អន្តរជាតិ
ថៃនិងម៉ាឡេស៊ី ចង់ធ្វើជញ្ជាំងតាមព្រំដែនដើម្បីទប់ស្កាត់ឧក្រិដ្ឋកម្មឆ្លងដែន
× ក្រោយចាកចេញពីកិច្ចប្រជុំអាស៊ាននៅឡាវ នាយករដ្ឋមន្ត្រីម៉ាឡេស៊ី ណាជីប រ៉ាហ្សាក់ (Najib Kazak) បានបន្តធ្វើទស្សនកិច្ចនៅថៃ។ ពីទីក្រុងបាងកក លោក ណាជីប និងនាយករដ្ឋមន្ត្រីថៃ លោក ប្រាយុទ្ធ ចន្ទអូចា បានឯកភាពគ្នាបង្កើនការចែករម្លែកព័ត៌មានចារកម្ម ដើម្បីទប់ស្កាត់ឧក្រិដ្ឋកម្មឆ្លងដែន ជាពិសេសការរត់ពន្ទមនុស្ស និងបានពិភាក្សាលើលទ្ធភាពនៃការសាងសង់ជញ្ជាំងតាមបណ្ដោយព្រំដែនប្រទេសទាំងពីរដែរ។
មេដឹកនាំម៉ាឡេស៊ី និងថៃ នៅថ្ងៃទី៩ ខែកញ្ញា បានយល់ព្រមលើការចែករម្លែកព័ត៌មានសម្ងាត់ទាក់ទនងសន្តិសុខប្រទេសទាំងពីរ ដែលកំពុងប្រឈមមុខខ្លាំងនឹងការគំរាមកំហែងពីក្រុមឧក្រិដ្ឋជន។ ព្រំដែនរវាងម៉ាឡេស៊ី និងថៃ គឺជាចំណុចឆ្លងកាត់យ៉ាងមមាញឹករបស់ឧក្រិដ្ឋជនរត់ពន្ធមនុស្ស និងគ្រឿងញៀន និងក្លាយជាមូលដ្ឋានក្រុមភេរវករជ្រុលនិយម ដែលប្រើទីតាំងព្រំដែនសម្រាប់ធ្វើសកម្មភាពលើទឹកដីថៃ។
នាយករដ្ឋមន្ត្រីម៉ាឡេស៊ី លោក ណាជីប រ៉ាហ្សាក់ ប្រាប់អ្នករាយការណ៍ព័ត៌មានថា សន្តិសុខនៅតែបញ្ហារវាងប្រទេសទាំងពីរ ហើយប្រទេសទាំងពីរព្រមព្រៀងគ្នាចែករម្លែកព័ត៌មានចារកម្ម ដើម្បីប្រយុទ្ធប្រឆាំងនឹងភេរវកម្មឆ្លងដែន។ ព័ត៌មានទាំងនោះ នឹងជួយដល់ការកំណត់អត្តសញ្ញាណជនសង្ស័យ ជាពិសេសអ្នកដែលមានសញ្ជាតិពីរ។ លោកបន្តថា ម៉ាឡេស៊ី និងថៃ គឺដូចជាបងប្អូនប្រុសពីរនាក់ ដែលផឹកទឹកអណ្ដូងតែមួយ។
ចំណែកលោកនាយករដ្ឋមន្ត្រី ប្រាយុទ្ធ វិញ ក៏និយាយដែរថា ទាំងថៃ និងម៉ាឡេស៊ី សុទ្ធតែប្រឈមមុខនឹងបញ្ហាសន្តិសុខ ដូចជាការប្រយុទ្ធប្រឆាំងភេរវកម្ម ការជួញដូរមនុស្ស។ ទាក់ទិននឹងបញ្ហានេះ នាយករដ្ឋមន្ត្រីម៉ាឡេស៊ី បញ្ជាក់ថា លោក និងនាយករដ្ឋមន្ត្រីថៃ ក៏ពិភាក្សាគ្នាលើការសាងសង់ជញ្ជាំងតាមព្រំដែនប្រទេសទាំងពីរ សម្រាប់ទបស្កាត់សកម្មភាពខុសច្បាប់ទាំងនេះ។
កាសែតបាងកកប៉ុស្តិ៍ផ្សាយថា ថៃ និងម៉ាឡេស៊ី មានព្រំដែនចម្ងាយ៦៤០គីឡូម៉ែត ដែលត្រូវបានក្រុមឧក្រិដ្ឋជន ប្រើសម្រាប់រត់ពន្ធថ្នាំញៀន អាវុធ មនុស្ស។ ប៉ុន្តែផែនការកសាងជញ្ជាំងព្រំដែននេះ កំពុងស្ថិតក្រោមការពិចារណាឲ្យពិស្ដារនៅឡើយ។ ទីតាំងនេះ ក៏ត្រូវបានក្រុមឧទ្ទាមភាគខាងត្បូងថៃ ប្រើជាមូលដ្ឋានសម្រាប់វាយប្រហារនៅខេត្តភាគខាងត្បូង ក៏ដូចជាតំបន់ដទៃទៀតផងដែរ។
ការវាយប្រហារជាច្រើនលើកនៅរយៈពេលចុងក្រោយនេះ តម្រូវឲ្យរដ្ឋាភិបាលថៃ និងម៉ាឡេស៊ី សហការគ្នាបោសសម្អាតក្រុមឧកក្រិដ្ឋជន ដែលកំពុងពង្រឹងខ្លួននៅតំបន់ភាគខាងត្បូងថៃ ជាប់ព្រំដែនជាមួយម៉ាឡេស៊ី និងសម្បូរដោយជនមូស្លីមភាគច្រើន។ ចលនាឧទ្ទាមជាច្រើន បានធ្វើសកម្មភាពបំផ្ទុះគ្រាប់ ដើម្បីទាមទារការបំបែករដ្ឋ ដ្បិតពួកគេមិនចង់រស់នៅក្រោមរដ្ឋបាលថៃឡើយ៕
© រក្សាសិទ្ធិដោយ thmeythmey.com