ជាតិ
សង្គមជាតិ
×![]()
សៀមរាប៖ ដោយសារធ្លាប់កើតមានការភាន់ច្រឡំ រវាងមន្ទីរពេទ្យគន្ធបុប្ផា និងមន្ទីរពេទ្យកុមារអង្គរ ថាជាមន្ទីរតែមួយនោះហើយ ទើបថ្មីៗនេះខាងមន្ទីរពេទ្យកុមារអង្គរ បានរៀបចំបទបង្ហាញមួយ ដើម្បីស្វែងយល់ពីមន្ទីររបស់ខ្លួន។ អ្នកបម្រើសេវាដឹកជញ្ជូនភ្ញៀវ ត្រូវបានអញ្ជើញឲ្យចូលរួមក្នុងបទបង្ហាញមួយ ស្តីពីប្រវត្តិ និងសេវាព្យាបាលរបស់មន្ទីរពេទ្យកុមារអង្គរ។
កាលពីថ្ងៃទី៩ កញ្ញា កន្លងទៅ មន្ទីរពេទ្យកុមារអង្គរ ដែលមានស្លាកសញ្ញាសម្គាល់រូបបេះដូង បានរៀបចំនូវបទបង្ហាញខ្លីមួយ ទៅកាន់អ្នកបើករថយន្តទេសចរណ៍ អ្នករត់តាក់ស៊ី រ៉ឺម៉ក និងអ្នករត់ម៉ូតូឌុប។ គោលបំណងសំខាន់ក្នុងបទបង្ហាញនោះ គឺដើម្បីផ្សព្វផ្សាយពីមន្ទីរពេទ្យ រួមនិងសកម្មភាព សេវាព្យាបាលរបស់មន្ទីរពេទ្យកុមារអង្គរ។
អ្នកស្រី ស៊ិនកេត អរុណ ប្រធានផ្នែកទំនាក់ទំនងសាធារណៈនៃមន្ទីពេទ្យកុមារអង្គរ និងជាអ្នកធ្វើបទបង្ហាញ បានឲ្យដឹងថា គោលបំណងតែមួយគត់ក្នុងបទបង្ហាញនោះ គឺចង់ឲ្យពលរដ្ឋខ្មែរស្គាល់ច្បាស់ពីមន្ទីរពេទ្យកុមារអង្គរ។ អ្នកស្រីបន្ថែមថា កន្លងមកធ្លាប់មានការយល់ច្រឡំពីមន្ទីរកុមារអង្គរទៅនឹងពេទ្យគន្ធបុប្ផា ដែលផ្តល់សេវាព្យាបាលជំងឺកុមារដោយឥតគិតថ្លៃដូចគ្នា ហើយករណីនេះ ធ្លាប់កើតមានលើអ្នកបម្រើសេវាកម្មដឹកជញ្ជូនតែម្តង
«...ជាពិសេសឲ្យពួកគាត់ ស្គាល់មន្ទីរពេទ្យកុមារអង្គរឲ្យច្បាស់ ថាមន្ទីរពេទ្យកុមារអង្គរនៅកន្លែងណា ដោយសារពួកគាត់ គឺជាអ្នកដឹកជញ្ជូនភ្ញៀវទេសចរមកកាន់ខេត្តសៀមរាប។ ដើម្បីឲ្យគាត់ស្គាល់មន្ទីរពេទ្យច្បាស់ ចឹងនៅពេលមានភ្ញៀវដែលចង់មកទស្សនៈកិច្ចមន្ទីរពេទ្យកុមារអង្គរអី ឫចង់មករកសេវារបស់យើង គាត់ស្គាល់ច្បាស់ គាត់នាំមកឲ្យបានត្រឹមត្រូវ...»។ អ្នកស្រី អរុណ បានឲ្យដឹងទៀតថា មន្ទីរពេទ្យកុមារអង្គរ បាននិងកំពុងព្យាបាលជំងឺកុមារដោយឥតគិតថ្លៃ និងមានគុណភាពខ្ពស់។
គួររម្លឹកថា នេះជាលើកទី២ហើយ ដែលមន្ទីរពេទ្យកុមារអង្គរ បានរៀបចំបទបង្ហាញទៅដល់អ្នកបម្រើសេវាកម្មដឹកជញ្ជូនភ្ញៀវក្នុងទីក្រុងសៀមរាប។ លើកទី១ ដែលរៀបចំធ្វើកាលពីចុងខែឧសភាកន្លងទៅ មានអ្នកចូលរួមប្រមាណ៣០០នាក់។ សម្រាប់លើកទី២នេះ ដែលរៀបចំធ្វើនៅព្រឹកថ្ងៃទី៩ កញ្ញា នេះមានអ្នកចូលរួមប្រមាណ៥០នាក់។
យោងតាមរបាយការណ៍របស់មន្ទីរពេទ្យកុមារអង្គរ តួលេខកុមារដែលចូលមករកសេវាក្នុងមន្ទីរពេទ្យ ជាមធ្យមមានចំនួនប្រមាណ៦០០នាក់ ដែលតួលេខនេះមានការកើនឡើងជាងឆ្នាំទៅ ដែលមានចំនួនត្រឹម៤០០ ទៅ៥០០នាក់តែប៉ុណ្ណោះ៕
© រក្សាសិទ្ធិដោយ thmeythmey.com
