អន្តរជាតិ
×![]()
ក្នុងទស្សនកិច្ចមកកាន់ប្រទេសវៀតណាមកាលពីដើមសប្តាហ៍នេះ ប្រធានាធិបតីបារាំង លោក ហ្វ្រង់ស្វ័រ ហូឡង់ សម្រេចបានកិច្ចព្រមព្រៀងជាច្រើនជាមួយមេដឹកនាំវៀតណាមដើម្បីពង្រឹងកិច្ចសហប្រតិបត្តិការនិងទំនាក់ទំនងពាណិជ្ជកម្មទ្វេភាគីក្រោមក្របខណ្ឌដៃគូយុទ្ធសាស្ត្រ។ យ៉ាងណាមិញការចូលមកចែរចូវវៀតណាមពេលនេះ បង្ហាញឲ្យឃើញពីចេតនារបស់រដ្ឋាភិបាលក្រុងប៉ារីក្នុងការត្រឡប់មកពង្រឹងឥទ្ធិពលរបស់ខ្លូនតំបន់។ បារាំងក៏បង្ហើបបំណងចង់ចូលមកពាក់ព័ន្ធជាមួយបញ្ហាជម្លោះសមុទ្រចិនខាងត្បូងថែមទៀត ដោយលើកយកការការពារសេរីភាពនាវាចរណ៍ និងការហោះហើរជាសម្អាង។ វៀតណាមមានខ្នងបង្អែកកាន់តែច្រើន ស្របពេលដែលប្រទេសនេះបន្តប្រឈមមុខជាមួយមហាយក្សចិន។
លោក ហ្វ្រង់ស្វ័រ ហូឡង់ ក្លាយជាប្រធានាធិបតីបារាំងទីមួយដែលទៅទស្សនកិច្ចវៀតណាមចាប់ពីដើមទសវត្សរ៍ឆ្នាំ ១៩៩០ ពោលគឺក្រោយការធ្វើកំណែទម្រង់សេដ្ឋកិច្ចដែលគេស្គាល់ថា «ដូយមឺយ»។ ហើយលោក ក៏ជាមេដឹកនាំបារាំងទី ៣ ដែលទៅទស្សនកិច្ចនៅវៀតណាមចាប់ពីពេលវៀតណាមប្រកាសឯករាជ្យពីបារាំងឆ្នាំ ១៩៥៤។ វត្តមានមេដឹកនាំកំពូលបារាំងនៅវៀតណាមនេះក៏បានបញ្ជាក់ឲ្យឃើញកាន់តែច្បាស់ពីការផ្លាស់ប្តូរទំនាក់ទំនងជូរចត់ដែលមានកាលពីអតីតកាលជាពិសេសពេលបារាំងចាញ់វៀតណាមក្នុងសមភូមិ Dian Bian Phu ឆ្នាំ ១៩៥៤។
ក្នុងទស្សនកិច្ចនេះ លោក ហ្វ្រង់ស្វ័រ ហូឡង់បានជួបពិភាក្សាជាមួយសមភាគីវៀតណាម លោក Tran Dai Quang ហើយប្រធានបទនៃកិច្ចពិភាក្សាផ្តោតសំខាន់លើបញ្ហាជាច្រើនក្នុងនោះមានបរិស្ថាន សេដ្ឋកិច្ច ពាណិជ្ជកម្ម និងកិច្ចសហប្រតិបត្តិការការពារជាតិផងដែរ។
យោងតាមសារព័ត៌មាន The Diplomat មេដឹកនាំបារាំងនិងវៀតណាម បានលើកឡើងពីភាពចាំបាច់ក្នុងការពង្រឹងកិច្ចសហប្រតិបត្តិការ និងភាពជាដៃគូយុទ្ធសាស្ត្រដែលភាគីទាំងពីរបានបង្កើតឡើងមកតាំងពីឆ្នាំ ២០១៣មក។ បារាំងនៅតែជាដៃគូ អភិវឌ្ឍរបស់វៀតណាមនិងជាម្ចាសជំនួយដ៏ធំសម្រាប់គាំទ្រការអភិវឌ្ឍរបស់វៀតណាមដែរ។ យោងតាមអត្ថបទមួយដែលចុះផ្សាយក្នុងសារព័ត៌មាន The Diplomat បារាំងជាម្ចាស់ជំនួយធំបំផុតលំដាប់ទីពីររបស់វៀតណាមបន្ទាប់ពីជប៉ុន។ វៀតណាមបានទទួលជំនួយសរុប ១.៧ពាន់លានដុល្លាររាប់ចាប់ពីឆ្នាំ ១៩៩៣មក។
