អន្តរជាតិ
នយោបាយអន្តរជាតិ
ប្រជាមតិថៃ ចាប់ផ្តើម ខណៈលទ្ធផលមិនផ្លូវការ នឹងប្រកាសនៅមុនម៉ោង៩យប់នេះ
លោកនាយករដ្ឋមន្ត្រីថៃ ប្រាយុទ្ធ ចន្ទ អូចា ចូលរួមបោះឆ្នោតនៅព្រឹកនេះ (ប្រភពរូបភាព Reuters)
×![]()
ដូចការរំពឹងទុក នៅម៉ោង ៨ ព្រឹកថ្ងៃអាទិត្យនេះ ពលរដ្ឋថៃ បានចាប់ផ្តើមទៅបោះឆ្នោតប្រជាមតិលើសេចក្តីព្រាងរដ្ឋធម្មនុញ្ញថ្មីហើយ។ ការបោះឆ្នោតនេះ នឹងត្រូវបិទបញ្ចប់នៅម៉ោង ៤ រសៀលថ្ងៃនេះផងដែរ។ នេះ គឺជាការបោះឆ្នោតប្រជាមតិលើកដំបូងហើយនៅក្នុងរបបដឹកនាំរបស់រដ្ឋាភិបាលសឹកថៃក្នុងរយៈពេលជាងពីរឆ្នាំមកនេះ។ 
បើយោងតាមសេចក្តីប្រកាសរបស់គណៈកម្មាធិការរៀបចំការបោះឆ្នោតថៃដែលបានរាយការណ៍ដោយភ្នាក់ងារព័ត៌មានរដ្ឋចិន Xinhua លទ្ធផលមិនផ្លូវការនៃការធ្វើប្រជាមតិសេចក្តីព្រាងរដ្ឋធម្មនុញ្ញ នឹងត្រូវប្រកាសនៅមុនម៉ោង៩ យប់នេះហើយ។
សូមសម្រាបផងដែរថា ប្រជាមតិលើសេចក្តីព្រាងរដ្ឋធម្មនុញ្ញនេះ មិនមានចំណុចច្រើនអ្វីនោះទេ ពោលគឺ ប្រជាពលរដ្ឋ នឹងចូលបោះឆ្នោត ថាតើគួរ«គាំទ្រ» ឬ «ប្រឆាំង» ទៅលើសំណួរពីរស្តីពីសេចក្តីព្រាងនោះប៉ុណ្ណោះ។ សំណួរទី១នោះគឺ «តើពួកគេទទួលយកឬអត់ចំពោះសេចក្តីព្រាងរដ្ឋធម្មនុញ្ញថ្មីនោះ?»។ សំណួរទី២នោះគឺ «ពួកគេ នឹងអនុញ្ញាតឲ្យសមាជិកសភាព្រឹទ្ធសភាដែលកើតចេញពីការតែងតាំង២៥០រូបអាចចូលរួមក្នុងការបោះឆ្នោតជ្រើសរើសនាយករដ្ឋមន្ត្រីសម្រាប់រយៈពេល៥ឆ្នាំដំបូង ក្រោយពេលសេចក្តីព្រាងនោះ ត្រូវបានអនុម័ត និងចូលជាធរមានជាផ្លូវការឬអត់?»
បើសេចក្តីព្រាងច្បាប់លើកទី២នេះ អាចទទួលបានការគាំទ្រច្រើនពីប្រជាជន នោះសេចក្តីព្រាងនឹងក្លាយជារដ្ឋធម្មនុញ្ញទី២០ក្នុងអាយុកាលនៃលទ្ធិប្រជាធិបតេយ្យថៃ៨៤ឆ្នាំ។ ថៃ ចាប់ផ្តើមមានរដ្ឋធម្មនុញ្ញដំបូងនៅក្នុងឆ្នាំ១៩៣២ បន្ទាប់ពី យោធា បានផ្លាស់ប្តូររបបនយោបាយរាជានិយមផ្តាច់ការមកកាន់រាជានិយមអាស្រ័យរដ្ឋធម្មនុញ្ញ៕
Tag:
ថៃ
អាស៊ាន
© រក្សាសិទ្ធិដោយ thmeythmey.com
