ឧទ្យានុរក្សភ្នំគូលេនប្តឹងអនុប្រធានមន្ទីរបរិស្ថានថាបានពាក់ព័ន្ធនឹងបទល្មើសព្រៃឈើ

ជាតិ

សង្គមជាតិ

ឧទ្យានុរក្សភ្នំគូលេនប្តឹងអនុប្រធានមន្ទីរបរិស្ថានថាបានពាក់ព័ន្ធនឹងបទល្មើសព្រៃឈើ

17, Aug 2016 , 7:55 pm

រូបភាព

ដោយ: អុីសា រ៉ហានី (Isa Rohany)

សៀមរាប៖ មន្ត្រីឧទ្យានុរក្សភ្នំគូលេន បានសម្រេចសរសេរពាក្យបណ្តឹងរបស់ខ្លួនទៅប្រធានមន្ទីរបរិស្ថានខេត្តសៀមរាប ដើម្បីសុំកិច្ចអន្តរាគមន៍លើអនុប្រធានមន្ទីរបរិស្ថាន និងនាយករងឧទ្យានជាតិព្រះជ័យវរ្ម័ននរោត្តម-ភ្នំគូលេន ពាក់ព័ន្ធនឹងករណីឃុបឃិតលើបទល្មើសព្រៃឈើ។ យ៉ាងណាមិញ បណ្តឹងនេះអាចជាជម្លោះដណ្តើមដំណែងគ្នា របស់ថ្នាក់គ្រប់គ្រងមន្ទីរបរិស្ថាន។

ឧទ្យានុរក្សឧទ្យានជាតិភ្នំគូលេនចំនួន៩រូប បានសម្រេចផ្តិតមេដៃប្តឹងអនុប្រធានមន្ទីរបរិស្ថានមួយរូប គឺលោក ស៊ីម ឈីវឈានពិសិដ្ឋ និងឈ្មោះ សួស្តិ៍ សាខាន់ មានតួនាទីជានាយករងឧទ្យានជាតិភ្នំគូលេន។ ក្នុងពាក្យបណ្តឹងនោះ បានរៀបរាប់ពីដំណើរដើមទង អំពីវត្តមានលោក ពិសិដ្ឋ ដែលត្រូវប្រធានមន្ទីរចាត់តាំងក្នុងបេសកកម្មរកជនល្មើស ដែលកាប់ដើមឈើ៦ដើមនៅលើភ្នំគូលេន។

ពាក្យបណ្តឹង ដែលមានស្នាមមេដៃប្រធាន និងឧទ្យានុរក្សទាំង៩រូប បានសរសេរថា លោក វ៉ាញ់ វិញ ជាឧទ្យានុរក្ស និងជាអ្នកប្តឹងមួយរូបដែរនោះ ធ្លាប់ត្រូវបានគេទាក់ទង ដើម្បីសុំអារឈើ តែមិនហ៊ានសម្រេច ក៏ប្រាប់ដំណឹងនេះទៅនាយករង លោក សួស្តិ៍ សាខាន់។ ចុងក្រោយ លោក សួស្តិ៍ សាខាន់ ប្រាប់វិញថា ខ្លួនបានអនុញ្ញាតិឲ្យឈ្មោះ សោម ស៊ាត អ្នកភូមិអន្លង់ធំ និងឈ្មោះ កូវ ជាអ្នកភូមិថ្មជ្រួញ អារឈើ ក្នុងការរក្សាសម្ងាត់។ ចុងក្រោយដើមឈើទាំង៦ដើម ត្រូវបានអារ ហើយដឹកចេញ និងបានបង្កការភ្ញាក់ផ្អើលដល់ប្រជាពលរដ្ឋ ទើបធ្វើឲ្យមានការបើកការស៊ើបអង្កេតរកជនល្មើស។