១.បារាំងពង្រឹងចំណងសេដ្ឋកិច្ចជាមួយវៀតណាម
ក្នុងដំណើរទស្សនកិច្ចនេះដែរ មេដឹកនាំបារាំងនិងវៀតណាមបានសម្រេចកិច្ចព្រមព្រៀងពាណិជ្ជកម្មចំនួន ២០ ហើយក្នុងចំណោមកិច្ចព្រមព្រៀងនោះមាន កិច្ចព្រមព្រៀងមួយដែលផ្តោតលើការកិច្ចសហប្រតិបត្តិការត្រួតពិនិត្យអាកាស។ កិច្ចព្រមព្រៀងមួយទៀតវិញផ្តោតលើការដោះស្រាយបញ្ហាបរិស្ថាន ដោយរដ្ឋាភិបាលបារាំងនឹងជួយគាំទ្រខេត្តមួយចំនួនរបស់វៀតណាមក្នុងការដោះស្រាយបញ្ហាកើនឡើងនៃកម្រិតនីវ៉ូទឹកសមុទ្រផងដែរ។
អ្វីដែលគួរឲ្យកត់សម្គាល់បំផុតនោះគឺ ក្រុមហ៊ុនអាកាសចរណ៍វៀតណាមសម្រេចចុះកិច្ចព្រមព្រៀងទិញយន្តហោះក្រុមហ៊ុន Airbus ចំនួន ៤០គ្រឿង ក្នុងតម្លៃទឹកប្រាក់ ៦.៥ពាន់លានដុល្លារអាមេរិក។
បារាំងនិងវៀតណាមកំពុងព្យាយាមពង្រឹងចំណងពាណិជ្ជកម្មទ្វេភាគីបន្ថែម ហើយរកមើលវិធីសាស្ត្រក្នុងការលើកស្ទួយកិច្ចសហប្រតិបត្តិការរវាងសហគ្រិនវៀតណាមនិងបារាំង ក៏ដូចជាជំរុញឲ្យមានការផ្ទេរបច្ចេកវិទ្យាទំនើបដល់ក្រុមហ៊ុនវៀតណាមផងដែរ។
បើនិយាយពីចំណងពាណិជ្ជកម្មទ្វេភាគីវិញ ក៏កើនឡើងរហ័សគួរឲ្យកត់សម្គាល់ដែរ។ បារាំងជាដៃគូវិនិយោគធំបំផុតលំដាប់ទីប្រាំនៅអឺរ៉ុប ហើយពាណិជ្ជកម្មទ្វេភាគីរវាងប្រទេសទាំងពីរកើនដល់ ៤.២ពាន់លានដុល្លារក្នុងឆ្នាំ ២០១៥។ ក្រុមហ៊ុនបារាំងប្រហែល ៣០០ កំពុងបើកដំណើរការនៅវៀតណាម។ដូច្នេះទស្សនកិច្ចកន្លងទៅរបស់ប្រធានាធិបតីបារាំងជាការត្រួសត្រាយផ្លូវសម្រាប់ការបង្កើនកិច្ចសហប្រតិបត្តិការនិងចំណងពាណិជ្ជកម្មឲ្យកាន់តែខ្លាំងជាងមុនដែរ។
ពាក់ព័ន្ធចំណងពាណិជ្ជកម្មនេះ វៀតណាម នាំចេញស្បែកជើង,សម្ភារៈវាយនភណ្ឌ, ឧបករណ៍ប្រើប្រាស់ក្នុងផ្ទះ, គ្រឿងសមុទ្រ, ម៉ាស៊ីន និងគ្រឿងអេឡិចត្រនិកទៅកាន់ប្រទេសបារាំង។ ហើយប្រទេសនេះនាំចូលឧបករណ៍ប្រើប្រាស់បម្រើវិស័យអាកាសចរណ៍, ថ្នាំ, គ្រឿងម៉េកានិច, ឧបករណ៍អេឡិចត្រួនិក,សារធាតុគីមី និងគ្រឿងស្រវឹងពីបារាំង។
២.បារាំងចង់លូកលាន់រឿងសមុទ្រចិនខាងត្បូង?
