អន្តរជាតិ
នយោបាយអន្តរជាតិ
×![]()
ដោយ: តន ចាន់រិទ្ធារ៉ា
ជំនួបទ្វេភាគីលើកដំបូងរវាងប្រធានាធិបតីអាមេរិក បារ៉ាក់ អូបាម៉ា និងប្រធានាធិបតីហ្វីលីពីន Rodrigo Duterte ដែលគ្រោងនឹងធ្វើនៅថ្ងៃទី៦ ខែកញ្ញា ត្រូវបានលុបចោលហើយ នៅក្រោយការវាយប្រហារដោយពាក្យសម្ដីមិនសមរម្យដាក់ប្រធានាធិបតីអាមេរិក ពីសំណាក់ប្រមុខរដ្ឋហ្វីលីពីន។ នេះ អាចចាត់ទុកជារឿងមិនធ្លាប់មានដែលមេដឹកនាំប្រទេសមួយ ប្រើពាក្យអសុរោះធ្ងន់ៗ ដាក់មេដឹកនាំប្រទេសមួយទៀតនោះ។ 
មន្ត្រីសេតវិមាន នៅថ្ងៃទី៦ ខែកញ្ញា ប្រកាសថា ប្រធានាធិបតីអាមេរិក លោក បារ៉ាក់ អូបាម៉ា បានសម្រេចចិត្តលុបចោលជំនួបជាមួយប្រធានាធិបតីហ្វីលីពីន លោក Rodrigo Duterte ហើយ បន្ទាប់ពីប្រមុខរដ្ឋហ្វីលីពីន បានហៅលោក អូបាម៉ា ថាជាកូនស្រីខូចរួចមក។ ប្រធានាធិបតីហ្វីលីពីន បានប្រើពាក្យមិនសមរម្យដូចនេះ នៅមុនពេលចាកចេញទៅកាន់ឡាវ ដើម្បីចូលរួមប្រជុំអាស៊ាន ក៏ដូចជាជួបជាមួយលោក អូបាម៉ា ដែរនោះ។
បន្ទាប់ពីការប្រើពាក្យប្រមាថរបស់លោក Duterte ប្រធានាធិបតីអាមេរិក បានប្រាប់មន្ត្រីរបស់លោក ឲ្យពិនិត្យឡើងវិញជំនួបដែលគ្រោងបានទុករួចហើយនោះ ដោយលោក អូបាម៉ា និយាយថា លោកចង់បានជំនួបដែលមានផ្លែផ្កា។ បន្តិចក្រោយមក លោក Ned Price អ្នកនាំពាក្យក្រុមប្រឹក្សាសន្តិសុខជាតិ បញ្ជាក់ថា ប្រធានាធិបតី អូបាម៉ា នឹងមិនជួបលោក Duterte ទេ ហើយលោកនឹងជួបជាមួយប្រធានាធិបតីកូរ៉េខាងត្បូង ប៉ាក ហ្គឺនហេ នៅថ្ងៃទី៦ ខែកញ្ញា ជំនួសវិញ។
សារព័ត៌មាន Bloomberg ផ្សាយថា ជំនួបទ្វេភាគីរវាងប្រធានាធិបតីអាមេរិក និងកូរ៉េខាងត្បូង នឹងផ្ដោតសំខាន់លើបញ្ហាកម្មវិធីនុយក្លេអ៊ែររបស់កូរ៉េខាងជើង ដែលកន្លងមក បានសាកល្បងគ្រាប់នុយក្លេអ៊ែរ និងបាញ់មីស៊ីលជាច្រើនលើក។ ចុងក្រោយនោះ នៅមុនបន្តិចនៃការបិទបញ្ចប់កិច្ចប្រជុំប្រទេសរីកចម្រើនទាំង២០ ក្រុងព្យុងយ៉ាង ក៏បានបាញ់មីស៊ីលបាលីស្ទិកបីគ្រាប់ទៀត ផ្គើនកិច្ចប្រជុំ ដែលចិនជាម្ចាស់ផ្ទះផងនោះ។
តាមពិតទៅ ការមើលមុខមិនត្រូវរវាងហ្វីលីពីន និងអាមេរិក ផ្ដើមចេញពីយុទ្ធនាការបង្ក្រាបឈ្មួញ និងអ្នកប្រើគ្រឿងញៀនរបស់ប្រធានាធិបតីហ្វីលីពីន។ អាមេរិក បានបង្ហាញការព្រួយបារម្ភរបស់ខ្លួន ចំពោះការសម្លាប់មនុស្សយ៉ាងច្រើន ដែលភាគច្រើនធ្វើនៅក្រៅប្រព័ន្ធតុលាការ និងចាត់ទុករឿងនេះ ជាការរំលោភសិទ្ធិមនុស្ស។ ប៉ុន្តែបុរសខ្លាំង Duterte មិនបានអើពើនឹងការព្រួយបារម្ភនោះទេ ថែមទាំងបញ្ជាឲ្យបង្កើនយុទ្ធនាការនេះទៀតផង។
មួយវិញទៀត នេះក៏មិនមែនជាលើកទីមួយទេ ដែលលោកប្រធានាធិបតី Duterte ប្រើពាក្យគំរោះគំរើយដាក់ថ្នាក់ដឹកនាំអាមេរិកនោះ។ លោក ធ្លាប់ហៅអគ្គរដ្ឋទូតអាមេរិកប្រចាំក្រុងម៉ានីលថា ជាកូនស្រីសំផឹង និងជាខ្ទើយផងដែរ។ យ៉ាងណាមិញ ជាមួយនឹងការប្រើពាក្យមិនសមរម្យបែបនេះ ទំនាក់ទំនងរឹងមាំរវាងហ្វីលីពីន និងអាមេរិក ទំនងជាប្រេះឆាខ្លាំងមិនខាន ចំពេលដែលចិន កំពុងតែវាតទីក្នុងតំបន់ផងនោះ៕
Tag:
ឡាវ
Barack Obama
Rodrigo Duterte
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
5 ថ្ងៃ
