អន្តរជាតិ
នយោបាយអន្តរជាតិ
ជប៉ុនផ្តល់ជំនួយ១០៦លានដុល្លារ និងនាវាល្បាតឲ្យវៀតណាម
× ជប៉ុនប្រកាសផ្តល់ជំនួយដល់វៀតណាមក្នុងទំហំទឹកប្រាក់ ១១ ពាន់លានយ៉េនដែលស្មើ ១០៦លានដុល្លារ ដើម្បីជាគាំទ្រដល់ការអភិវឌ្ឍសង្គមនិងសេដ្ឋកិច្ច។ ជប៉ុនក៏បានផ្តល់នាវាល្បាតដល់កងទ័ពជើងទឹកវៀតណាមដើម្បីពង្រឹងសមត្ថភាពល្បាតដែនសមុទ្រនិងឃ្លាំមើលចិនដែរ។
រដ្ឋាភិបាលជប៉ុនបានប្រកាសផ្តល់ជំនួយទំហំ ១០៦លានដុល្លារអាមេរិកដើម្បីគាំទ្រដំណើរការនៃការអភិវឌ្ឍសេដ្ឋកិច្ចនិងសង្គម។ ចាប់ពីឆ្នាំ ១៩៩២មក ជប៉ុនបានជាប្រទេសផ្តល់អភិវឌ្ឍដ៏ធំដល់វៀតណាម ហើយពេលនេះជប៉ុនក៏ក្លាយជាអ្នកផ្តល់ជំនួយយោធាដល់វៀតណាមទៀត។
យោងតាមសារព័ត៌មានវៀតណាម Thanhnien កិច្ចព្រមព្រៀងផ្តល់ជំនួយត្រូវបានចុះហត្ថលេខាដោយអនុរដ្ឋមន្ត្រីក្រសួងផែនការនិងវិនិយោគ Nguyen Van Trung រួមជាមួយឯកអគ្គរាទូតជប៉ុនប្រចាំប្រទេសវៀតណាម Hiroshi Fukada នៅថ្ងៃអង្គារទី ៦ខែកញ្ញា។
ក្នុងពិធីចុះហត្ថលេខានោះ លោក Nguyen Van Trung បានលើកឡើងថា ជំនួយដែលផ្តល់ដោយរដ្ឋាភិបាលជប៉ុននេះនឹងត្រូវប្រើប្រាស់ដើម្បីគាំទ្រការគ្រប់គ្រងសេដ្ឋកិច្ច និងធ្វើឲ្យប្រសើរឡើងនូវការការប្រកួតប្រជែងផ្នែកសេដ្ឋកិច្ចដែលស្ថិតក្រោមផែនការអភិវឌ្ឍ ៥ឆ្នាំរបស់វៀតណាម។
ដោយឡែក ក្រៅពីជំនួយសម្រាប់គាំទ្រការអភិវឌ្ឍ រដ្ឋាភិបាលក្រុងតូក្យូក៏ជួយគាំទ្រជប៉ុនក្នុងការពង្រឹងវិស័យការពារជាតិជាពិសេសការល្បាតសមុទ្រ ស្របពេលពេលដែលវៀតណាមកំពុងមានជម្លោះជាមួយចិនដែរ។
នៅក្នុងកិច្ចពិភាក្សាទ្វេភាគីក្រៅកិច្ចប្រជុំអាស៊ាននៅវៀងចន្ទន៍ លោក ស៊ីនហ្សូ អាបេ បានប្រាប់សមភាគីវៀតណាមលោក Nguyen Xuan Phuc ថាជប៉ុនត្រៀមផ្តល់នាវាល្បាតដល់វៀតណាមដើម្បីពង្រឹងការល្បាតនិងការពារដែនសមុទ្រ។ តែគេមិនទាន់ដឹងច្បាស់ថា ជប៉ុននឹងផ្តល់នាវាល្បាតប៉ុន្មានគ្រឿងដល់វៀតណាម ហើយនិងកាលបរិច្ឆេទនៃការបញ្ជូននាវានេះទៅវៀតណាមឡើយ។ កន្លងមកជប៉ុនធ្លាប់ផ្តល់នាវាល្បាតចំនួន ៦គ្រឿងឲ្យទៅវៀតណាម ប៉ុន្តែនាវាទាំងនោះជានាវាដែលប្រើប្រាស់រួចហើយ៕
Tag:
Nguyen Xuan Phuc
ស៊ីនហ្សូអាបេ
សមុទ្រចិនខាងត្បូង
© រក្សាសិទ្ធិដោយ thmeythmey.com