អន្តរជាតិ
អូបាម៉ា ឲ្យឡាវ ៩០លានដុល្លារដោះគ្រាប់មិនទាន់ផ្ទុះដែលអាមេរិកទម្លាក់
× នៅក្នុងដំណើរទស្សនកិច្ចលើកដំបូងទៅកាន់ឡាវរបស់ប្រធានាធិបតី បារ៉ាក់ អូបាម៉ា រដ្ឋបាលក្រុងវ៉ាស៊ីនតោន សន្យាផ្ដល់លុយចំនួន៩០លានដុល្លារ ដើម្បីចូលរួមក្នុងប្រតិបត្តិការបោសសម្អាតគ្រាប់មិនទាន់ផ្ទុះ ដែលនៅរាយប៉ាយពាសពេញផ្ទៃប្រទេសឡាវ។ ហើយទឹកប្រាក់ដ៏ច្រើននេះ នឹងត្រូវផ្ដល់ជាបន្តបន្ទាប់ក្នុងរយៈពេលបីឆ្នាំខាងមុខនេះ។
សូមស្ដាប់ព័ត៌មានលម្អិត៖
សេតវិមានសហរដ្ឋអាមេរិក នៅថ្ងៃទី៦ ខែកញ្ញា បានប្រកាសថា អាមេរិក នឹងផ្ដល់ជំនួយបន្ថែមចំនួន៩០លានដុល្លារ ក្នុងពេលបីឆ្នាំខាងមុខ ដើម្បីជួយប្រទេសឡាវ ក្នុងការដោះស្រាយគ្រាប់មិនទាន់ផ្ទុះ ដែលបានសម្លាប់ប្រជាជនឡាវអស់ជាច្រើនមកហើយនោះ។ ការប្រកាសនេះ ធ្វើឡើង ស្របពេលដែលប្រធានាធិបតី បារ៉ាក់ អូបាម៉ា កំពុងទស្សនកិច្ចនៅឡាវជាលើកដំបូង។
កាលពីសម័យសង្គ្រាមវៀតណាមចន្លោះឆ្នាំ១៩៦៤ ដល់ឆ្នាំ១៩៧៣ យន្តហោះចម្បាំងអាមេរិក បានទម្លាក់គ្រាប់បែកចង្កោមច្រើនជាង២៧០លានគ្រាប់ ទៅលើទីតាំងជាច្រើនក្នុងទឹកដីរដ្ឋកុម្មុយនីស្តមួយនេះ ហើយចំនួនមួយភាគបីនៃគ្រាប់ទាំងនោះ មិនទាន់ផ្ទុះនៅឡើយទេ។ ការទម្លាក់គ្រាប់ច្រើនសន្ធឹកសន្ធាប់បែបនេះ ធ្វើឲ្យឡាវក្លាយជាប្រទេសរងគ្រោះខ្លាំង ដោយបានសម្លាប់ និងធ្វើឲ្យរបួសមនុស្សច្រើនជាង២ម៉ឺននាក់មកហើយ។
ក្នុងសេចក្ដីថ្លែងការណ៍របស់ខ្លួន សេតវិមាននិយាយថា កម្មវិធីជំនួយរបស់អាមេរិក បានជួយកាត់បន្ថយអត្រាមរណៈដោយសារគ្រាប់មិនទាន់ផ្ទុះ (UXO) ពីចំនួន៣០០នាក់ មកត្រឹម៥០នាក់ ក្នុងមួយឆ្នាំ។ ទីភ្នាក់ងារព័ត៌មាន Reuters ផ្សាយថា ទឹកប្រាក់ជំនួយនៅពេលនេះ នឹងជួយដល់ដំណើរការស្រាវជ្រាវ UXO ក៏ដូចជាប្រតិបត្តិការបោសសម្អាតគ្រាប់ទាំងនោះ។
សេចក្ដីថ្លែងការណ៍ដដែលបន្តថា អាមេរិក កំពុងជួយឡាវ ក្នុងការកម្ទេចគ្រាប់មិនទាន់ផ្ទុះ ដែលបានគំរាមកំហែងអាយុជីវិតពលរដ្ឋឡាវ ក៏ដូចជាប៉ះពាល់សេដ្ឋកិច្ចផងដែរ។ កញ្ចប់ទឹកប្រាក់ទាំង៩០លានដុល្លារ នឹងជួយជនរងគ្រោះដោយសារគ្រាប់ទាំងនេះ តាមរយៈការស្ដារនីតិសម្បទាឡើងវិញ ដូចជាការតភ្ជាប់អវយវៈសិប្បនិម្មិតជាដើម។
សូមរម្លឹកថា តាំងពីបញ្ចប់សង្គ្រាមមក បរិមាណដ៏ច្រើននៃគ្រាប់មិនទាន់ផ្ទុះ គឺជាបញ្ហាធ្ងន់ធ្ងរខ្លាំងក្នុងតំបន់ឥណ្ឌូចិនទាំងមូល ដែលរងការទម្លាក់គ្រាប់បែកយ៉ាងសន្ធឹកសន្ធាប់ពីសំណាក់យន្តហោះអាមេរិក។ វាត្រូវចំណាយពេលយ៉ាងច្រើន ដើម្បីដោះស្រាយបញ្ហាគ្រាប់មិនទាន់ផ្ទុះ ដែលរាយប៉ាយនៅកម្ពុជា ឡាវ និងវៀតណាម ដែលជួបប្រទះសង្គ្រាមខ្លាំងពីអតីតកាល៕
© រក្សាសិទ្ធិដោយ thmeythmey.com