លោក អូបាម៉ា យល់ថា«សង្គ្រាមអាមេរិក»នៅឡាវត្រឹមត្រូវក្នុងបរិបទសង្គ្រាមត្រជាក់

អន្តរជាតិ

លោក អូបាម៉ា យល់ថា«សង្គ្រាមអាមេរិក»នៅឡាវត្រឹមត្រូវក្នុងបរិបទសង្គ្រាមត្រជាក់

09, Sep 2016 , 10:59 pm

រូបភាព

ដោយ: សៅ ផលនិស្ស័យ (Sao Phal Niseiy)

លោក បារ៉ាក់ អូបាម៉ា បានបញ្ជាក់ថា សម័យសង្គ្រាមត្រជាក់ អាមេរិកស្ថិតនៅភាគីត្រឹមត្រូវ ហើយសង្គ្រាមអាមេរិកធ្វើក៏ដើម្បីប្រយុទ្ធប្រឆាំងចលនាកុម្មុយនីស្តដែរ ។ លោក អូបាម៉ា លើកឡើងបែបនេះនៅពេលអ្នកសារព័ត៌មានសាកសួរលោកថា តើលោកយល់ឃើញបែបណា និងគួរសូមអភ័យទោសប្រជាជនឡាវចំពោះសង្គ្រាមទម្លាក់គ្រាប់បែកសម័យសង្គ្រាមត្រជាក់នេះឬអត់?។

លោក បារ៉ាក់ អូបាម៉ា បានបដិសេដការសូមអភ័យទោសចំពោះការទម្លាក់គ្រាប់បែកនៅឡាវឬឬមានខ្លះហៅថាជា«សង្គ្រាមសម្ងាត់របស់អាមេរិក»ផង ពេលដែលអ្នកសារព័ត៌មានសាកសួរលោកផ្ទាល់នៅក្នុងសន្និសីទកាសែតនៅទីក្រុងវៀងចន្ទន៍នៅថ្ងៃ ៨កញ្ញា។

១. អូបាម៉ាបដិសេធសុំអភ័យទោស តែព្យាយាមព្យាបាលរបួសផ្លូវចិត្តប្រជាជនឡាវ
អ្នកសារព័ត៌មានបាន សួរលោក អូបាម៉ា ថា៖«តាមការមើលឃើញស្ថានភាពជាក់ស្តែង តើលោកគិតថា លោកគួរសូមអភ័យទោសចំពោះសង្គ្រាមសម្ងាត់របស់អាមេរិកនៅឡាវសម័យសង្គ្រាមត្រជាក់ដែរឬអត់?

តែលោកបារ៉ាក់ អូបាម៉ា បានឆ្លើយតបវិញក្នុងន័យបដិសេធការសូមអភ័យទោសចំពោះសង្គ្រាមអាមេរិកនៅឡាវនេះ។ លោកត្រឹមទទួលស្គាល់ថា សង្គ្រាមនេះបានបង្កផលប៉ះពាល់ខ្លាំងមែន តែវាត្រូវបានបង្កើតឡើងដើម្បីប្រឆាំងចលនាកុម្មុយនីស្តប៉ុណ្ណោះ។ ហើយអាមេរិកនៅតែមានកាតព្វកិច្ចសីលធម៌ជួយផ្សះផ្សារបួសផ្លូវចិត្តរបស់ប្រជាជនឡាវដែរ។

លោកបកស្រាយថា៖ «ខ្ញុំគិតថាអ្វីដែលខ្ញុំអាចនិយាយបានគឺ អាមេរិកធ្វើត្រឹមត្រូវ បើនិយាយពី ប្រវត្តិសាស្ត្រនាសម័យសង្គ្រាមត្រជាក់។ វាជាពេលវេលាមួយដែល គោលដៅតែមួយរបស់យើងគឺយកឈ្នះលើការផ្សព្វផ្សាយមនោគមន៍វិជ្ជាកុម្មុយនីស្ត នៅក្នុងតំបន់អាស៊ីអាគ្នេយ៍ ហើយយើងមិនបានគិតគូរឲ្យដិតដល់ពីលទ្ធផលនៃអ្វីដែលយើងធ្វើក្នុងនាមជាអ្នកបង្កើតគោលនយោបាយ»។

