូបាម៉ា មានផងក៏មិនដឹង។ លោកក៏ចាប់ផ្តើមពន្យល់ជាហូរហែរពាក់ព័ន្ធអ្វីដែលលើកឡើងកន្លងមកជាពិសេសការពង្រឹងទំនាក់ទំនងជាមួយរុស្ស៊ី និងដើម្បីឈានទៅសហការគ្នាដោះស្រាយបញ្ហារួមគ្នាផង។ លោកក៏ចោទសួរវិញថា វាមិនមែនជារឿងល្អទេអី ដែលយើងសហការគ្នានោះ។
សូមស្តាប់ការបកស្រាយរបស់លោក សៅ ផលនិស្ស័យ៖
លោក បារ៉ាក់ អូបាម៉ា នាថ្ងៃអង្គារទី ២ ខែសីហា បានប្រកាសប្រាប់គេឯងជាថ្មីក្នុងសន្និសីទសារព័ត៌មានរួមគ្នាជាមួយលោក លី សៀនឡុង ថា បេក្ខជនប្រធានាធិបតីបក្សសាធារណរដ្ឋលោក ដូណាល់ ត្រាំ មិនមានលក្ខណៈសម្បត្តិត្រឹមត្រូវដើម្បីធ្វើជាប្រធានាធិបតីនោះឡើយ។ លោកបានបន្តលើកឡើងបញ្ហាច្រើនជាពិសេសពាក់ព័ន្ធចំណេះដឹងរបស់លោក ដូណាល់ ត្រាំ ពាក់ព័ន្ធនយោបាយការបរទេសតែម្តង។
ប៉ុន្មានម៉ោង ក្រោយបានលឺការរិះគន់ លោក ដូណាល់ ត្រាំ ទ្រាំមិនបានចេញមុខវាយបកតបសម្តីរិះគន់លោក អូបាម៉ា វិញដែរ។ បេក្ខជនម្នាក់នេះប្រហែលជាខឹងសម្បារខ្លាំងនៅពេលដែលលោក បារ៉ាក់ អូបាម៉ា ហែកកេរ្តិ៍រឿងអាស្រូវរបស់លោកផង បន្តុះបង្អាប់លោកផង ហើយឆ្លៀតបញ្ចុះបញ្ចូលឲ្យបណ្តាអ្នកសាធារណរដ្ឋដកការគាំទ្រចំពោះរូបលោកផង នៅចំពោះមុខមេដឹកនាំបរទេសនោះ។
ក្នុងបទសម្ភាសន៍មួយជាមួយសារព័ត៌មាន Fox News រយៈពេលជិត ១៣ នាទី អ្នកសារព័ត៌មានចាប់ផ្តើមដោយបង្ហាញខ្សែវីដេអូខ្លីរបស់លោក អូបាម៉ា ដែលរិះគន់លោកនោះ ហើយសុំប្រតិកម្មតបពីលោក ដូណាល់ ត្រាំផ្ទាល់។ សេដ្ឋីអចលនទ្រព្យរូបនេះចាប់ផ្តើមចម្អកឲ្យលោក បារ៉ាក់ អូបាម៉ា វិញដោយព្រលយពាក្យថា លោក បារ៉ាក់ អូបាម៉ា ពេលចុះចេញពីតំណែងអាចនឹងក្លាយជាប្រធានាធិបតីដែលអាក្រក់ផុតលេខរបស់អាមេរិក។ ហើយលោកបានបន្តអួតពីសមត្ថភាពខ្លួនក្នុងការកាន់កាប់ការងារធំៗ និងចំណេះដឹងផ្នែកនយោបាយការបរទេសផងដែរ ដើម្បីបង្ហាញឲ្យឃើញថាសម្តីលោកអូបាម៉ា ដែលថាលោកមិនដឹងអ្វីសោះនោះពិតជាខុសទាំងស្រុង។
១.ខ្ញុំដឹងច្រើនជាលោក អូបាម៉ា ផងរឿងនយោបាយការបរទេស
បើតាមការលើកឡើងក្នុងបទសម្ភាសន៍ លោក ដូណាល់ ត្រាំ ប្រហែលជាមានចំណេះដឹងផ្នែកនយោបាយការបទេសច្រើនជាលោក បារ៉ាក់ អូបាម៉ា ផង។ បេក្ខជនរូបនេះលើកឡើងចំៗតែម្តងពីចំណុចខ្សោយរបស់រដ្ឋបាលលោក បារ៉ាក់ អូបាម៉ា ក្នុងការដោះស្រាយបញ្ហាសន្តិសុខនៅអឺរ៉ុបខាងកើតជាពិសេសបញ្ហាអ៊ុយក្រែន។
