សៀមរាប​មាន​តំបន់​អេកូ​ទេសចរណ៍​៣​ដែល​ភ្ញៀវទេសចរ​តែង​ទៅ​កម្សាន្ត​
ជាតិ
សង្គមជាតិ
​​​ន​យោ​បាយ​ជាតិ​
សៀមរាប​មាន​តំបន់​អេកូ​ទេសចរណ៍​៣​ដែល​ភ្ញៀវទេសចរ​តែង​ទៅ​កម្សាន្ត​
25, Aug 2016 , 11:08 pm        
រូបភាព
សៀមរាប​៖ ក្រៅពី​ពឹង​លើ​ទេសចរណ៍វប្បធម៌​ហើយ​នោះ ខេត្តសៀមរាប​នៅមាន​តំបន់​អេកូ​ទេសចរណ៍​ចំនួន​៣​គោលដៅ​ទៀត សម្រាប់​ទាក់ទាញ​ភ្ញៀវទេសចរ​។ តំបន់​អេកូ​ទេសចរណ៍​ទាំង​៣​នោះ រួមមាន ភ្នំ​គូ​លេន បារាយណ៍ទឹកថ្លា និង​បឹង​ទន្លេសាប ដែលជា​គោលដៅ​សំខាន់​មួយ បន្ទាប់ពី​ប្រាសាទបុរាណ​។​



​របាយការណ៍​សង្ខេបរ​បស់​មន្ទីរ​ទេសចរណ៍​ខេត្តសៀមរាប បាន​បង្ហាញថា តំបន់​អេកូ​ទេសចរណ៍ ឫ​ទេសចរណ៍ធម្មជាតិ​នៅក្នុង​ខេត្តសៀមរាប មាន​ចំនួន​៣​កន្លែង​។ ក្នុងនោះ មាន​ភ្នំ​គូ​លេន ដែល​គេ​ដឹងថា មាន​លិង្គ​មួយ​ពាន់ ទឹកជ្រោះ រួម​និង​ព្រះអង្គ​ធំ​ដ៏​ស័​ក្ត​សិទ្ធិ​។​ល​។ បារាយណ៍ទឹកថ្លា ដែល​ទេសចរ​តែង​ទៅ​កម្សាន្ត​ជា​លក្ខណៈ​គ្រួសារ មិត្តភក្តិ និង​ដោយមាន​ផ្ទៃ​ទឹកធំ​ល្វឹងល្វើយ​ក្នុង​ខែវស្សា ហើយ​មាន​សមត្ថភាព​ផ្គត់ផ្គង់​ទឹក​ដល់​ផលដំណាំ​កសិករ​រាប់ពាន់​ហិកតា​។ ចុងក្រោយ គឺ​បឹង​ទន្លេសាប ដែលជា​អាំង​ស្តុក​មច្ឆា​ជាតិ រួម​និង​ផ្ទះ​បណ្តែត​ទឹក​របស់​អ្នកភូមិ​។ 
 
​ក្រៅពី​តំបន់​ទាំង​៣​ខាងលើ​ហើយ​នោះ ខេត្តសៀមរាប​នៅមាន​តំបន់​អេកូ​ទេសចរណ៍​មួយកន្លែង​ទៀត ដែល​ទើបនឹង​អភិវឌ្ឍន៍​ថ្មី គឺ​បឹង​ពារាំង​។ បឹង​ពារាំង សម្បូរ​ដោយ​ហ្វូង​សត្វ​ស្លាប​រាប់ពាន់​ក្បាល ហើយ​វា​កំពុង​ក្លាយជា​គោលដៅ​សំខាន់​មួយ​សម្រាប់​ភ្ញៀវទេសចរ​ជាតិ និង​អន្តរជាតិ​។ ភ្ញៀវទេសចរ​ចាប់អារម្មណ៍​ទៅ​កម្សាន្ត​នៅ​បឹង​ពារាំង អំឡុង​ខែ មិនា មេសា និង​ឧសភា ព្រោះ​សម្បូរ​ហ្វូង​សត្វ​ស្លាប​ច្រើន ដែល​ចុះ​រក​ចំណី​នៅ​តំបន់​នោះ​។ ក្រៅពី​សត្វ​ស្លាប បឹង​ពារាំង ដែល​ស្ថិតក្នុង​សង្កាត់​ជ្រាវ ក្រុង​សៀមរាប ក៏មាន​សួន​បន្លែ​ធម្មជាតិ និង​ផ្ទះ​ស្នាក់នៅ Green Home ផងដែរ​។ 
 
​យ៉ាងណាក៏ដោយ បឹង​ពារាំង នៅ​មិនទាន់មាន​ការអភិវឌ្ឍ​ប្រសើរ​ឡើយ​។ ប៉ុន្តែ​ក្នុង​កិច្ចប្រជុំ​កាលពីពេល​ថ្មីៗ​នេះ រដ្ឋមន្ត្រី​ក្រសួងទេសចរណ៍ ជំរុញ​ឲ្យ​ដៃគូរ​ពាក់ព័ន្ធ​ទាំងអស់ ជួយ​អភិវឌ្ឍន៍​គោលដៅ​ទេសចរណ៍​ថ្មី​មួយ​នេះ ឲ្យ​បាន​លឿន​តាមតែ​អាចធ្វើ​ទៅបាន​៕

Tag:
 បឹង​ពារាំង​
  ថោង ខុន
© រក្សាសិទ្ធិដោយ thmeythmey.com