ក្នុងសម័យសង្គ្រាមវៀតណាមពីឆ្នាំ១៩៦៤ ដល់ឆ្នាំ១៩៧៣ យន្តហោះចម្បាំងអាមេរិក បានទម្លាក់គ្រាប់បែកចង្កោមច្រើនជាង២៧០លានគ្រាប់ ទៅលើទីតាំងជាច្រើនក្នុងទឹកដីរដ្ឋកុម្មុយនីស្តឡាវ ហើយគ្រាប់មួយភាគបីមិនទាន់ផ្ទុះទេ។ ដូច្នេះហើយ ឡាវបានក្លាយជាប្រទេសរងគ្រោះខ្លាំងមួយ ព្រោះគ្រាប់មិនទានផ្ទុះបានសម្លាប់ និងធ្វើឲ្យរបួសមនុស្សច្រើនជាង២ម៉ឺននាក់ផង ។

ថ្វីបើប្រធានាធិបតីរូបនេះមិនបានសូមអភ័យទោសចំពោះសង្គ្រាមអាមេរិកនៅឡាវក្តី លោកបានប្រកាសផ្តល់ជំនួយដល់ឡាវដើម្បីដោះគ្រាប់មិនទាន់ផ្ទុះនេះចេញ។ សកម្មភាពនេះត្រូវបានគេហៅថា ជាការផ្សះផ្សាទំនាក់ទំនងរវាងប្រទេសទាំងពីរ។ កាលពីថ្ងៃ ៦ កញ្ញា សេតវិមានអាមេរិក បានប្រកាសថា អាមេរិក នឹងផ្ដល់ជំនួយបន្ថែមចំនួន៩០លានដុល្លារ ក្នុងពេលបីឆ្នាំខាងមុខ ដើម្បីជួយប្រទេសឡាវ ក្នុងការដោះគ្រាប់មិនទាន់ផ្ទុះ ។

២.លោក អូបាម៉ា ថា យុទ្ធជនអាមេរិកដែលធ្វើសង្គ្រាមនៅឡាវសុទ្ធតែជា«វីរបុរស»
ទាក់ទងសំណួរថាតើ យុទ្ធជនអាមេរិកទាំងស្រី ទាំងប្រុស ដែលប្រឡូកក្នុងសង្គ្រាមសម្ងាត់នៅឡាវជាវីរបុរសដូចកងទ័ពធ្វើសង្គ្រាមនៅអ៊ីរ៉ាក់ឬនៅអាហ្វហ្កានីស្ថានអត់ លោក អូបាម៉ាឆ្លើយតបថា អ្នកទាំងនោះសុទ្ធតែជាវីរបុរសរបស់អាមេរិក។

សម្រាប់លោក បារ៉ាក់ អូបាម៉ា មូលហេតុដែលលោកគិតថា អ្នកទាំងនោះជាវីរបុរសដោយសារ អ្នកបង្កើតគោលនយោបាយជាអ្នកសម្រេចចិត្ត តែយុទ្ធជនអាមេរិកដែលលះបង់ជីវិត ត្រឹមអនុវត្តតាមការសម្រេចចិត្តនេះប៉ុណ្ណោះ។

លោកអូបាម៉ា ពន្យល់ថា៖« រាល់យុទ្ធជនអាមេរិកតែងនិយាយពេញមាត់ថាពួកគេមានឆន្ទៈធ្វើគ្រប់យ៉ាង ទោះក្នុងស្ថានភាពណាក្តី ធ្វើតាមអ្វីដែលមេបញ្ជាការកំពូលបញ្ជា ដើម្បីធ្វើយ៉ាងណារក្សាសុវត្ថិភាពប្រជាជនអាមេរិក។ ពួកគេយកជីវិតទៅពាំងគ្រោះថ្នាក់ និងហ៊ានពលីជីវិតដើម្បីការពារប្រជាជនអាមេរិក។ សកម្មភាពលះបង់ដ៏ធំធេងនេះជាវីរបុរស»។

លោកបន្ថែមថា៖ « ដូច្នេះហើយបានជាខ្ញុំត្រូវប្រុងប្រយ័ត្នខ្លាំងនៅពេលដែលត្រូវសម្រេចចិត្តធ្វើអ្វីមួយដែលពាក់ព័ន្ធសង្គ្រាម និងសន្តិភាព។ នេះក៏ដោយសារខ្ញុំដឹងថា រាល់ការសម្រេចចិត្តដែលខ្ញុំធ្វើ យុទ្ធជនយុទ្ធនារីអាមេរិកជាអ្នកអនុវត្ត ទោះបីជាពួកគេគិតថាវាខុសក៏ដោយ ហើយវាមិនស្របតាមគំនិតពួកគេក៏ដោយ»៕