ពាក្យបណ្តឹងដដែល ដែលសារព័ត៌មានថ្មីៗទទួលបាន បានសរសេរទៀតថា អនុប្រធានមន្ទីរបរិស្ថាន លោក ពិសិដ្ឋ កាលពីថ្ងៃទី១ សីហា ឆ្នាំ២០១៦ ក៏បានអនុញ្ញាតឲ្យឈ្មោះ សោម ស៊ាត និងឈ្មោះ កូវ អារគល់គគីរមួយដើមដែរ ដែលមានទីតាំងនៅមុខផ្ទះមេឃុំភូមិថ្មី ដើម្បីចែកប្រយោជន៍គ្នា។ ក្រោយមក គឺនៅថ្ងៃទី៣ អនុប្រធានមន្ទីរបរិស្ថាន ក៏បញ្ជាឲ្យប្រធានឧទ្យានុរក្ស លោក សឿន វិបុល ទៅរករណាយន្ត២គ្រឿង ដើម្បីទុកអារឈើងាប់សងខាងផ្លូវ ក្នុងបំណងបញ្ចៀសគ្រោះថ្នាក់ជាយថាហេតុដល់ភ្ញៀវទេសចរ ។ តែឈ្មោះ វិបុល រកមិនបានរណានោះទេ។

ត្រង់ចំណុចនេះលោក សឿន វិបុល ទទួលស្គាល់ថា លោកពិតជារករណាមកអារឈើមិនបានមែន។ រីឯចំណុចផ្សេងទៀត ក្នុងពាក្យបណ្តឹងនោះ លោក សឿន វិបុល មិនទទួលស្គាល់ឡើយ។
បើតាមលោក វិបុល ពាក្យបណ្តឹងនោះ មានគេ(មន្ត្រីបរិស្ថានម្នាក់ ដែលលោក វិបុល សុំមិនឲ្យបញ្ចេញឈ្មោះ) រៀបចំទុក ហើយក្រុមរបស់លោកគ្រាន់តែផ្តិតមេដៃតែប៉ុណ្ណោះ។ ថ្លែងប្រាប់សារព័ត៌មានថ្មីៗ លោក វិបុល ចាត់ទុកករណីនេះ ថាជាជម្លោះផ្ទៃក្នុង ហើយបានចាត់ទុកករណីនេះ ថាគ្រាន់ជាឧបករណ៍នៃជម្លោះរបស់ថ្នាក់លើ ហើយពួកគេ គឺជាជនរងគ្រោះក្នុងរឿងនេះតែប៉ុណ្ណោះ។

ប្រភពពីមន្ត្រីបរិស្ថានមួយរូប ដែលសុំមិនបញ្ចេញឈ្មោះបានឲ្យដឹងថា កាលពីពេលថ្មីៗនេះ នាយកឧទ្យានជាតិភ្នំគូលេន ទើបនឹងចូលនិវត្តន៍ ហើយដំណែងនេះនៅទំនេរ។ នាយករង២នាក់ ដែលប្រភពអះអាងថា កំពុងប្រជែងដំណែងគ្នានោះ មានទីមួយឈ្មោះ ស៊ុត សុភា និងទីពីរ ឈ្មោះ សួស្តិ៍ សាខាន់។

ប្រភពដដែលបន្ថែមថា ថ្នាក់ដឹកនាំរបស់ខ្លួន ប្រជែងគ្នា និងធ្វើការដោយមិនតាមតួនាទីរបស់ខ្លួននោះទេ។ ការណ៍នេះ ធ្វើមន្ត្រីថ្នាក់ក្រោមដែលជាកូនចៅ មិនដឹងគោរពអ្នកណាឲ្យប្រាកដឡើយ។ ប្រភពខាងដើមបានបញ្ជាក់ទៀតថា មន្ត្រីបរិស្ថានថ្នាក់លើមួយចំនួន ពិតជាបានចូលដៃគ្នាជាមួយឈ្មួញកាប់ឈើ ហើយអ្នករងគ្រោះ គឺជាឧទ្យានុរក្ស ដែលមានតួនាទីគ្រប់គ្រងនៅទីនោះ។ «អ្នកណាដែលដើរតាមគាត់ ចុះធ្វើនេះធ្វើនោះ មានលុយកាក់ អែបអប ត្រូវរហូតទៅ ចំណែកដូចខ្ញុំ ចាំតែខុស...»។ នេះបើតាមសំដីប្រភព មុននឹងនិយាយថា លោក ភួង លីណា ក៏មានដាក់ខែពីឈ្មួញឈើជាប្រចាំផងដែរ។

