ទឹកដី គ្រីមៀ មិនមែនជារឿងដែលលោកខាងលិចត្រូវខ្វាយខ្វល់ឡើយ

អន្តរជាតិ

ទឹកដី គ្រីមៀ មិនមែនជារឿងដែលលោកខាងលិចត្រូវខ្វាយខ្វល់ឡើយ

20, Aug 2016 , 9:00 pm

រូបភាព

ដោយ: តន ចាន់រិទ្ធារ៉ា

សំណុំរឿងគ្រីមៀ (Crimea) ជាចំណុចចាប់ផ្ដើមនៃជម្លោះនៅតំបន់ភាគខាងកើតអ៊ុយក្រែន ហាក់ឡើងកម្ដៅនាពេលចុងក្រោយនេះ ខណៈដែលភាពតានតឹងនៅតាមព្រំដែនរវាងរុស្សី និងអ៊ុយក្រែន ក៏កើនឡើងផងដែរ។ ជាមួយគ្នានោះ អ៊ុយក្រែន ដែលមានបស្ចិមប្រទេសនៅពីក្រោយ ក៏នៅតែចិញ្ចឹមចិត្តទាមទារតំបន់គ្រីមៀ ដែលត្រូវរុស្សីលេបយកនៅឆ្នាំ២០១៤ ប៉ុន្តែអតីតមេដឹកនាំសហភាពសូវៀត អះអាងថា គ្រីមៀជារបស់រុស្សីហើយ ឯលោកខាងលិច ក៏មិនចាំបាច់បារម្ភចំពោះបញ្ហានេះដែរ។

ស្តាប់សំឡេង

ឧបទ្វីបគ្រីមៀ ត្រូវបានរុស្សីភ្ជាប់ជាដែនដីរបស់ខ្លួននៅឆ្នាំ២០១៤ បន្ទាប់ពីការធ្វើប្រជាមតិក្នុងចំណោមប្រជាពលរដ្ឋរស់នៅតំបន់នេះ ដែលភាគច្រើនជាអ្នកនិយាយភាសារុស្សី។ ប៉ុន្តែរដ្ឋាភិបាលក្រុងគៀវ និងសម្ព័ន្ធមិត្តលោកខាងលិច មិនដែលទទួលស្គាល់ការភ្ជាប់ខ្លួននេះឡើយ និងតែងតែដាក់សម្ពាធឲ្យក្រុងមូស្គូប្រគល់ទឹកដូគ្រីមៀមកអ៊ុយក្រែនវិញ។ យ៉ាងណាមិញ អតីតមេដឹកនាំសហភាពសូវៀត លោក Mikhail Gorbachev បានអះអាងថា រុស្សី មិនចាំបាច់ជជែកពីបញ្ហាគ្រីមៀ ជាមួយលោកខាងលិចទៀតទេ។

ក្នុងបទសម្ភាសន៍ជាមួយសារព័ត៌មាន Komsomolskaya Pravda អតីតប្រធានាធិបតីសហភាពសូវៀតរូបនេះ បញ្ជាក់ថា បញ្ហាគ្រីមៀនេះ មិនគួរត្រូវបានពិភាក្សាអ្វីឡើយ។ លោក Gorbachev ដែលជាម្ចាស់មេដាយសន្តិភាពពិភពលោក និយាយដូចនេះ នៅថ្ងៃទី១៨ ខែសីហា ខណៈដែលលោកត្រូវបានសួរពីនយោបាយរបស់រុស្សីជាមួយនឹងប្រទេសលោកខាងលិច ជុំវិញបញ្ហគ្រីមៀ។

សូមរម្លឹកដែរថា គ្រីមៀជាតំបន់ស្វយ័តរបស់អ៊ុយក្រែន តែរដ្ឋាភិបាលតំបន់នេះបានបដិសេធភាពស្របច្បាប់របស់រដ្ឋាភិបាលក្រុងគៀវ បន្ទាប់ពីភាពចលាចលនយោបាយដែលឈានដល់ការទម្លាក់លោក Victor Yanukovych ចេញពីតំណែងក្នុងខែកុម្ភៈឆ្នាំ២០១៤។ ក្រោយមកមេដឹកនាំគ្រីមៀ ក៏ប្រកាសឯករាជ្យដោយឯកតោភាគី និងរៀបចំធ្វើប្រជាមតិភ្ជាប់ខ្លួនជាមួយរុស្សីតែម្តង។

ប្រធានាធិបតីរុស្សី លោក វ្ល៉ាឌីមៀ ពូទីន ក៏ចុះហត្ថលេខាលើកិច្ចព្រមព្រៀងភ្ជាប់គ្រីមៀ ក្នុងខែមីនា ឆ្នាំ២០១៤ ទោះជាមានការមិនសុខចិត្តក៏ដោយចុះ។ រដ្ឋាភិបាលក្រុងគៀវ ក្រុងវ៉ាស៊ីនតោន និងសហភាពអឺរ៉ុប សុទ្ធតែប្រឆាំងដាច់ខាតនឹងឯករាជ្យរបស់គ្រីមៀ ក៏ដូចជាការលេបយកគ្រីមៀពីសំណាក់ក្រុងមូស្គូ ក៏បានដាក់ទណ្ឌកម្មសេដ្ឋកិច្ចខ្លាំងៗ ដើម្បីបង្ខំឲ្យប្រគល់ទឹកដីនេះមកអ៊ុយក្រែនវិញ។

