អន្តរជាតិ
ឥណ្ឌានិងវៀតណាមជាដៃគូយុទ្ធសាស្ត្រគ្រប់ជ្រុងជ្រោយ ហើយផ្តោតសំខាន់លើវិស័យយោធា
× ចុងសប្តាហ៍កន្លងទៅ នាយករដ្ឋមន្ត្រីឥណ្ឌាលោក នារិន្ទ្រា ម៉ូឌី និងមេដឹកនាំវៀតណាម បានសម្រេចបង្កើនកម្រិតកិច្ចសហប្រតិបត្តិការទ្វេភាគីដល់ដៃគូយុទ្ធសាស្ត្រគ្រប់ជ្រុងជ្រោយដែលជាកម្រិតខ្ពស់បំផុតមួយ។ ឥណ្ឌានិងវៀតណាមប្តេជ្ញាពង្រឹងចំណងមិត្តភាពលើវិស័យជាច្រើន តែផ្តោតសំខាន់លើកិច្ចសហប្រតិបត្តិការយោធា។
ទស្សនកិច្ចរបស់ប្រមុខរដ្ឋាភិបាលឥណ្ឌាកាលពីចុងសប្តាហ៍កន្លងមក ទៅកាន់ប្រទេសវៀតណាម ក្លាយជាទស្សនកិច្ចប្រវត្តិសាស្ត្រនិងជាលើកដំបូងបំផុតក្នុងរយៈពេល១៥ឆ្នាំមកនេះ។ ក្នុងដំណើរទស្សនកិច្ចនេះ លោក នារិន្ទ្រា ម៉ូឌី បានបង្ហាញពីចំណាប់អារម្មណ៍របស់មហាអំណាចអាស៊ីខាងត្បូងក្នុងការពង្រឹងកិច្ចសហប្រតិបត្តិការជាច្រើនវិស័យជាមួយវៀតណាមឲ្យកាន់តែស៊ីជម្រៅថែមទៀត។
១.ឥណ្ឌានិងវៀតណាមបង្កើតដៃគូយុទ្ធសាស្ត្រគ្រប់ជ្រុងជ្រោយ
ពេលទៅដល់វៀតណាម លោក ម៉ូឌី បានចូលជួបពិភាក្សាជាលក្ខណៈទ្វេភាគីជាមួយបណ្តាមេដឹកនាំវៀតណាមក្នុងនោះមានទាំងនាយករដ្ឋមន្ត្រី Nguyen Xuan Phuc, ប្រធានាធិបតី Tran Dai Quang និងអគ្គលេខាធិការបក្សកុម្មុយនីស្តវៀតណាមលោក Nguyen Phu Trong។
យោងតាមសារព័ត៌មានឥណ្ឌា Times of India មេដឹកនាំទាំងពីរបានសម្រេចចុះកិច្ចព្រមព្រៀងចំនួន ១២ ហើយឥណ្ឌាបានប្រកាសផ្តល់ជំនួយជាច្រើនដើម្បីគាំទ្រការអភិវឌ្ឍរបស់វៀតណាមដែរ។ ហើយកិច្ចព្រមព្រៀងចំនួន ១២ គ្របដណ្តប់លើទំនាក់ទំនងទ្វេភាគីលើច្រើនវិស័យក្នុងនោះមានទាំង ពាណិជ្ជកម្ម, វិនិយោគ, ការពារជាតិ, សន្តិសុខអ៊ីនធឺណែត និងកិច្ចសហប្រតិបត្តិការលំហអាកាសថែមទៀត។
អ្វីដែលសំខាន់ «ទំនាក់ទំនងក្នុងភាពជាដៃគូយុទ្ធសាស្ត្រ»រវាងភាគីពីរត្រូវបានដំឡើងទៅកម្រិតខ្ពស់បំផុត «ដៃគូយុទ្ធសាស្ត្រគ្រប់ជ្រុងជ្រោយ»ដែរ។
ការឈានទៅបង្កើនកម្រិតទំនាក់ទំនងទ្វេភាគីនេះ បង្ហាញថាឥណ្ឌានិងវៀតណាមកាន់តែខិតជិតគ្នា និងស្និទ្ធស្នាលគ្នាខ្លាំង។ ហើយភាពស្អិតល្មួតរវាងវៀតណាមនិងនេះក៏ប្រហែលជាឆ្លុះបញ្ចាំងឲ្យឃើញពីការពង្រឹងឥទ្ធិពលរបស់ឥណ្ឌានិងទប់ទល់ការកើនឥទ្ធិពលរបស់ចិននៅក្នុងតំបន់ដែរ។
ដោយឡែក ប្រមុខរដ្ឋាភិបាលឥណ្ឌាបានប្រកាសផ្តល់លុយជំនួយ ៥០០ លានដុល្លារដើម្បីជួយវៀតណាមកសាងសមត្ថភាពយោធានិងឈានទៅពង្រឹងកិច្ចសហប្រតិបត្តិការទ្វេភាគីថែមទៀត។
