អះ​ម៉ាត់ យ៉ះ​យ៉ា​៖ ខ្ញុំ​សុំទោស​ដែល​ខ្ញុំ​និយាយ​ការពិត​ថា អូស្មាន ហាស្សាន់ ជា​អ្នកធ្វើ​ផ្លូវ​
ជាតិ
សង្គមជាតិ
អះ​ម៉ាត់ យ៉ះ​យ៉ា​៖ ខ្ញុំ​សុំទោស​ដែល​ខ្ញុំ​និយាយ​ការពិត​ថា អូស្មាន ហាស្សាន់ ជា​អ្នកធ្វើ​ផ្លូវ​
06, Aug 2016 , 11:15 am        
រូបភាព
លោក អះ​ម៉ាត់ យ៉ះ​យ៉ា នៅខាងឆ្វេង និងលោក អូស្មាន ហាស្សាន់ នៅខាងស្តាំ
លោក អះ​ម៉ាត់ យ៉ះ​យ៉ា នៅខាងឆ្វេង និងលោក អូស្មាន ហាស្សាន់ នៅខាងស្តាំ
 ​សារព័ត៌មាន​ជាច្រើន បានសរសេរថា លោក អះ​ម៉ាត់ យ៉ះ​យ៉ា បានធ្វើការ​សុំទោស​លោក អូស្មាន ហាស្សាន់ ពាក់ព័ន្ធ​រឿង​ដែល​លោក​បាន​និយាយថា គម្រោង​ធ្វើ​ផ្លូវ​កាត់​វិហារ​បឹងកក់ មានការ​រៀបចំ​ដោយផ្ទាល់​ពី​លោក អូស្មាន ហាស្សាន់​។ ការចុះផ្សាយ​របស់​សារព័ត៌មាន​ទាំងនោះ ធ្វើ​ឲ្យ​រដ្ឋលេខាធិការ​ក្រសួង​សង្គមកិច្ច លោក អះ​ម៉ាត់ យ៉ះ​យ៉ា​នៅ​មិន​សុខ ហើយ​នៅ​ថ្ងៃទី​៥ សីហា​ម្សិលមិញ លោក​បាន​ចេញមុខ​បកស្រាយ​ការពារ​ពាក្យសំដី​របស់​លោក​នាពេល​កន្លងមក​។​

 
​ពាក្យ​សុំទោស​របស់លោក អះ​ម៉ាត់ យ៉ះ​យ៉ា ដែល​ប្រាប់​ក្រុម​អ្នកសារព័ត៌មាន​កាលពី​ថ្ងៃទី​២ សីហា ក្រោយពេល​លោក​ចេញពី​តុលាការ មិន​ដូច​អ្វីដែល​មនុស្ស​ភាគច្រើន​យល់ថា ទំនងជា​ពូ​សុំទោស​ក្មួយ ព្រោះតែ​ការនិយាយ​មិន​ពិត ប៉ះពាល់​ដល់​កិ​តិ្ត​យស​ក្មួយ និង​ត្រូវ​ក្មួយ​ប្តឹង​ឡើង​តុលាការ​នោះទេ​។ តាមពិត​វា​មិន​ដូច្នោះ​ទេ​។ លោក អះ​ម៉ាត់ យ៉ះ​យ៉ា ដែល​ត្រូវ​ក្មួយ​ខ្លួនឯង​ប្តឹង​ទារ​សំណង​១​លាន​ដុល្លារ ពាក់ព័ន្ធ​រឿង​ការពារ​ដី​វិហារ​បឹងកក់​នោះ បកស្រាយ​ថា លោក​នៅតែ​និយាយថា ក្មួយ​របស់លោក គឺ​លោក អូស្មាន ហាស្សាន់ ដែល​គេ​ស្គាល់​ថា ជា​ឧកញ៉ា​ម្នាក់​ដ៏​មាន​ឥទ្ធិពល និង​ជា​រដ្ឋលេខាធិការ​ក្រសួង​ការងារ​ផង​នោះ ពិតជា​នៅ​ពីក្រោយ​ខ្នង គម្រោង​បើកផ្លូវ​កាត់​វិហារ​បឹងកក់​ពិតមែន ហើយ​លោក​ក៏មាន​ឯកសារ​បញ្ជាក់​ត្រឹមត្រូវ​។​
 
