អន្តរជាតិ
នយោបាយអន្តរជាតិ
អូបាម៉ា ថានយោបាយការបរទេសចាប់តំបន់អាស៊ីប៉ាស៊ីហ្វិកមិនចប់តាមអាណត្តិលោកឡើយ
×![]()
ពេលថ្លែងសុន្ទរកថានៅនៅក្នុងទីក្រុងវៀងចន្ទន៍ ប្រធានាធិបតីជិតផុតអាណត្តិ លោក បារ៉ាក់ អូបាម៉ា បានបញ្ជាក់ជាថ្មីថា គោលនយោបាយការបរទេសអាមេរិកផ្តោតលើតំបន់អាស៊ីនឹងមិនបាត់តាមតំណែងប្រធានាធិបតីរបស់លោកឡើយ។ អាមេរិកនឹងនៅបន្តបង្កើនការភ្ជាប់ទំនាក់ទំនងជាមួយប្រទេស និងប្រជាជនអាស៊ីអាគ្នេយ៍ដដែល។
នយោបាយការបរទេស «ត្រឡប់មកពង្រឹងឥទ្ធិពលអាមេរិក»នៅតំបន់អាស៊ីប៉ាស៊ីហ្វិកនឹងនៅបន្តទៅមុខទោះ ទោះមានការផ្លាស់ប្តូរការដឹកនាំនៅអាមេរិកខាងមុខក៏ដោយ។ នេះជាការបញ្ជាក់របស់លោក បារ៉ាក់ អូបាម៉ា ក្នុងពេលថ្លែងសុន្ទរកថានៅទីក្រុងវៀងចន្ទន៍ប្រទេសឡាវ នាថ្ងៃអង្គារទី ៦ កញ្ញានេះ ដែលរៀបចំឡើងនៅក្រៅកិច្ចប្រជុំកំពូលអាស៊ាន ។
យោងតាមវីដេអូ ដែលចុះផ្សាយទំព័រហ្វេសប៊ុកស្ថានទូតអាមេរិកប្រចាំប្រទេសឡាវ លោកបារ៉ាក់ អូបាម៉ា បានថ្លែងថា៖«ចំណុចស្នូលនៃគោលនយោបាយការបរទេសខ្ញុំក្នុងនាមជាប្រធានាធិបតីគឺភ្ជាប់ទំនាក់ទំនងឲ្យកាន់តែស៊ីជម្រៅជាមួយបណ្តាប្រទេសនិងប្រជាជននៅអាស៊ីប៉ាស៊ីហ្វិក»។
ក្នុងរយៈពេលជិត ៨ឆ្នាំមកនេះ គោលនយោបាយការបរទេសរបស់លោក បារ៉ាក់អូបាម៉ា គឺធ្វើយ៉ាងណាពង្រឹងឥទ្ធិពលរបស់អាមេរិកឡើងវិញតាមរយៈការពង្រឹងទំនាក់ទំនងនិងកិច្ចសហប្រតិបត្តិការជាមួយប្រទេសក្នុងតំបន់។ តួយ៉ាងការលើកស្ទួយភាពជាដៃគូជាមួយអាស៊ានទៅដៃគូយុទ្ធសាស្ត្រ និងការពង្រឹងចំណងយោធាជាមួយប្រទេសហ្វីលីពីន សិង្ហបុរី និងឥណ្ឌាផងដែរ។
តាមពិតទៅ វត្តមានលោក បារ៉ាក់ អូបាម៉ា នៅឡាវ អាចជាដំណើរទស្សនកិច្ចចុងក្រោយមកកាន់តំបន់អាស៊ីក្នុងនាមជាប្រធានាធិបតីអាមេរិក។ ហើយលោករំពឹងមុតមាំថា ថាទំនាក់ទំនងរវាងអាមេរិកនិងរដ្ឋនៅក្នុងតំបន់នឹងកាន់តែរឹងមាំនិងនៅស្ថិតស្ថិរជាដរាបតទៅដែរ។
អាមេរិកមិនអាចបោះបង់ចោលអាស៊ីបានឡើយ ទោះជាក្នុងកាលៈទេសៈណាក៏ដោយ។ នេះក៏ដោយសារអាមេរិកមានប្រយោជន៍នៅក្នុងតំបន់អាស៊ីច្រើន ក្នុងនោះមានទាំងសេដ្ឋកិច្ច,នយោបាយ និងយោធា។
លោក អូបាម៉ា បានបន្តថា៖ «ប្រយោជន៍អាមេរិកនៅអាស៊ីប៉ាស៊ីហ្វិកមិនមែនថ្មីឡើយ។ វាមិនមែនរយៈពេលខ្លីដែរ។ វាឆ្លុះបញ្ចាំងពីប្រយោជន៍ជាតិជាមូលដ្ឋានរបស់អាមេរិកនៅក្នុងតំបន់។ យើងនៅទីនោះរហូត។ ទោះក្នុងស្ថានការណ៍ល្អ និងអាក្រក់ ប្រទេសក្នុងតំបន់អាចពឹងពាក់លើសហរដ្ឋអាមេរិកបាន»៕
Tag:
បារ៉ាក់ អូបាម៉ា
កិច្ចប្រជុំកំពូលអាស៊ាន
ឡាវ
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
4 ថ្ងៃ