ទាក់ទងកញ្ចប់ជំនួយ ៥០០លានដុល្លារសម្រាប់អភិវឌ្ឍវិស័យយោធា លោក នារិន្ទ្រា ម៉ូឌី បានអះអាង ឥណ្ឌាជួយវៀតណាមពង្រឹងសមត្ថភាពយោធាដើម្បីសម្រួលដល់ការបង្កើនកិច្ចសហប្រតិបត្តិការយោធាឲ្យកាន់តែស៊ីជម្រៅនៅពេលអនាគត។ ឥណ្ឌាក៏បានប្រកាសផ្តល់ កញ្ចប់ជំនួយផ្សេងទៀតដែរដើម្បីគាំទ្រដល់ការសាងសង់ទូកល្បាតសម្រាប់ឆ្មាំសមុទ្រវៀតណាម។
តាំងពីយូរមកហើយ ឥណ្ឌាបានបន្តផ្តល់ជំនួយនិងជួយពង្រឹងសមត្ថភាពកងទ័ពជើងទឹកក្រុងហាណូយ តាមរយៈការបំពាក់បំប៉នសមត្ថភាពប្រើប្រាស់នាវាមុជទឹក ដែវៀតណាមបានទិញពីរុស្ស៊ីកន្លងមកនោះ។
ក្រៅពីពង្រឹងកិច្ចសហប្រតិបត្តិការយោធា លោក នារិន្ទ្រា ម៉ូឌី ក៏បានស្នើឲ្យមានការពង្រឹងចំណងទំនាក់ទំនងនិងកិច្ចសហប្រតិបត្តិការរវាងស្ថាប័ននីតិបញ្ញត្តិ ដោយជំរុញឲ្យមានការផ្លាស់ប្តូរទស្សនកិច្ចរវាងមន្ត្រីស្ថាប័ននីតិបញ្ញត្តិឲ្យបានញឹកញាប់។
២. វៀតណាមជាជន្ទល់នៃនយោបាយការបរទេសឥណ្ឌា«ធ្វើសកម្មភាពភាគខាងកើត»
ដោយឡែក ក្នុងជំនួបរវាងអគ្គលេខាធិការបក្សកុម្មុយនីស្តវៀតណាម Nguyen Phu Trong លោក នារិន្ទ្រា ម៉ូឌី បានបរិយាយថា វៀតណាមគឺជាសរសរស្តម្ភដ៏សំខាន់មួយនៃភាពជោគជ័យរបស់នយោបាយការបរទេសឥណ្ឌា «ធ្វើសកម្មភាពនៅទិសខាងកើត»។
បច្ចុប្បន្ននេះ គោលនយោបាយការបរទេសឥណ្ឌាគឺធ្វើយ៉ាងពង្រឹងកិច្ចសហប្រតិបត្តិការលើវិស័យសេដ្ឋកិច្ច,នយោបាយ, ការទូត និងយោធាជាមួយបណ្តាប្រទេសអាស៊ីប៉ាស៊ីហ្វិក ជាពិសេសតំបន់អាស៊ានតែម្តង។ តាមពិតទៅគោលនយោបាយ ធ្វើសកម្មភាពទិសខាងកើតរបស់មហាយក្សឥណ្ឌា ត្រូវបានដាក់អនុវត្តក្នុងអាណត្តិលោក នារិន្ទ្រា ម៉ូឌី ហើយវាត្រូវបានគេកែសម្រួលនិងផ្លាស់ប្តូរពីគោលនយោបាយសំឡឹងទៅទិសខាងកើត (Look East Policy)។ តែជាធម្មតា គេមើលឃើញថា គោលនយោបាយនេះមានគោលដៅសំខាន់បំផុតត្រឹមទប់ទល់ការកើនឡើងនៃឥទ្ធិពលចិននៅក្នុងតំបន់ប៉ុណ្ណោះ។
ចំណែកលោក Nguyen Phu Trong វិញបានបង្ហាញការគាំទ្រពេញទំហឹងចំពោះគោលជំហរមិនប្រួលប្រែរបស់ឥណ្ឌាក្នុងសំណុំរឿងសមុទ្រចិនខាងត្បូងដែរ។ ជំហររបស់ឥណ្ឌាគឺកណ្តាល មិននៅខាងភាគីណាមួយឡើយ តែសំខាន់មហាអំណាចនេះគាំទ្រសេចក្តីសម្រេចរបស់មជ្ឈត្តការអន្តរជាតិដែលទាត់ចោលការទាមទាររបស់ចិនក្នុងតំបន់ជម្លោះ។ ជារឿយៗឥណ្ឌាតែងអំពាវនាវឲ្យបណ្តាភាគីពាក់ព័ន្ធធ្វើយ៉ាងណាបន្តដោះស្រាយជម្លោះដោយសន្តិវិធី គោរពច្បាប់អន្តរជាតិជាពិសេសសេរីភាពក្នុងការធ្វើនាវាចរណ៍ និងហោះហើរផងដែរ៕
Tag:
នារិន្ទ្រា ម៉ូឌី
Nguyen Xuan Phuc
Nguyen Phu Trong
Tran Dai Quang
© រក្សាសិទ្ធិដោយ thmeythmey.com