​នៅ​វិហារ​បឹងកក់ នៅ​រសៀល​ថ្ងៃទី​៥ សីហា​ម្សិលមិញ លោក យ៉ះ​យ៉ា បាន​និយាយ​យ៉ាង​ដូច្នេះ​ថា​៖« ខ្ញុំ​និយាយ​រឿង​ពិត​ទាំងអស់​...​នៅក្នុង​តុលាការ​ខ្ញុំ​បាន​និយាយថា បើ​ខ្ញុំ​និយាយ​ទៅហើយ ប៉ះពាល់​កិត្តិយស​អូស្មាន ហាស្សាន់ ឲ្យ​ខ្ញុំ​សុំទោស​។ ដោយសារ​អ្វីដែល​ខ្ញុំ​និយាយ (​ប្រាប់​អ្នកសារព័ត៌មាន​កន្លង​មក​) ជា​ការពិត​ទាំងអស់​»​។​
 
​អ្នកនយោបាយ​ចាស់វស្សា លោក អះ​ម៉ាត់ យ៉ះ​យ៉ា បន្ត​ការពារ​រាល់​ពាក្យសំដី​ដែល​ខ្លួន​បាន​និយាយ​រឿង​ធ្វើ​ផ្លូវ​កាត់​វិហារកាល់​សើ​កាល់ ឫ​វិហារ​បឹងកក់​នោះ​ថា លោក​មាន​ឯកសារយោង​ត្រឹមត្រូវ ដើម្បី​បញ្ជាក់ថា លោក ហាស្សាន់ និង​សហការី​ពិតជា​អ្នក​ផ្តើម​លើ​គម្រោង​ធ្វើ​ផ្លូវ​ពិតប្រាកដ​មែន​។ «...​រឿង​ពិត ខ្ញុំ​មាន​កំហុស​អី​...»​។ នេះ​ជាការ​បញ្ជាក់បន្ថែម​រប​ស់លោក យ៉ះ​យ៉ា​។​
 
​សំណុំរឿង​ប្តឹងផ្តល់​គ្នា រវាង​អ្នកនយោបាយ​ក្នុង​គណបក្ស​តែមួយ បានចាប់ផ្តើម​កាលពី​ចុងខែ​មេសា​កន្លងទៅ​។ លោក អូស្មាន ហាស្សាន់ បាន​ប្តឹង​ពូ​របស់ខ្លួន​គឺ​លោក អះ​ម៉ាត់ យ៉ះ​យ៉ា ពីបទ​បរិហាកេរ្តិ៍​ជា​សាធារណ ជុំវិញ​ដែល​លោក អះ​ម៉ាត់ យ៉ះ​យ៉ា បានផ្តល់​បទ​សម្ភាស​ជាមួយ​សារព័ត៌មាន​ថ្មីៗ ដែលថា លោក ហាស្សាន់ ទទួលបាន​ផលប្រយោជន៍​លើ​គម្រោង​បើកផ្លូវ​កាត់​ដី​វិហារ​បឹងកក់ ក្នុង​តំបន់​អភិវឌ្ឍន៍​បឹងកក់​។​
 
​បញ្ហា​នេះដែរ នាយក​រដ្ឋបាល​សាលា​រាជធានី​ភ្នំពេញ លោក មាន ចាន់​យ៉ា​ដា ធ្លាប់បាន​ប្រាប់​សារព័ត៌មាន​ថ្មីៗ​ថា គម្រោង​ខាងលើ​ជាគោលការណ៍​របស់​រាជ​រដ្ឋាភិបាល ក្នុង​បំណង​បញ្ចៀស​ការកកស្ទះ​ចរាចរណ៍​ក្នុង​ទីក្រុង​។ លោក​បញ្ជាក់ថា គម្រោង​នេះ​មានការ​ឯកភាព​ពី​ម្ចាស់​ក្បាលដី​រួចហើយ​ដែរ គឺ​លោក អូស្មាន ហាស្សាន់ និង​មួយទៀត​គឺ​លោក វ៉ាន់ ម៉ាត់ សមាជិក​ព្រឹទ្ធសភា ដោយមាន​ការដោះដូរ​ដី​ត្រឹមត្រូវ គ្មាន​ភាគី​ខាង​ណា​ខាតបង់​នោះឡើយ​។​
 
