លោក នេត សាវឿន ប្តេជ្ញាមិនឲ្យមានតំបន់អបគមន៍គ្រឿងញៀន នៅភ្នំពេញ

ជាតិ

សង្គមជាតិ

លោក នេត សាវឿន ប្តេជ្ញាមិនឲ្យមានតំបន់អបគមន៍គ្រឿងញៀន នៅភ្នំពេញ

26, Aug 2016 , 8:59 pm

រូបភាព

លោក នេត សាវឿន អគ្គស្នងការនៃអគ្គស្នងការដ្ឋាននគរបាលជាតិ។ រូបថតហ្វេសប៊ុក លោក នេត សាវឿន

ដោយ:

ភ្នំពេញ៖ អគ្គស្នងការនៃអគ្គស្នងការដ្ឋាននគរបាលជាតិ លោក នេត សាវឿន បានជំរុញកម្លាំងនគបាលមានសមត្ថកិច្ច បន្តកំណត់មុខសញ្ញាបទល្មើសគ្រឿងញៀនឲ្យច្បាស់ ដើម្បីបង្ក្រាបលុបបំបាត់ការជួញដូរ និងការប្រើប្រាស់គ្រឿងញៀនទូទាំងប្រទេស។ លោកសង្កត់ធ្ងន់ពុំអនុញ្ញាតឲ្យកើតមានតំបន់ អបគមន៍គ្រឿងញៀនឡើយ ពិសេសគឺ នៅតំបន់ត្រពាំងឈូកក្នុងរាជធានីភ្នំពេញ។

ស្តាប់សំឡេង

លោក នេត សាវឿន បានប្តេជ្ញាយ៉ាងម៉ឹងម៉ាត់លុបបំបាត់បទល្មើសគ្រឿងញៀនដែលបន្តកើន ឡើងពីទីក្រុងដល់ជនបទ នៅកម្ពុជា។ អគ្គស្នងការនគរបាលជាតិរូបនេះ ប្រកាសចេញវិធានប្រឆាំងការប្រើប្រាស់ និងការជួញដូរគ្រឿងញៀន ស្របពេលសកម្មភាពជួញដូរនិងប្រើប្រាស់គ្រឿងញៀននៅភូមិត្រពាំងឈូក សង្កាត់ទឹកថ្លាខណ្ឌសែនសុខត្រូវបានសមត្ថកិច្ចកំណត់ថាជាទីតាំងប្រព្រឹត្តល្មើសយ៉ាងសកម្ម នៅរាជធានីភ្នំពេញ។

លោក នេត សាវឿន បានឆ្លៀតយកឱកាសបើកកិច្ចប្រជុំសរុបការងារប្រយុទ្ធ ប្រឆាំងគ្រឿងញៀន ៩ខែ ឆ្នាំ២០១៦ នៅអគ្គស្នងការដ្នាននគរបាលជាតិ អំពាវនាវកម្លាំងនគរបាលពាក់ព័ន្ធឲ្យបោសសម្អាតទីតាំងនោះឲ្យមានប្រសិទ្ធភាព។

«ខ្ញុំថា វាមិនពិបាកទេ រឿង(ត្រពាំងឈូក)ប៉ុណ្ណឹង ឲ្យតែឯកភាពគ្នាភ្លាម ដោះភ្លាមតំបន់នេះ។ គ្មានឲ្យអ្នកឯង មកអុងអាត់នៅទីនេះទេ នៅភ្នំពេញ។ គ្មានឲ្យអ្នកឯងមកធ្វើអបគមន៍គ្រឿង ញឿន នៅទីនេះទេ...ឈូសវាឲ្យបានទៅ គឺយើងយកច្បាប់ ការអប់រំទៅធ្វើ»។ លោកនាយឧត្តមសេនីយ៍សង្កត់ធ្ងន់ពីការ ព្រួយបារម្ភអនាគតយុវជនកម្ពុជាត្រូវបំផ្លាញដោយសារគ្រឿងញៀន នៅថ្ងៃទី២៦ សីហានេះ ។

បើទោះបីជា បទល្មើសគ្រឿងញៀនបន្តកើនឡើងយ៉ាងណាក៏ដោយ ក៏លោក នេត សាវឿននៅតែបន្តសរសើរកងកម្លាំងមានសមត្ថកិច្ចទាំងអស់ ដែលបានប្រតិបត្តិបង្ក្រាបបទល្មើសគ្រឿងញៀនយ៉ាងសកម្មកន្លងទៅ។

ជាមួយគ្នាដែរ លោក ខៀវ សាម៉ន នាយកមន្ទីរប្រឆាំងគ្រឿងញៀន លើកឡើងថា កម្ពុជានៅតែទទួលរងគ្រោះថ្នាក់ពីបទល្មើសជួញដូរគ្រឿងញៀន ព្រោះកម្ពុជាជាប្រទេស ចរាចរឆ្លងកាត់បទល្មើសទាំងតាមផ្លូវគោក ផ្លូវទឹកនិងទាំងផ្លូវអាកាស។

លោកឧត្តមសេនីយ៍ឯកបញ្ជាក់ពីលទ្ធផលការងារប្រយុទ្ធប្រឆាំង បទល្មើសគ្រឿងញៀនរយៈពេល ៩ខែឆ្នាំ២០១៦ បានចំនួន២២៦៥ករណី ក្នុងនោះ ឃាត់ខ្លួន៥០៥៧នាក់ (ស្រី៤៧៦នាក់) ជនជាតិខ្មែរ៤៩៥៨នាក់ (ស្រី៤៥៧នាក់)និងជនបរទេស១១សញ្ជាតិ៩៩នាក់ (ស្រី១៩នាក់) រួមមានជនជាតិវៀតណាម៦០នាក់ (ស្រី១៧នាក់), នីហ្សេរីយ៉ា១១នាក់, ស៊ុយអែតម្នាក់, អាមេរិក២នាក់, កូរ៉េម្នាក់, ចិន១០នាក់(ស្រី១នាក់), ថៃ៣នាក់(ស្រីម្នាក់), ឡាវ៨នាក់, ហ្វាំងឡង់ម្នាក់, អូស្ត្រាលីម្នាក់ និងរ៉ូម៉ានីម្នាក់។

តាមលោក ខៀវ សាម៉ន ជាង៩ខែនេះ សមត្ថកិច្ចបានរឹបអូសគ្រឿងញៀនគ្រប់ប្រភេទទម្ងន់ជាង ៦០គីឡូក្រាមក្នុងនោះ រួមមានមេតំហ្វេតាមីនម្សៅក្រាម ICEជាង ៤៤គីឡូក្រាម, មេតំហ្វេតាមីនគ្រាប់ (WY) ជាង៨គីឡូក្រាម, ហេរ៉ូអ៊ីនជាង៣គីឡូក្រាម, កូកាអ៊ីនជាង៨គីឡូក្រាម, កេតាមីនជាង៦៩ក្រាម, អ៊ិចស្តាស៊ីជាង៩០០ក្រាម។ដោយឡែកកញ្ឆាក្រៀមជាង៤គីឡូក្រាម ដើមកញ្ឆា៦២០២៣ដើមនិងប្រេងម្រះព្រៅភ្នំ៩៥គីឡូក្រាម៕