អន្តរជាតិ
នយោបាយអន្តរជាតិ
លោក អូបាម៉ា៖ «កម្មវិធីយុវជនអាស៊ីអាគ្នេយ៍ YSEALI នឹងបន្តក្រោយខ្ញុំចេញពីតំណែង»
× លោក បារ៉ាក់ អូបាម៉ា បានបញ្ជាក់ថា កម្មវិធី កម្មវិធីគំនិតផ្តួចផ្តើមភាពជាអ្នកដឹកនាំអាស៊ីអាគ្នេយ៍ ( YSEALI) នឹងនៅបន្តដើម្បីភ្ជាប់ទំនាក់ទំនងរវាងអាស៊ាននិងអាមេរិកទោះបីជាលោកចាកចេញពីតំណែងក៏ដោយ។ ហើយលោកនឹងបន្តភ្ជាប់ទំនាក់ទំនង និងធ្វើការងារជាមួយយុវជនសមាជិក YSEALI ពេលលោកចេញពីតំណែង។
ក្នុងជំនួបជាមួយយុវជនសមាជិកកម្មវិធីគំនិតផ្តួចផ្តើមភាពជាអ្នកដឹកនាំអាស៊ីអាគ្នេយ៍ (YSEALI) នៅទីក្រុងលួងប្រាបាងប្រទេសឡាវថ្ងៃពុធទី ៧ កញ្ញានេះ លោកបារ៉ាក់ អូបាម៉ា បានបញ្ជាក់ច្បាស់ថា កម្មវិធី YSEALI នឹងបន្តទៅមុខ ទោះលោកចប់អាណត្តិដើមឆ្នាំក្រោយក្តី។
លោកថា៖ «កម្មវិធី YSEALI នឹងបន្តទៅមុខ នៅពេលដែលខ្ញុំចាកចេញពីតំណែង។ កម្មវិធីនេះត្រូវស្ថិតក្រោមការឧបត្ថម្ភរបស់ក្រសួងការបរទេសសហរដ្ឋអាមេរិក»។
ប្រធានាធិបតីជិតផុតអាណត្តិរូបនេះបានបន្តថាលោកនឹងប្រឹងប្រែងធ្វើយ៉ាងណាធានាថា កម្មវិធី YSEALI នេះនឹងមានជាទម្លាប់ និងបន្តលើកស្ទួយទំនាក់ទំនងរវាងយុវជននៅក្នុងតំបន់អាស៊ាន។
លោក បារ៉ាក់ អូបាម៉ា នឹងក្លាយបុរសវ័យក្មេងនៅពេលដែលចាកចេញពីតំណែងប្រធានាធិបតី ហើយលោក អូបាម៉ា នៅបន្តធ្វើការងារនានាជួយដោះស្រាយបញ្ហាពិភពលោក ជាពិសេសការងារដែលជួយដល់យុវជន។
ទាក់ទិនបញ្ហានេះ លោក បារ៉ាក់ អូបាម៉ា ក៏បានបន្ថែមផងថា លោកសង្ឃឹមថា លោកនឹងអាច បន្តប្រឡូកកាន់តែសកម្មនិងជិតស្និទ្ធជាមួយយុវជន ដែលជាសមាជិកកម្មវិធីភាពជាអ្នកដឹកនាំអាស៊ីអាគ្នេយ៍នេះ។
ការបន្តទំនាក់ទំនងនេះអាចកើតឡើងតាមរយៈការអនុវត្តគម្រោងរួមគ្នា និងចូលរួមផ្សព្វផ្សាយកម្មវិធី លើកកម្ពស់ការយល់ដឹងពីកម្មវិធីនេះដល់យុវជននៅតំបន់អាស៊ីអាគ្នេយ៍ដោយផ្ទាល់ថែមទៀត។៕
Tag:
បារ៉ាក់ អូបាម៉ា
YSEALI
© រក្សាសិទ្ធិដោយ thmeythmey.com