​ដី​វិហារ​បឹងកក់ ដែល​ចាត់ទុកជា​ដី​សមូហភាព ត្រូវបាន​បែងចែក​ជា​ប្លង់​ពីរ​ផ្សេងគ្នា​។ ប្លង់​ទីមួយ​គ្រប់គ្រង​ដោយ​លោក វ៉ាន់ ម៉ាត់ និង​មួយចំណែក​ទៀត គ្រប់គ្រង​ដោយ លោក អូស្មាន ហាស្សាន់​។ កន្លងមក​សម្តេចនាយក​រដ្ឋមន្ត្រី ហ៊ុន សែន ធ្លាប់បាន​សាទរ​ចំពោះ​គម្រោង​ផ្គុំ​ប្លង់​នេះ​តែមួយ​។ សាសនិក​ឥស្លាម​មួយចំនួន ចង់​ឲ្យ​ដាក់​ប្លង់​នេះ​ជា​កម្មសិទ្ធិ​របស់​សហគម​ន៍​ឥស្លាម ចៀសវាង​ឲ្យ​បុគ្គល​គ្រប់គ្រង​។​
 
​យោងតាម​ផែនទី​គ្រោង​ធ្វើ​ផ្លូវ​កាត់​តាម​វិហារ​បឹងកក់ បាន​បង្ហាញថា ផ្លូវ​ដែល​គ្រោង​ធ្វើ​នោះ​មាន​ចំងាយ​ប្រមាណ ៤០​ម៉ែត្រ ពី​កាំជណ្តើរ​វិហារ​។ ការណ៍​នេះហើយ ដែល​សាសនិក​ឥស្លាម​មួយចំនួន បាន​តវ៉ា ជំទាស់​លើ​គម្រោង​នេះ ដោយ​ពួកគេ​អះអាងថា នឹង​បង្ក​ភាពអនាធិបតេយ្យ​ក្នុង​បរិវេណ​ទីសក្ការរ​បស់​សាសនិក​ឥស្លាម​។ ចំណែក​ភាគី​គាំទ្រ លើក​ហេតុផល​ថា គម្រោង​នេះ​នឹង​ជួយ​អភិវឌ្ឍន៍​ដល់​សហគមន៍​ឥស្លាម តាមរយៈ​ការដោះដូរ​ដី​ជាមួយ​រដ្ឋាភិបាល ហើយ​គេ​អាច​ប្រើប្រាស់​ដី​នោះ ដើម្បី​សង់សាលា​រៀន ឫ​មន្ទីរពេទ្យ​ជាដើម​។​ល​។​
 
​ក្រោយពី​ស្ងប់ស្ងាត់​មួយរយៈ គម្រោង​នេះ​មិនទាន់​អាច​ដំណើរការ​នៅឡើយ ខណៈដែល​លោក អះ​ម៉ាត់ យ៉ះ​យ៉ា ធ្លាប់​ប្រាប់​អ្នកសារព័ត៌មាន​កាលពី​ពេល​ថ្មីៗ​នេះ​ថា លោក​បាន​ជួប​អភិបាល​រាជធានី​ភ្នំពេញ ហើយ​លោក​បាន​និយាយថា គម្រោង​នេះ​មិនទាន់​ច្បាស់លាស់​នៅឡើយ​៕

Tag:
 អះ​ម៉ាត់ យ៉ះ​យ៉ា
  ស្មាន ហាស្សាន់
© រក្សាសិទ្ធិដោយ thmeythmey.com