អន្តរជាតិ
ក្រៅពីការភ្ជាប់សេដ្ឋកិច្ចជាមួយអាស៊ាន«ការជ្រោមជ្រែងយុវជនអាស៊ាន»ក៏ជាកិច្ចការអាទិភាពដែលអាមេរិកត្រូវធ្វើដែរ
×![]()
លួងប្រាបាង, ឡាវ៖ អគ្គរដ្ឋទូតអាមេរិកប្រចាំអាស៊ាន លោកស្រី Hachigian បានពន្យល់យុវជន និងមេដឹកនាំវ័យក្មេងអាស៊ានទាំងដប់ប្រទេសដែលជាសមាជិកនៃគំនិតផ្តួចផ្តើម YSEALI ជិត២០០នាក់ ថាការជួយជ្រៀមជ្រែងយុវជនដែលមានសក្តានុពល និងកំពុងរះឡើងរបស់អាស៊ាន ក៏ស្ថិតនៅក្នុងកិច្ចការអាទិភាពផ្លូវការមួយរបស់អាមេរិកមកកាន់អាស៊ានផងដែរ។ 
«អាមេរិក គឺជាដៃគូវិនិយោគធំំបំផុតនៅក្នុងអាស៊ាន ហើយសេដ្ឋកិច្ចរបស់អាស៊ាន គឺពិតជាមានឥទ្ធិពលមកលើអាមេរិកផងដែរ។ មួយវិញទៀតនោះ ក្រៅពីសមាហរណកម្មសេដ្ឋកិច្ច ការផ្តល់ឳកាសម្រាប់ស្ត្រី បញ្ហាប្រឈមអន្តរប្រទេស ដែលរាប់បញ្ចូលទាំងការប្រែប្រួលអាកាសធាតុ កិច្ចសហប្រតិបតិបត្តិការដែនសមុទ្រ និងការជ្រៀមជ្រែងមេដឹកនាំដែលកំពុងលេចធ្លោ ឬមានសក្តានុពល គឺជាកិច្ចការអាទិភាពនៅក្នុងទំនាក់ទំនងអាមេរិក-អាស៊ាន»។ នេះ គឺជាសេចក្តីថ្លែងការណ៍របស់លោកស្រីអគ្គរដ្ឋទូត Hachigian ទៅកាន់យុវជននាជំនួបកំពូលប្រចាំឆ្នាំ២០១៦ក្នុងក្រុងលួងប្រាបាងនៃប្រទេសឡាវកាលពីដើមសប្តាហ៍កន្លងទៅ។
នាឱកាសនោះដែរ លោកស្រីអគ្គរដ្ឋទូតរូបនោះ ក៏បានបញ្ជាក់នៅមុខយុវជនផងដែរថា គឺពួកគេនោះហើយដែលជាមេដឹកនាំដែលកំពុងរះដែលអាមេរិកត្រូវជួយជ្រោមជ្រែង។ លោកស្រី ថែមទាំងនិយាយឲ្យយុវជនដឹងដែរថា លោកប្រធានាធិបតីអាមេរិក បារ៉ាក់ អូបាម៉ា ធ្លាប់ប្រាប់ប្រមុខរដ្ឋ និងប្រមុខរដ្ឋាភិបាលអាស៊ាននាកិច្ចប្រជុំកំពូលអាមេរិក-អាស៊ាន នៅ Sunnylands នៃសហអាមេរិកកាលពីដើមឆ្នាំ ដោយលោក អូបាម៉ា លើកឡើងថា «លោក ពិតជាមានមោទនភាពដែលគំនិតផ្តួចផ្តើមYSEALI កំពុងតែជួយជំរុញយុវជនវ័យក្មេងដែលកំពុងតែជួយកែប្រែតំបន់ឲ្យកាន់តែល្អប្រសើរ»។
សូមជម្រាបផងដែរថា គំនិតផ្តួចផ្តើម YSEALI (Young Southeast Asian Leadership Initiative) គឺជាគំនិតផ្តួចផ្តើមមួយដែលត្រូវបានបង្កើតឡើងក្រោមរដ្ឋបាលរបស់លោកប្រធានាធិបតីអាមេរិក បារ៉ាក់ អូបាម៉ា តាំងពីឆ្នាំ២០១៣។ គំនិតផ្តួចផ្តើមនេះ មានទិសដៅពង្រឹងសមត្ថភាពយុវជន និងមេដឹកនាំវ័យក្មេងរបស់ប្រទេសទាំងដប់នៃអាស៊ានដែលជាសមាជិកខ្លួនពាក់ព័ន្ធបញ្ហាបរិស្ថាន អប់រំ ការផ្សារភ្ជាប់ខ្លួនជាមួយនឹងប្រជាជនស៊ីវិល និង សហគ្រិនភាពនិងសេដ្ឋកិច្ច។ តាមរយៈកម្មវិធីនេះ យុវជន ក៏មានឳកាសដើម្បីបំពេញកម្មសិក្សានៅសហរដ្ឋអាមេរិក និងប្រទេសក្នុងតំបន់ផងដែរ។
បើទោះបីជាអ្នកផ្តួចផ្តើមនៃកម្មវិធីនេះ គឺលោកប្រធានាធិបតីបារ៉ាក់ អូបាម៉ា នឹងត្រូវបញ្ចប់អាណត្តិដឹកនាំរបស់លោកនាពេលខាងមុខដ៏ខ្លីក៏ដោយ គំនិតផ្តួចផ្តើមដែលមានសមាជិកជាយុវជន និងមេដឹកនាំវ័យក្មេងជាង៩ម៉ឺននាក់ហើយនោះ មិនបញ្ចប់ឡើយ។ លោកប្រធានាធិបតី អូបាម៉ា នៅតែបន្សល់ក្តីសង្ឃឹមសម្រាប់យុវជនដែលជាសមាជិកនៃគំនិតផ្តួចផ្តើមនេះតាមរយៈសុន្ទរកថាចុងក្រោយរបស់លោកក្នុងនាមជាប្រធានាធិបតីអាមេរិកនៅក្នុងប្រទេសឡាវ ដោយបញ្ជាក់ថា រដ្ឋាភិបាលអាមេរិក នឹងនៅតែបន្តពង្រឹងសមត្ថភាពយុវជនតាមរយៈកម្មវិធីនេះដដែល៕
Tag:
YSEALI
អាមេរិក
© រក្សាសិទ្ធិដោយ thmeythmey.com
