លោក អូបាម៉ា ថា សាលក្រមលើសមុទ្រចិនខាងត្បូង មានអំណាចគតិយុត្តិ

អន្តរជាតិ

នយោបាយអន្តរជាតិ

លោក អូបាម៉ា ថា សាលក្រមលើសមុទ្រចិនខាងត្បូង មានអំណាចគតិយុត្តិ

09, Sep 2016 , 8:59 am

រូបភាព

ដោយ: តន ចាន់រិទ្ធារ៉ា

ប្រធានាធិបតីអាមេរិក លោក បារ៉ាក់ អូបាម៉ា បានផ្ញើព្រមានមួយទៅឲ្យក្រុងប៉េកាំង ជុំវិញសាលក្រមរបស់មជ្ឈត្តកម្មនៃតុលាការអន្តរជាតិលើសំណុំរឿងសមុទ្រចិនខាងត្បូង ដោយ ប្រធានាធិបតីអាមេរិក បានប្រាប់ចិនថា មិនត្រូវធ្វើមិនដឹងមិនលឺលើការសម្រេចនេះឡើយ ព្រោះវាមានអំណាចចាប់បង្ខំតាមផ្លូវច្បាប់។ សារព្រមានរបស់ប្រធានាធិបតីអាមេរិកនេះ ទំនងជាធ្វើឲ្យស្ថានការណ៍សមុទ្រចិនខាងត្បូង ឡើងកម្ដៅទៀតហើយ។

ការសម្រេចរបស់មជ្ឈត្តកម្មនៃតុលាការអន្តរជាតិ មិនត្រូវបានបញ្ចូលក្នុងសេចក្ដីថ្លែងការណ៍របស់ប្រធានអាស៊ានឡើយ។ ប៉ុន្តែការសម្រេចនេះ ត្រូវបានប្រធានាធិបតីអាមេរិក លោក បារ៉ាក់ អូបាម៉ា លើកឡើងក្នុងកិច្ចប្រជុំរវាងមេដឹកនាំអាស៊ានទាំង១០ ជាមួយនឹងប្រមុខអាមេរិក។ លោក អូបាម៉ា ប្រាប់មេដឹកនាំអាស៊ានថា សេចក្ដីសម្រេចខែកក្កដា មានអំណាចតាមផ្លូវគតិយុត្តិ ហើយបានបកស្រាយពីសិទ្ធិលើដែនទឹកនៅក្នុងតំបន់។

បើទោះជាដឹងថា ក្រុងប៉េកាំងនឹងឆ្លើយតបអ្វីដែលលោកនិយាយ ប្រធានាធិបតីអាមេរិកបញ្ជាក់ថា សំដីរបស់លោក អាចធ្វើឲ្យជម្លោះតានតឹង ប៉ុន្តែលោករង់ចាំការពិភាក្សា សម្រាប់បន្ថយស្ថានការណ៍ដែលតានតឹង ក៏ដូចជាជំរុញការចរចាការទូត និងការរក្សាស្ថិរភាពក្នុងតំបន់។ វាច្បាស់ណាស់ថា ចិន មិនពេញចិត្តនឹងការលើកឡើងនេះទេ ព្រោះពីដើមមក ចិនបានបដិសេធទទួលស្គាល់យុត្តាធិការរបស់តុលាការអន្តរជាតិលើសំណុំរឿងមួយនេះ។

ការសម្រេចរបស់តុលាការអន្តរជាតិ ថ្ងៃទី១២ ខែកក្កដា បានទាត់ចោលការទាមទាររបស់ចិន ដោយអះអាងថា ការទាមទារនោះគ្មានមូលដ្ឋានផ្លូវច្បាប់ទេ។ សាលក្រមដដែលបន្តថា ការកសាងកោះសិប្បនិម្មិតរបស់ចិន នាពេលកន្លងមក ក៏មិនសមស្របដែរ។ ទីភ្នាក់ងារព័ត៌មាន AFP ផ្សាយក្រុងប៉េកាំង បានចាត់ទុកសាលក្រមនេះ ជាក្រដាសគ្មានប្រយោជន៍ប៉ុណ្ណោះ។

ជួនពេលដែលលោក អូបាម៉ា កំពុងស្ថិតនៅប្រទេសឡាវ នាយករដ្ឋមន្ត្រីចិន លោក លី ខឺឈាំង ក៏កំពុងតែស្ថិតនៅប្រទេសនេះ ដើម្បីចូលរួមប្រជុំជាមួយមេដឹកនាំអាស៊ាន។ មេដឹកនាំទាំងពីរ ទំនងជាជួបមុខគ្នា អំឡុងពេលកិច្ចប្រជុំកំពូលអាស៊ានបូព៌ានៅថ្ងៃទី៨ ខែកញ្ញា ដែលមានប្រទេសចំនួន១៨ចូលរួម។

នៅមុនជួបប្រធានាធិបតីអាមេរិក សេចក្ដីថ្លែងការណ៍ប្រធានអាស៊ាន មិនបានលើកឡើងពីសេចក្ដីសម្រេចរបស់តុលាការអន្តរជាតិលើសំណុំរឿងសមុទ្រចិនខាងត្បូងទេ ដែលវាច្បាស់ណាស់ថា ចិន ពិតជាសប្បាយចិត្តខ្លាំងមិនខានឡើយ។ ដូចសព្វមួយដងនោះ សេចក្ដីថ្លែងការណ៍ប្រធានអាស៊ាន បានត្រឹមបង្ហាញពីការព្រួយបារម្ភជុំវិញការវិវត្តថ្មីៗនៅសមុទ្រចិនខាងត្បូង និងបានជំរុញឲ្យភាគីពាក់ព័ន្ធដោះស្រាយជម្លោះដោយសន្តិវិធី ដោយយោងតាមច្បាប់អន្តរជាតិ ជាពិសេសអនុសញ្ញាអង្គការសហប្រជាជាតិស្ដីពីច្បាប់សមុទ្រឆ្នាំ១៩៨២៕