ក្រៅពីពង្រឹងកិច្ចសហប្រតិបត្តិការពាណិជ្ជកម្ម មេដឹកនាំបារាំងមកវៀតណាមលើកនេះ ក៏ដើម្បីជជែកពីបញ្ហាសន្តិសុខដែនសមុទ្រដែរនិយាយឲ្យចំគឺបញ្ហាសមុទ្រចិនខាងត្បូង។ យោងតាមសារព័ត៌មានបារាំង France 24 លោក ហ្វ្រង់ស្វ័រ ហូឡង់បាននិយាយជាមួយសមភាគីវៀតណាមលោក Quang រឿងសេរីភាពផ្លូវសមុទ្រដែលជាបញ្ហាចម្បងរបស់វៀតណាម ព្រោះប្រទេសនេះកំពុងប្រឈមមុខជាមួយចិនក្នុងជម្លោះសមុទ្រចិនខាងត្បូងនោះ។
ទស្សនកិច្ចរបស់លោក ហ្វ្រង់ស្វ័រ ហូឡង់ តាមពិតទៅកើតឡើងត្រឹមប៉ុន្មានថ្ងៃប៉ុណ្ណោះក្រោយនាយករដ្ឋមន្ត្រីឥណ្ឌាលោក នារិន្ទ្រា ម៉ូឌី ទៅទស្សនកិច្ចនៅវៀតណាមដើម្បីពង្រឹងកិច្ចសហប្រតិបត្តិការទ្វេភាគី។ អ្វីដែលសំខាន់ ប្រមុខរដ្ឋាភិបាលឥណ្ឌាលោក ម៉ូឌី បានប្រកាសផ្តល់ជំនួយ ៥០០លានដុល្លារដល់វៀតណាមដើម្បីពង្រឹងវិស័យការពារជាតិដែរ។ មិនខុស ពីបារាំងឥណ្ឌាមើលឃើញសក្តានុពលវៀតណាម ដែលអាចគាំទ្រខ្លួនបាន និងអាចជាជន្ទល់នៃនយោបាយការបរទេសពង្រឹងឥទ្ធិពលឥណ្ឌានៅអាស៊ីប៉ាស៊ីហ្វិកផង។
ទស្សនកិច្ចរបស់ប្រមុខរដ្ឋបារាំងនេះដែរ ក៏កើតឡើងប្រហែលជិត២ខែ ក្រោយពេលដែលតុលាការមជ្ឈត្តការអន្តរជាតិចេញសេចក្តីសម្រេចទាត់ចោលការទាមទាររបស់ចិនដែលឆ្បាមយកស្ទើរតែទាំងស្រុងនៃតំបន់ជម្លោះដោយពឹងផ្អែកលើផែនទីប្រាំបួនចំណុចរបស់ចិនដែលគូសជាលក្ខណៈឯកតោភាគី។ ហើយក្រោយការចេញសេក្តីសម្រេចនេះ បណ្តាប្រទេសពាក់ព័ន្ធបានដាក់សម្ពាធឲ្យចិនបំពេញកាតព្វកិច្ចដោយអនុវត្តតាមការកំណត់របស់ស្ថាប័នយុត្តាធិការអន្តរជាតិពាក់ព័ន្ធបញ្ហាសមុទ្រចិនខាងត្បូង។ តែចិនបានប្រកាសថា ខ្លួនមិនខ្វល់ និងចាត់ទុកសេចក្តីសម្រេចតុលាការជាក្រដាសមួយច្បាប់ដែលគ្មានតម្លៃ។
ត្រឡប់មកវិញ ក្នុងជំនួបនោះ មេដឹកនាំទាំងពីរបានអំពាវនាវឲ្យបណ្តាគូភាគីដោះស្រាយជម្លោះដោយសន្តិវិធីនិងមិនប្រើប្រាស់ហិង្សាដែលរំលោភច្បាប់អន្តរជាតិឡើយ។ មេដឹកនាំប្រទេសទាំងពីរក៏ឯកភាពគ្នាថានឹងប្រឹងប្រែងធ្វើយ៉ាងណាគោរពច្បាប់អន្តរជាតិជាពិសេសច្បាប់សមុទ្រ និងធានារក្សាឲ្យបាននូវសេរីភាពនាវាចរណ៍និងការហោះហើយ។
តាមការមើលឃើញជាក់ស្តែង បារាំងហាក់បីដូចជាចង់ចូលមកឈឺឆ្អាលក្នុងរឿងជម្លោះសមុទ្រចិនខាងត្បូងនេះដែរ ស្របពេលដែលសហរដ្ឋអាមេរិកដែលជាសម្ព័ន្ធមិត្តបារាំងលង់ខ្លួនជ្រៅក្នុងតំបន់អាស៊ីរួចទៅហើយនោះ។
