អន្តរជាតិ
នយោបាយអន្តរជាតិ
លោក Duterte ក្លាយជាតារា Rock ប្រចាំកិច្ចប្រជុំកំពូលអាស៊ាននៅឡាវ រូបភាពហ្វេសប៊ុកលោក Rodrigo Duterte
× រដ្ឋមន្ត្រីព័ត៌មានហ្វីលីពីន បានអះអាងថា ប្រធានាធិបតី Rodrigo Duterte ត្រូវបានទទួលស្វាគមន៍ពីសំណាក់បណ្តាមេដឹកនាំពិភពលោកនិងប្រតិភូជាច្រើននៅក្នុងកិច្ចប្រជុំកំពូលអាស៊ានប្រៀបដូច«តារា Rock»ដែលល្បីល្បាញ។ លោកមិនត្រឹមតែល្បីនៅហ្វីលីពីនប៉ុណ្ណោះទេ តែនៅទូទាំងអាស៊ាននិងដល់ជប៉ុនផង។
បណ្តាមេដឹកនាំអាស៊ាន និងមេដឹកនាំពិភពលោក សុទ្ធតែចង់ជួបប្រធានាធិបតីហ្វីលីពីនលោក Rodrigo Duterte ដោយផ្ទាល់ដើម្បីសំណេះសំណាលដើម្បីឲ្យបានដឹងថាលោកជាមនុស្សបែបណា។ កិច្ចប្រជុំកំពូលអាស៊ាននៅទីក្រុងវៀងចន្ទន៍ប្រទេសឡាវក្លាយទីកន្លែងបង្ហាញខ្លួនឬណែនាំខ្លួនជាលើកដំបូងរបស់ប្រមុខរដ្ឋហ្វីលពីន និងជាកន្លែងដែលមេដឹកនាំអាស៊ាននិងមេដឹកនាំពិភពលោកជួបជែកពិភាក្សាជាមួយលោកផ្ទាល់។
យោងតាមសារព័ត៌មាន Inquirer លោក Martin Andanar រដ្ឋមន្ត្រីព័ត៌មានហ្វីលីពីនបានអះអាងថា ក្នុងដំណើរទស្សនកិច្ចនៅបរទេសលើកទីមួយក្នុងនាមជាប្រធានាធិបតី លោក Duterte បានទទួលការស្វាគមន៍ពីមេដឹកនាំដទៃដូចជា «តារា Rock»។
លោកថ្លែងថា៖« ប្រធានាធិបតី Duterte ល្បីល្បាញ មិនមែននៅតែក្នុងហ្វីលីពីនទេ ប៉ុន្តែលោកក៏ល្បីល្បាញនៅឡាវ និងនៅជប៉ុនដែរ។ រដ្ឋមន្ត្រីការបរទេសនិងប្រតិភូបរទេសជាច្រើននាក់ប្រញាយគ្នាសុំថតរូប Selfies ជាមួយលោកទៀត»។ក្នុងដំណើរទស្សនកិច្ចទៅឡាវនេះដែរ លោក Duterte បានជួបពិភាក្សាទ្វេភាគីជាមួយមេដឹកនាំអាស៊ានច្រើននាក់ក្នុងនោះមានលោក លីសៀនឡុង នាយករដ្ឋមន្ត្រីសិង្ហបុរី និងលោក Nguyen Xuan Phuc នាយករដ្ឋមន្ត្រីវៀតណាមផងដែរ។
ចំណែកអ្នកនាំពាក្យប្រធានាធិបតី Eesto Abella លោក Duterte ទទួលបានការស្វាគមន៍យ៉ាងកក់ក្តៅពីសំណាក់ប្រមុខរដ្ឋប្រមុខរដ្ឋាភិបាលអាស៊ានទាំង ១០។ ហើយក្នុងនាមជាអ្នកនាំពាក្យលោក Eesto Abella អះអាងថា លោកពិតជាកោតសរសើរលោក Duterte ដែលអាចមានសមត្ថភាពក្នុងគ្រប់គ្រងរាល់ការសន្ទនាជាមួយបណ្តាមេដឹកនាំនានាក្នុងកិច្ចប្រជុំកំពូលអាស៊ានចិន។
កាលពីម្សិលមិញ ក្នុងកិច្ចពិភាក្សាទ្វេភាគីជាមួយនាយករដ្ឋមន្ត្រីជប៉ុន ស៊ីនហ្សូ អាបេ លោក Duterte ក៏ទទួលបានការកោតសរសើរផងដែរ។ លោក អាបេ បានប្រាប់លោក Duterte ត្រង់ៗថា លោក Duterte នេះជាអ្នកនយោបាយដែលល្បីខ្លាំងនៅប្រទេសជប៉ុនដែរ។
ទោះបីជាលោកល្បីល្បាញ ហើយមានអ្នកសុំជួបច្រើនយ៉ាងណាក៏ដោយ លោក បារ៉ាក់ អូបាម៉ា មិនមែនជា Fan របស់លោក Duterte ទេ។ ពាក្យសម្តីគំរោះគំរើយនិងអសុរោះរបស់លោក Duterte ដែលជេរប្រមាថលោកកន្លងមកបានធ្វើឲ្យលោក អូបាម៉ា ក្តៅក្រហាយមិនតិចទេ។លោកខឹងរហូតលុបចោលជំនួបទ្វេភាគីដែលគ្រោងទុករាប់ខែមកនេះផងដែរ៕
Tag:
Rodrigo Duterte
បារ៉ាក់ អូបាម៉ា
អាស៊ាន
© រក្សាសិទ្ធិដោយ thmeythmey.com