ជុំវិញរឿងរ៉ាវនេះ លោក ភួង លីណា បានប្រាប់សារព័ត៌មានថ្មីៗថា លោកបានទទួលពាក្យបណ្តឹងខាងលើនោះហើយ តែលោកត្រូវការការស្រាវជ្រាវ ដើម្បីអាចបកស្រាយបាន។ លោកបន្ថែមថា លោកនឹងចាប់ផ្តើមចុះស្រាវជ្រាវចាប់ពីថ្ងៃស្អែកតទៅ ក្រោយលោកត្រឡប់ពីបេសកកម្មទៅក្រៅប្រទេសរួចមក។

តាមការបញ្ជាក់ពីប្រធានមន្ទីរបរិស្ថាន រឿងរ៉ាវខាងដើម កើតឡើងបន្ទាប់ពីក្រសួងបរិស្ថាន បានបញ្ចប់តួនាទីនាយករងឧទ្យានជាតិភ្នំគូលេនម្នាក់ ឈ្មោះ លោក ស៊ុត សុភា។ «អ្នកដែលប្តឹងក្នុងរឿងនេះ ខ្លះសុំដកវិញហើយ ព្រោះគាត់ថា គាត់ចេះតែផ្តិតៗទៅ អត់បានមើលខ្លឹមសារផង»។ នេះជាសំដីរបស់លោក ភួង លីណា។ ទាក់ទងនឹងការចោទប្រកាន់ថាលោកពាក់ព័ន្ធនឹងបទល្មើសព្រៃឈើនៅលើភ្នំគូលេននោះ លោក ភួង លីណា បានសើច មុននឹងនិយាយថា លោកមិនអាចហាមមហាជននិយាយ ឫចោទប្រកាន់លោកទេ តែសំខាន់លោកខ្លួនឯងពាក់ព័ន្ធពិតមែនឫអត់ ហើយអ្នកនិយាយនោះ មានភស្តុតាង ដើម្បីដាក់បន្ទុកលោកដែរឫទេ។

គួររម្លឹកថា បទល្មើសព្រៃឈើ បានក្លាយជារឿងចង្អុលគ្នាទៅវិញទៅមក រវាងអាជ្ញាធរ និងប្រជាពលរដ្ឋ។ ប្រជាពលរដ្ឋចង្អុលថា អាជ្ញាធរ និងមន្ត្រីបរិស្ថានជាអ្នកបើកដៃឲ្យឈ្មួញ ចំណែកខាងមន្ត្រីវិញចង្អុលថា ប្រជាពលរដ្ឋ ហើយបានកាប់ឆ្ការទន្ទ្រានយកដីធ្វើចំការ។

កាលពីឆ្នាំ២០១២ ស្ថាប័នអន្តរជាតិមួយបានផ្សាយរបាយការណ៍តួលេខព្រៃឈើនៅលើភ្នំគូលេន។ តួលេខនៅពេលនោះបានបង្ហាញថា ព្រៃឈើនៅសល់ត្រឹម២០ភាគរយតែប៉ុណ្ណោះ។ បទល្មើសនៅលើភ្នំគូលេន បានកើតឡើងជាហូរហែ ដែលធ្វើឲ្យផ្ទៃព្រៃនៅលើភ្នំនេះ ក្លាយជាវាយដីធម្មតាទៅហើយ និងពុំមានតួលេខបញ្ជាក់នោះដែរ។

រដ្ឋាភិបាលសម្រេចដកសិទ្ធិគ្រប់គ្រងពីក្រុមហ៊ុនឯកជន ដើម្បីឲ្យក្រសួងបរិស្ថានគ្រប់គ្រងរមណីយដ្ឋានប្រវត្តិសាស្ត្រភ្នំគូលេន។ តាំងពីឆ្នាំ២០១៥ រហូតមកដល់ពេលនេះ គេនៅមិនទាន់អភិវឌ្ឍន៍តំបន់នេះបាននៅឡើយ។ មន្ត្រីនៃក្រសួងបរិស្ថានធ្លាប់បាននិយាយថា ការអភិវឌ្ឍនៅលើភ្នំគូលេន គឺត្រូវការប្រើពេលយូរ ព្រោះដើម្បីដោះស្រាយបញ្ហាមួយចំនួន មានការផ្ទេរប្រជាពលរដ្ឋចុះពីលើភ្នំនោះជាដើម។ល៕