ជាតិ
លោក ថោង ខុន សន្យាជួយសហគមន៍ជ្រាវឲ្យក្លាយជាសហគមន៍ទេសចរណ៍ស្តង់ដា
× សៀមរាប៖ សហគមន៍បឹងធម្មជាតិពារាំង ត្រូវបានការពារ និងគ្រប់គ្រងដោយពលរដ្ឋក្នុងសហគមន៍ជ្រាវ។ វត្តមានសត្វស្លាបជាច្រើនរយក្បាល បានធ្វើឲ្យតំបន់បឹងធម្មជាតិមួយនេះ ក្លាយជាគោលដៅទេសចរណ៍ថ្មីនៅក្នុងខេត្តសៀមរាប។ ក្រៅពីនេះ សហគមន៍ជ្រាវដែលមានសមាជិកចូលរួមចំនួន ៥៧នាក់ បានរៀបចំដាំដំណាំតាមបែបធម្មជាតិផងដែរ។ យ៉ាងណា អ្វីដែលដែលលំបាកសម្រាប់តំបន់នេះ គឺពុំទាន់មានប្រព័ន្ធផ្លូវថ្នល់ល្អនៅឡើយ ហើយវាកាន់តែពិបាកក្នុងរដូវវស្សានេះ ដែលភ្ញៀវទេសចរប៉ងទៅកម្សាន្ត។ រដ្ឋមន្ត្រីក្រសួងទេសចរណ៍លោក ថោង ខុន បានកោតសរសើរចំពោះការខិតខំប្រឹងប្រែង របស់សហគមន៍ ហើយលោកសន្យា ជួយរៀបចំ និងកែប្រែសហគមន៍នេះ ឲ្យត្រូវខ្នាត និងមានស្តង់ដាជាសហគមន៍ទេសចរណ៍។
សត្វស្លាបខ្ទង់ម៉ឺនក្បាល ដែលទំនងចេញពីតំបន់ព្រែកទាល់ បានបង្ហាញវត្តមានក្នុងបឹងធម្មជាតិពារាំង។ ដើម្បីការពារ និងថែរក្សាសត្វស្លាបទាំងនោះ កុំឲ្យហើរចេញពីបឹងពារាំង អ្នកភូមិក្នុងសហគមន៍ជ្រាវបានប្រឹងទប់ស្កាត់បទល្មើសនេសាទក្នុងតំបន់នោះ។ ត្រីគឺជាប្រភពចំណីដ៏សំខាន់ សម្រាប់សត្វស្លាបតូចធំទាំងនោះ។ សួនបន្លែបៃតង ក៏ជាចំណែកមួយដ៏សំខាន់ ក្នុងការទាក់ទាញទេសចរឲ្យទៅកម្សាន្តនៅសហគមន៍ជ្រាវផងដែរ។
ក្នុងពិធីចុះសួរសុខទុក្ខ និងពិនិត្យមើលសក្កានុពលទេសចរណ៍ក្នុងសង្កាត់ជ្រាវ ក្រុងសៀមរាប លោករដ្ឋមន្ត្រីក្រសួងទេសចរណ៍ លោក ថោង ខុន បានកោតសរសើរចំពោះការពារអភិរក្សសត្វស្លាបរបស់សហគមន៍ជ្រាវ។ លោករដ្ឋមន្ត្រីបានលើកទឹកចិត្ត និងឲ្យប្រជាពលរដ្ឋធ្វើយ៉ាងណា រក្សាឲ្យបាននូវជម្រកសត្វស្លាបដ៏កម្រមួយនេះ ព្រោះថា វាជាប្រភពចំណូលមួយដ៏សំខាន់សម្រាប់បង្កើនជីវភាពរបស់សហគមន៍។
នៅរសៀលថ្ងៃទី៦ សីហា ក្រៅពីបានចុះទៅមើលសហគមន៍មេជ្រៃហើយនោះ លោក ថោង ខុន ក៏បានចុះទៅដល់សហគមន៍ជ្រាវផងដែរ។ លោក ថោង ខុន ណែនាំឲ្យប្រជាពលរដ្ឋធ្វើយ៉ាង ថែរក្សាប្រភពចំណីសត្វស្លាបទាំងនោះអោយបានល្អ ព្រោះថា បើគ្មានត្រីក៏គ្មានសត្វស្លាបទាំងនោះដែរ។
«...សត្វវាមកទាល់តែមានត្រី មានត្រីបានវាមកបាន ច្បាស់ណាស់អានេះគឺថា អត់ត្រីអត់សត្វទេ។ ចឹងបងប្អូននៅទីនេះ គាត់ឃើញសត្វមកគាត់ខំថែ ថែណាស់។ ថែយ៉ាងម៉េច ទីមួយគាត់មិនឲ្យអ្នកណាទៅប៉ះពាល់សត្វ ទីពីរមិនដណ្តើមត្រីសត្វស៊ីទេ...សុខចិត្តស៊ីត្រីកញ្ចុះ ទុកត្រីឆ្ងាញ់ឲ្យលោកសត្វស៊ីទៅ...»។ នេះជាការលើកឡើងរបស់លោក ថោង ខុន។
លោករដ្ឋមន្ត្រីក្រសួងទេសចរណ៍ បានសន្យាថា នឹងជួយរៀបចំសហគមន៍ជ្រាវឲ្យក្លាយជាសហគមន៍ទេសចរណ៍មួយស្របទៅតាមស្តង់ដា ដែលទទួលស្គាល់ដោយរដ្ឋាភិបាល ក៏ដូចជាអាស៊ាន។ លោក ថោង ខុន បញ្ជាក់ថា ការបង្កើតសហគមន៍ទេសចរណ៍មួយៗ មិនមែនចេះតែបង្កើតនោះទេ ហើយលោកថាក្រសួងរបស់លោកមានតួនាទីសំខាន់ ក្នុងនាំភ្ញៀវទេសចរឲ្យទៅស្គាល់តំបន់សហគមន៍ទាំងនោះផងដែរ។ លោកបន្ថែមថា៖« នៅពេលសហគមន៍ទេសចរណ៍មានស្តង់ដាត្រឹមត្រូវ គឺធនធានធម្មជាតិត្រូវបានអភិរក្សយ៉ាងមុតចត់ និងពលរដ្ឋនឹងបានចំណូលពីវិស័យនេះ...»។
ទោះជាយ៉ាងណាក៏ដោយ ដើម្បីអាចបង្កើតសហគមន៍ទេសចរណ៍ និងទៅតាមស្តង់ដារទៅបាន លោក ថោង ខុន ថាត្រូវមានក្រសួងសាមីចំនួន៥ចូលរួម ក្នុងនោះមានក្រសួងបរិស្ថាន ក្រសួងកសិកម្ម រុក្ខាប្រមាញ់និងនេសាទ ក្រសួងធនធានទឹក និងឧតុនិយម ក្រសួងទេសចរណ៍ និងក្រសួងអភិវឌ្ឍន៍ជនបទ។ លោករដ្ឋមន្ត្រីបន្ថែមថា ការរៀបចំប្រព័ន្ធផ្លូវថ្នល់ ជារឿងមួយសំខាន់៕
Tag:
ថោង ខុន
សហគមន៍ជ្រាវ
© រក្សាសិទ្ធិដោយ thmeythmey.com