ពីនេះ ពីនោះ
ជិតប្រឡងបាក់ឌុប សាស្ត្រាចារ្យ គូ សុភាព ប្រាប់បច្ចេកទេសប្រឡងយកពិន្ទុខ្ពស់
× ភ្នំពេញ៖ នៅសល់តែប៉ុន្មានថ្ងៃទៀតប៉ុណ្ណោះ ការប្រឡងបាក់ឌុបសម្រាប់ឆ្នាំសិក្សា២០១៥-២០១៦ នឹងឈានចូលមក។ ទន្ទឹមនេះ ភិក្ខុ វជិរប្បញ្ញោ គូ សុភាព សាស្ត្រាចារ្យនៅសាកលវិទ្យាបញ្ញាសាស្ត្រកម្ពុជា បានបង្ហាញបច្ចេកទេស(Technic)មួយចំនួនដើម្បីប្រឡងយកពិន្ទុឲ្យបានខ្ពស់។
១) មើលគ្រប់សំណួរត្រួសៗ មុននឹងចាប់ផ្តើមធ្វើសំណួរ៖ មើលឲ្យដឹងថា មានប៉ុន្មានសំណួរ សំណួរណាស្រួល សំណួរណាលំបាក មួយណាបានពិន្ទុច្រើន មួយណាបានពិន្ទុតិច។
២) សរសេរអ្វីដែលអ្នកចាំ តែអាចភ្លេច៖ ពេលមើលសំណួរហើយ ត្រូវសរសេរលើក្រដាសព្រាងចំណុចសំខាន់ៗ ដែលអ្នកនឹកឃើញ ស្រណុកដល់ពេលអ្នកឆ្លើយ អ្នកយកវាមកចម្លងបាន។
៣) ធ្វើសំណួរណាស្រួលមុន ពីព្រោះបានពិន្ទុងាយ និងលឿន ដោយទុកសំណួរណាដែលពិបាកនៅក្រោយ ពីព្រោះ បើធ្វើមិនចេញ ក៏យើងបានពិន្ទុមុនខ្លះហើយ។
៤) អានសំណួរឲ្យច្បាស់៖ កុំប្រញាប់ពេក អានឲ្យច្បាស់ជៀសវាងការច្រឡំ នាំខាតពេលនិង ខាតពិន្ទុ។
៥) កុំប្រឹងធ្វើសំណួរដែលអ្នកមិនចេះ៖ បើមិនចេះ ទុកសិន កុំភ័យស្លន់ស្លោ ព្រោះបើប្រឹង ក៏ធ្វើមិនចេញ សុខចិត្តរំលងហើយធ្វើសំណួរណាដែលអ្នកចេះវិញ។
៦) ឆ្លើយគ្រប់សំណួរ កុំចោលសំណួរ៖ បើអាចធ្វើកើតហើយកុំធ្វើសំណួរមួយច្រើនពេក រហូតដល់អស់ម៉ោងធ្វើសំណួរផ្សេងទៀត។
៧) បើមិនយល់សួរ សួរ៖ កុំខ្លាច សួរឲ្យអស់សង្ស័យ ឲ្យច្បាស់លាស់ ទើបមិនខុស ព្រោះពេលខ្លះ សំណួរអាចខុស។
៨) ឆ្លើយតាមសំណួរ៖ គេសួរយ៉ាងណា ឆ្លើយយ៉ាងនោះ កុំចង់គ្រាន់បើធ្វើតាមចិត្តចង់ ព្រោះគេអាចកាត់ពិន្ទុ។
៩) តាំងស្មារតី ដោយដកដង្ហើមវែងៗ ប្រាប់ខ្លួនឯងថា អាចទៅរួចៗៗៗ អាចធ្វើបានៗៗៗ កុំភ័យខ្លាច តក់ស្លុត រក្សាចិត្តឲ្យនឹងនរ៕
ប្រភព៖ សៀវភៅ«ខ្ញុំឆ្លាត រូបមន្តរៀនពូកែ»រៀបរៀងដោយ ភិក្ខុ គូ សុភាព
Tag:
ភិក្ខុ គូ សុភាព
បាក់ឌុប២០១៦
© រក្សាសិទ្ធិដោយ thmeythmey.com