អ៊ុយក្រែន ត្រូវដាក់ជំហរមិនចូលបក្សសម្ព័ន្ធក្នុងរដ្ឋធម្មនុញ្ញរបស់ខ្លួន

ទន្ទឹមនឹងប្រាប់លោកខាងលិចកុំឲ្យខ្វល់ខ្វាយរឿងគ្រីមៀ អតីតមេដឹកនាំសហភាពសូវៀត ក៏បានផ្ញើសារទៅមេដឹកនាំអ៊ុយក្រែនឲ្យដឹកនាំប្រទេសតាមលទ្ធិប្រជាធិបតេយ្យ និងប្រកាន់នយោបាយមិនចូលបក្សសម្ព័ន្ធណាមួយឡើយ។ បន្ទាប់ពីមានបញ្ហានយោបាយក្នុងឆ្នាំ២០១៤ និងជម្លោះជាមួយរុស្សី ក៏ដូចជាអំពើហិង្សានៅភាគខាងកើត ក្រុងគៀវ បានងាកទៅរកលោកខាងលិចយ៉ាងពេញទំហឹង ដើម្បីទប់ទល់នឹងឥទ្ធិពលរបស់រុស្សី។

មួយវិញទៀត ទាក់ទិននឹងដំណោះស្រាយជម្លោះនៅភាគខាងកើត លោក Gorbachev ក៏បានប្រាប់ឲ្យអ៊ុយក្រែន អនុវត្តកិច្ចព្រមព្រៀងសន្តិភាពទីក្រុង Minsk ឲ្យបានពេញលេញដើម្បីបញ្ចប់ជម្លោះដែលបានអូសបន្លាយមកដល់ឆ្នាំទី៣ហើយនោះ។ យោងតាមទីភ្នាក់ងារព័ត៌មាន TASS លោក Gorbachev និយាយថា ដំបូងគេ ត្រូវអនុវត្តកិច្ចព្រមព្រៀងខែកុម្ភៈ ឆ្នាំ២០១៥ ជាមុនសិន។

មេដឹកនាំចុងក្រោយរបស់សូវៀតរូបនេះ បន្តថា វាអាស្រ័យលើពលរដ្ឋអ៊ុយក្រែនជាអ្នកសម្រេចចិត្ត ប៉ុន្តែលោកច្បាស់ក្នុងចិត្តថា ប្រជាជនអ៊ុយក្រែន ចង់បានប្រទេសដែលដឹកនាំតាមបែបប្រជាធិបតេយ្យ និងមិនចូលបក្សសម្ព័ន្ធឡើយ។ ហើយការមិនចូលបក្សសម្ព័ន្ធនេះ គួរត្រូវបានចារក្នុងរដ្ឋធម្មនុញ្ញ ដោយមានការធានាពីអន្តរជាតិ ដូចដែលប្រទេសខ្លះរួមទាំងអូទ្រីសធ្លាប់ធ្វើកន្លងមក។

នៅឆ្នាំ១៩៥៥ អូទ្រីស បានចុះហត្ថលេខាលើសន្ធិសញ្ញារដ្ឋ ដែលប្រកាសថា អូទ្រីស ជារដ្ឋ អធិបតេយ្យ អព្យាក្រឹត និងមិនចូលបក្សសម្ព័ន្ធ ហើយមហាអំណាចមួយចំនូន ក៏បានចុះហត្ថលេខាផងដែរ។ បន្ទាប់ពីការប្រកាសនេះ កងកម្លាំងបរទេសទាំងអស់ ក៏បានចាកចេញពីអូទ្រីស។ បន្ថែមពីលើការលើកឡើងពីស្ថានភាពនៅអូទ្រីស លោក Gorbachev ទំនងជាចង់ឲ្យអ៊ុយក្រែនធ្វើដូចគ្នានេះ ដើម្បីបន្ថយឥទ្ធិពលអាមេរិក និងអឺរ៉ុបនៅអ៊ុយក្រែន។

ចាប់តាំងពីការកើតឡើងអំពើហិង្សានៅឆ្នាំ២០១៤ រដ្ឋាភិបាលអ៊ុយក្រែន មាននិន្នាការងាកទៅរកក្រុមលោកខាងលិច។ ប៉ុន្តែក្រុមចលនាឧទ្ទាមនៅភាគខាងកើត មានការគាំទ្រពីសំណាក់រុស្សី ដើម្បីប្រយុទ្ធផ្ដាច់ខ្លួនពីការគ្រប់គ្រងរបស់រដ្ឋាភិបាលក្រុងគៀវ៕