សូមបញ្ជាក់បន្តិចដែរថា មូលហេតុដែលគេថា លោកមិនសូវមានចំណេះដឹងផ្នែកការបរទេស ព្រោះអ្វីដែលលោកលើកឡើងភាគច្រើនផ្ទុយស្រឡះពីអាមេរិកកំពុងធ្វើបច្ចុប្បន្នជាពិសេសនយោបាយការបរទេសតែម្តង។ សម្តីរបស់លោកគ្រាប់ម៉ាត់ធ្វើឲ្យគេភ័យខ្លាច និងបារម្ភខ្លាំងពីអនាគតអាមេរិក។ ជាក់ស្តែង ពាក់ព័ន្ធបញ្ហាសន្តិសុខ លោក ដូណាល់ត្រាំ ធ្លាប់ព្រមានបោះបង់ណាតូ និងទារថ្លៃការពារពីសមាជិកណាតូនៅអឺរ៉ុប។ ស្តារចំណងទំនាក់ទំនងជាមួយរុស្ស៊ីឬ ចែកអំណាចអាមេរិកជាមួយរុស្ស៊ី និងចិន ក៏ជាចំណុចមួយដែលលោកពិចារណាដែរ។ ហើយលោកក៏អះអាងផងដែរថា ដើម្បីការពារប្រយោជន៍ផ្នែកពាណិជ្ជកម្មរបស់អាមេរិក លោកអាចនឹងលុបចោល ឬចរចាឡើងវិញលើកិច្ចព្រមព្រៀងពាណិជ្ជកម្មធំៗចំនួនពីរក្នុងនោះមានកិច្ចព្រមព្រៀងភាពជាដៃគូអន្តរប៉ាស៊ីហ្វិក (TPP) និងកិច្ចព្រមព្រៀងភាពជាដៃគូពាណិជ្ជកម្មនិងវិនិយោគអន្តរអាត្លង់ទិកផងនោះ។
ត្រលប់មកវិញ លោក ដូណាល់ ត្រាំ និយាយថា៖« ខ្ញុំជឿជាក់ថា ខ្ញុំដឹងច្រើនជាងគាត់ឆ្ងាយណាស់រឿងនយោបាយការបរទេសនេះ។ លោក អូបាម៉ា និយាយដដែលៗពីអ៊ុយក្រែន។ ឃើញហើយតើថាតើលោក អូបាម៉ា រឹងត្អឹងប៉ុណ្ណាលើបញ្ហានេះ ហើយរឹងត្អឹងប៉ុណ្ណាដែរជាមួយរុស្ស៊ីនោះ។ ចុងក្រោយរុស្ស៊ីក្រសោបយកគ្រីមៀ (Crimea) ទៅបាត់។ ខ្ញុំពិតជាយល់ច្បាស់ពីបញ្ហានេះ »។
២. ដូណាល់ត្រាំ៖ ជារឿងអស្ចារ្យ ពេលអាមេរិកនិងរុស្ស៊ីសហការគ្នាដោះស្រាយបញ្ហាអន្តរជាតិ
បន្ទាប់ពីអួតថា លោកខ្លាំងជាងលោក អូបាម៉ាហើយ លោក ដូណាល់ ត្រាំ ព្យាយាមពន្យល់មនុស្សទូទៅផងថា អ្វីដែលលោកលើកពិតជាត្រឹមត្រូវ សមហេតុផល និងមិនមែនជាកំហុសឆ្គងឡើង។ លោកទាញយករឿងស្តារទំនាក់ទំនងនិងសហការជាមួយរុស្ស៊ីបើសិនជាលោកជាប់ឆ្នោតនោះជាឧទាហរណ៍ដែរ។
ក្នុងបទសម្ភាសន៍ដដែល បេក្ខជនប្រធានាធិបតី រូបនេះពន្យល់ថា វាជារឿងអស្ចារ្យ បើសិនជាមហាអំណាចដូចអាមេរិកទៅសហការជាមួយរុស្ស៊ីដើម្បីដោះស្រាយបញ្ហាធំៗរួមគ្នា។ លោកចោទសួរបែបចម្អកថា ៖« ប្រសិនយើងអាចត្រូវរ៉ូវជាមួយរុស្ស៊ី និងអាចធ្វើការជាមួយគ្នាដើម្បីកម្ចាត់ក្រុមភេរវជនរដ្ឋឥស្លាម ដោយសហការជាមួយបក្សសម្ព័ន្ធណាតូ និងប្រទេសផ្សេងទៀតនោះ វាមិនមែនជារឿងល្អទេអី?ចុះ គិតចង់វាយគ្នាឬយ៉ាងម៉េច?»។
ស្របពេលជាមួយគ្នានោះ លោក ដូណាល់ ត្រាំ ក៏ព្រមានផងដែរថា បើសិនជាអាមេរិកចង់អន្តរាគមន៍ជួយអ៊ុយក្រែន និងដណ្តើមយកទឹកដីគ្រីមៀមកវិញនោះ សង្គ្រាមលោកលើកទីបីនឹងកើតឡើងមិនខាន។
ប្រាកដដូចលោក ដូណាល់ ត្រាំ លើកឡើងអញ្ចឹង។ វាពិតជាល្អនៅពេលមហាអំណាចសហការគ្នាដោះស្រាយបញ្ហាសំខាន់ៗរបស់ពិភពលោក ជាពិសេសកិច្ចការសន្តិសុខអន្តរជាតិតែម្តង។ ប៉ុន្តែសួរថា តើអាមេរិកមានឆន្ទៈក្នុងការសហការជាមួយរុស្ស៊ីកម្រិតណានោះ វាជារឿងដោយឡែក ហើយតើលោកដូណាល់ ត្រាំ ពិតជានឹងក្លាយជាប្រធានាធិបតីអាមេរិកនៅពេលខាងមុខនេះក៏គ្មានអ្នកណាម្នាក់ដឹងច្បាស់ដែរ៕
© រក្សាសិទ្ធិដោយ thmeythmey.com