ជាតិ
សង្គមជាតិ
រដ្ឋមន្ត្រីអប់រំ បើកវិញ្ញាសាប្រឡងបាក់ឌុប នៅព្រឹកនេះ លោក ហង់ ជួនណារ៉ុង ខាងឆ្វេង
× រដ្ឋមន្ត្រីក្រសួងអប់រំ យុវជន និងកីឡា លោក ហង់ ជួនណារ៉ុន បានបើកវិញ្ញាសាសម្រាប់បេក្ខជនប្រឡងនៅវិទ្យាល័យព្រះស៊ីសុវត្ ថិនៅព្រឹកថ្ងៃទី២២ សីហានេះ។ លោក ហង់ ជួន ណារ៉ុន សង្ឃឹមថា បេក្ខជនប្រឡងនឹងធ្វើបានល្អ ដោយពឹងផ្អែកសមត្ថភាពខ្លួន សម្រាប់ការប្រឡងបញ្ចប់សញ្ញាបត្រទុតិយភូមិនេះ។
ក្រោយពីបើកវិញ្ញាសាប្រឡងរដ្ឋមន្ត្រីក្រសួងអប់រំ ក៏បានឈរមើលសកម្មភាពត្រួតពិនិត្យលើបេក្ខជនប្រឡង ឃើញថា មិនទាន់មានភាព មិនប្រក្រតីណាមួយកើតឡើង ចំពោះបេក្ខជនប្រឡងនៅវិទ្យាល័យព្រះស៊ីសុវត្ថិនោះទេ។ លោក ចាត់ទុកថា នេះមកពីបេក្ខជនប្រឡងបានត្រៀមខ្លួនច្រើន សម្រាប់ការប្រឡងរបស់ពួកគេ។ «ការរឹតបន្តឹងការប្រឡងនេះ មិនមែនក្រសួងចង់ធ្វើបាបពួកគេនោះទេ តែវាជាការពង្រឹងជួយសិស្សឡើងវិញ ឲ្យពួកគេមានសមត្ថភាពពិតក្នុងការអប់រំ»។ នេះជាការថ្លែងរបស់លោក ហង់ ជួន ណារ៉ុន ចំពោះមុខអ្នកកាសែត។
គួរបញ្ជាក់ថា បេក្ខជនប្រឡងសញ្ញាបត្រទុតិយភូមិនៅឆ្នាំ២០១៦នេះ នឹងប្រព្រឹត្តិទៅនៅថ្ងៃទី២២ និង ២៣ សីហា។ សម័យប្រឡងបាក់ឌុបឆ្នាំ២០១៦នេះ មានបេក្ខជនសរុបចំនួន៩៣.៧៥២នាក់ មានមណ្ឌលប្រឡងចំនួន ១៥៧មណ្ឌល និង ៣.៧៨១បន្ទប់ នៅទូទាំង២៥ រាជធានី-ខេត្ត។ ក្រសួងនឹងប្រកាសលទ្ធផលនៅរសៀលថ្ងៃទី១៣ ខែកញ្ញា ឆ្នាំ២០១៦ សម្រាប់មណ្ឌលប្រឡងនៅរាជធានីភ្នំពេញ និងខេត្តកណ្ដាល និងនៅថ្ងៃទី១៤ ខែកញ្ញា ឆ្នាំ២០១៦ នៅតាមបណ្តាខេត្តនានា៕
© រក្សាសិទ្ធិដោយ thmeythmey.com