កន្លងមក បារាំងបានបង្ហាញបំណងចូលរួមក្នុងការល្បាតសមុទ្រនៅអាស៊ីដែរ។ ដូចឃើញស្រាប់រដ្ឋមន្ត្រីការពារជាតិបារាំង បានលើកឡើងពីការល្បាតរួមគ្នាក្រោមគម្រោងរបស់សហភាពអឺរ៉ុបនៅពេលលោកចូលរួមក្នុងវេទិកាសន្តិសុខ Shangri-La នៅសិង្ហបុរីកាលពីខែមិថុនាឆ្នាំមុន។ តាមរយៈសកម្មភាពនេះ បារាំងទំនងជាចង់ពង្រឹងឥទ្ធិពលរបស់ខ្លួនឡើងវិញនៅក្នុងតំបន់ឥណ្ឌូចិន និងតំបន់អាស៊ីទាំងមូលដែរ។
យ៉ាងណាក៏ដោយចុះ រដ្ឋអឺរ៉ុបជាច្រើនរួមទាំងបារាំងហាក់ស្ទាក់ស្ទើរខ្លាំងនៅពេលដែលពួកគេលូកលាន់បញ្ហាណាមួយដែលពាក់ព័ន្ធជាមួយចិន។ ចិនក្លាយដៃគូពាណិជ្ជកម្មសំខាន់មិនអាចខ្វះបានរបស់អឺរ៉ុប រួមទាំងបារាំងផ្ទាល់។ ដូច្នេះ ចង់មិនចង់ បារាំងត្រូវដើរដោយប្រុងប្រយ័ត្នក្នុងពេលដែលមហាអំណាចណាចនេះចែរចូវវៀតណាម ហើយលូកលាន់បញ្ហាជម្លោះសមុទ្រចិនខាងត្បូងផងនោះ។
៣. មេដឹកនាំបារាំងមិនភ្លេចនិយាយរឿងសិទ្ធិមនុស្សជាមួយវៀតណាម
ខាងស្ថាប័នសិទ្ធិមនុស្ស ដូចជាអង្គការលើកលែងទោសអន្តរជាតិបានស្នើសុំទៅប្រធានាធិបតីបារាំងផងដែរ ដើម្បីឲ្យលោកអាចធានាថាកិច្ចព្រមព្រៀងពាណិជ្ជកម្មរាប់ពាន់លានដុល្លារនេះមិនរំលងបញ្ហាសិទ្ធិឡើយ។
លោក ហ្វ្រង់ស្វ័រ ហូឡង់ បានឆ្លៀតដាស់តឿនវៀតណាមឲ្យពិចារណាដោះលែងអ្នកទោសនយោបាយនិងសកម្មជនសិទ្ធិមនុស្សដែលវៀតណានចាប់ខ្លួនចំនួន៤រូប ក្នុងពេលដែលលោកពិភាក្សាជាមួយសមភាគីវៀតណាម។
ក្នុងពេលដែលលោក ហ្វ្រង់ស្វ័រហូឡង់ស្ថិតនៅវៀតណាម អង្គការលើកលែងទោសអន្តរជាតិបានចេញសេចក្តីថ្លែងការណ៍អំពាវនាវឲ្យបារាំងលើកឡើងពីបញ្ហាសិទ្ធិមនុស្ស។ ប្រធានអង្គការលើកលែងទោសអន្តរាជាតិ Camille Blanc បានថ្លែងក្នុងសេចក្តីថ្លែងការណ៍ថា៖« បញ្ហាសិទ្ធិមនុស្សមិនត្រូវមានការបំភ្លេចចោលដើម្បីធានាពីកិច្ចព្រមព្រៀងសន្តិសុខនិងពាណិជ្ជកម្មឡើយ។ លោក ហូឡង់ ត្រូវប្រើប្រាស់ទស្សនកិច្ចរបស់លោកដើម្បីអំពាវនាវឲ្យអាជ្ញាធរវៀតណាមដើម្បីឲ្យពួកគេបំពេញកាតពកិច្ចអនុលោមតាមច្បាប់អន្តរជាតិ»៕
Tag:
ហ្វ្រង់ស្វ័រ ហូឡង់
Tran Dai Quang
នារិន្ទ្រា ម៉ូឌី
© រក្សាសិទ្ធិដោយ thmeythmey.com
